بهڕێزان!
ئامادە بووانی هێژا!
راوەستە کردن لەسەر رووداو و ئاڵوگۆڕەکانی ژینگەی سیاسی رۆژئاوای کوردستانو هەروەها لێکدانەوەی ئەگەرو پێشهاتەکانی بەردەم کورد لەو پارچهی کوردستان لەو قۆناغە هەستیارە مێژوویییەدا، ئەرکێکی نەتەوەیییە کە باقیی پارچەکانی کوردستان پێویستە بە بایەخەوە لێی بڕوانن.
رۆژئاوای کوردستان لە مێژوودا بە لانکەو بێشکەی ژیارو شارستانییەت لەقەڵەم دراوە. دەسەڵاتە خۆجێیییەکانی هیتیو میتانی لە هەزار ساڵ پێش زاییندا تاکوو هەنووکەش کارتێکەرییان بەسەر کوردستانو شامدا جێهێشتووەو دەکرێ ئیدارەی خۆبەڕێوەبەری کاتی پێکهاتووی گەلانی کورد، ئاسووریو عەڕەب لە قۆناخی ئێستادا بە درێژەی ئەم مۆدێلە مێژوویییە بشوبهێنین.
لە کاتێکدا کە ناوچە عەڕەبییەکانی وڵاتی سووریە بەهۆی ئاگری شەڕی تایفیو مەزهەبی رۆژ لەدوای رۆژ بەرهو وێرانکاری دەچێو لە گەرمەی ئەو تراژدیا دڵهەژێنەدا، هەرێمێکی ئارامو تا رادەیەکی بەرچاو سەقامگیر خۆی دەرخستوە کە ئەویش هەرێمی کوردانە.
ئەگەرچی دەوڵەتە ناوچەییو تەنانەت زلهێزەکانی جیهانیش بەهۆی بەرژەوەندییەکانیان زۆر بە کەمی تیشک دەخەنە سەر ئەم ئەزموونە سەرکەوتوویە، بەڵام زوو یا درەنگ هەموو لایەنەکان بە ناچاری دەگەنە ئەو دەرهنجامەی کە ئارامیو سەقامگیری لە تەواوەتی سووریە پەیوەستە بە پەیڕەوکردنی مۆدێلی خۆبەڕێوەبەری خۆجێیی کە کوردان تێیدا پێشەنگن.
بەڕێوەبەری خۆجێیی کوردان پێکهاتوو لە سێ کانتۆنی جەزیرە، عەفرینو، کۆبانی دەستپێشخەرییەکی دیرۆکییە کە گەلی کورد بە کلیلی ئارامی وڵاتی سووریهو زامنی مافو ئازادییەکانی سەرجەم نەتەوەو ئایینو ئایینزاکانی ئەو وڵاتەی دەژمێرێو درەنگ یان زوو باقیی پێکهاتەکانی ئەو وڵاتە بەو ئاکامە دەگەن کە چارەسەری قەیرانی سووریە کەڵک وەرگرتنە لەو مۆدێلەی کوردان، هەڵبەت نابێ لە بیر بکەین کە ئەم مۆدێلە لەگەڵ کۆمەڵێک مەترسیو هەڕەشە بەرەوڕوویە کە بریتین لە: دژایەتی دەوڵەتانی ناوچە بە تایبەت تورکیاو گرووپە فێندەمێتالە ئیسلامییەکان وەک داعش، «جبههالنسرە» و «جبهەی اسلامی» سووریەو هەروەها ناسیۆنالیستە عەڕەبەکان هەم لە بەرەی ئۆپۆزیسیۆنو هەمیش لە بەرەی رێژیمی بەشار ئەسەددا.
روونە کە بەرەنگاربوونەوەی ئەم مەترسیانە لە لایەن گەلی رۆژئاوای کوردستان پێویستی بە هاوهەڵوێستیو هاوخەباتی سەرجەم پارتو لایەنە سیاسییەکان لەو بەشەدا هەیە. ئیدارەی بەڕێوەبەری کاتی بە راپەڕاندنی پێداویستییەکانی هەڵبژاردنێکی ئازادو دێمۆکڕاتیک لە ماوەیەکی نزیکداو هەروەها بووژاندنەوەی ژێرخانی ئابووری هەرسێ کانتۆنی جەزیرە، عەفرینو کۆبانیو پەرەپێدان بە رێژەو پێداویستییەکانی ئەرتەشێکی واحید لەو هەرێمەدا دەتوانێ تا رادهیەکی زۆر بەرەنگاری مەترسییەکان ببێتەوە. هەڵبەت رۆڵی هەرێمی کوردستان لە باشوور لەو بارەوە گرینگییەکی تایبەتیو حاشا هەڵنەگری هەیەو هەق وایە لایەنەکانو دەسەڵاتی سیاسی لە باشووری کوردستان لە رێگای هاوکاریو پشتیوانی خۆیان وەک هەلێکی زێڕین ئەم دەرفەتە بۆ گەشەی ناسیۆنالیزمی دێمۆکڕاتیکی کورد لە ناوچەدا بقۆزنەوە. لە کۆتاییدا جێگای شانازییە کە بەڕێوەبەرانی ئیدارەی کاتی لە ناوچەی جەزیرە وەکوو هێماو سیمبۆلی یەکگرتوویی کوردان رۆژی ٢ی رێبەندان، ساڵڕوژی دامەزرانی کۆماری کوردستان لە مەهابادیان کردە رۆژی راگەیاندنی دامەزرانی ئیدارەی کاتی لە جەزیرە.
هیوادارین کە مەشغەڵی کۆماری کوردستان ئەم جارە لە رۆژئاوا بگەشێتەوەو گەلەکەمان لەو بەشە لە کوردستان بە سەربڵیندی بژی.
یەکیەتیی لاوانی دێمۆکڕاتی رۆژهەڵاتی کوردستان
9ی رێبهندانی 2713ی کوردی(1392)