ڕۆژی یەکشەممە ٢٩ی ڕەزبەری ١٤٠٣ی هەتاوی، کاتژمێر ٧ی سەرلەبەیانی، هەڵبژاردنی خولی شەشەمی نوێنەرانی پارلەمانی هەرێمی کوردستان بە سەرپەرەشتیی کۆمێسیۆنی باڵای هەڵبژاردنەکانی عێراق و هەرێمی کوردستان بەڕێوە چوو و هەروەها چوار ڕێکخراوی نێودەوڵەتی چاوەدێری پڕۆسەی هەڵبژاردنەکە دەکەن.
لەو هەڵبژاردنەدا هەموو حیزب و لایەنە سیاسییەکان هەرێمی کوردستان، هەموو پێکهاتە نەتەوەییەکانی کورد و تورکەمەن و ئاشووری و… بەشدار بوون و پێکهاتە ئایینیەکانیش لە ڕیگای کورسی کۆتاوە توانیان نوێنەری خۆیان بۆ هەڵبژاردنی پارلەمانی هەرێمی کوردستان بپاڵێون.
لەو هەڵبژاردنەدا لە ئامێری ئێلکترۆنیی تایبەت بە دەنگدان وهەروەها کارتی بایۆمیتری دەنگدان کەڵک وەردەگیرا تاکوو ڕێگری بکرێت لە ساختەکاری و دەستێوەردان لە ئەنجامی پڕۆسەکە، شایانی باسە زانیاریی دەنگی دەنگدەران ڕاستەوخۆ دەگوازرانەوە بۆ ناوەندی سەرەکیی کۆمیسیۆن لە بەغدا.
جێگای ئاماژەیە لە هەڵبژاردنی نوێنەرانی پارلەمانی هەرێمی کوردستاندا، زیاتر لە ١٧٠٠ چاوەدێری نێودەوڵەتی و ١٠٩ میدیاکار لە ٢٢ دەزگای میدیایی جیهانی، ٥٣ لایەنی سیاسی، ٩٨ ڕێکخراوی لە نێوخۆی هەرێمی کوردستان، ٤٣ و ١٣٩ چاوەدێری نێوخۆیی سەر بە لایەنە سیاسییەکان چاوەدێریی پڕۆسەکەیان دەکرد.هەروەها ١١٩٠ بەربژێر لە ١٣٦ لیستی لایەنە سیاسییەکان، پێکهاتە نەتەوەییەکان، بەربژێرانی سەربەخۆ و کۆتاکان کێبڕکێیان لەسەر بەدەستهێنانی ١٠٠ کورسیی پارلەمانی کرد کە ٥ کورسیان تایبەت بوو بە کۆتان. هەروەها لەو ڕێژەیە ٨٢٣ کەس لە بەربژێرەکان لە ڕەگەزی نێر و ٣٦٧ بەربژێریش لە ڕەگەزێ مێن.
جێگای باسە کۆمیسیۆنی هەڵبژاردنەکان، هەرێمی کوردستانی بەسەر چوار بازنەی هەولێر، سلێمانی، هەڵەبجە و دهۆکدا دابەش کردبوو و لەو چوار بازنەیەدا ١٦٢٢ بنکە و ٦٣١٨ ویستگە بۆ دەنگدەران ئامادە کرابوو.
لەو چوار بازنەی هەرێمی کوردستاندا، ٢ میلیۆن و ٦٠٠ هەزار کەس مافی دەنگدانیان هەبوو.
