ڕۆژانی ١٧ و ١٨ی ئاپریلی ٢٠٢٦، کۆبوونەوەی “هاوپەیمانیی پێشکەوتنخواز” بە بەشداری زیاتر لە سەد ڕێکخراو و حیزب لە ٧٠ وڵاتی جیهانەوە لە شاری بارسلۆنای ئیسپانیا بەڕێوە چوو.
“کەماڵ محیەدینی” نوێنەری یەکیەتیی لاوانی دێموکراتی ڕۆژهەڵاتی کوردستان، لە شاندی حیزبی دێموکراتی کوردستانی ئێران بە سەرپەرستیی کاک “مستەفا هیجری” سکرتێری گشتیی حیزب، لەو کۆبوونەوەیەدا بەشدار بوو.
ئامانجی سەرەکیی بەشداریی حیزبی دێموکرات لەو کۆبوونەوەیەدا، دروستکردنی پەیوەندیی سیاسی لەگەڵ حیزب و کەسایەتییە جیهانییەکان و گەیاندنی دەنگی خەڵکی ڕۆژهەڵاتی کوردستان بوو.
ئەم بەشدارییە کارایەی حیزبی دێموکرات لە پلاتفۆرمێکی وەها گەورەدا، کە لەلایەن سەرکردەکانی وەک “پێدرۆ سانچێز” سەرۆک وەزیرانی ئیسپانیا، “لۆلا داسێلڤا” سەرۆک کۆماری برازیل و “ستێفان لۆڤن” سەرۆکی پارتی سۆسیال دێموکراتەکانی ئەورووپا پاڵپشتی دەکرێت، هەنگاوێکی گرنگە بۆ بەهێزکردنی پێگەی دیپلۆماسیی کورد لە ئاستی نێودەوڵەتیدا.
ئامانجی نوێنەرایەتیی یەکیەتیی لاوانیش لەم کۆبوونەوەیەدا بەدەستهێنانی هاوپەیمانیی نوێ لەگەڵ ڕێکخراو و حیزبەکانی بەشداربوو لەم کۆبوونەوەیەدا بوو بۆ گەیاندنی دەنگی لاوانی ڕۆژهەڵاتی کوردستان، کە لەو ڕاستایەدا دەیان دیدار و کۆبوونەوە لەگەڵ بەشداربووان ئەنجام درا.
نوێنەرایەتی یەکیەتیی لاوانی دێموکراتی ڕۆژهەڵاتی کوردستان لەم کۆبوونەوانەدا جەختی لەسەر ئەوە کردەوە کە ڕژێمی کۆماری ئیسلامیی ئێران لە ڕێگەی لەسێدارەدان و زیندان و ئەشکەنجە و تەنانەت هێرشی مووشەکی و درۆنی، سەرکوتی لاوانێک دەکات کە داوای مافی ڕەوای خۆیان دەکەن، هەر بۆیەش لەم ڕاستایەدا نابێ چیدیکە کۆمەڵگەی دەرەوە چاوپۆشی لەم جینایەتانە بەرانبەر بە لاوانی کورد بکات و ئێستا کاتی ئەوەیە ڕێکخراوە دێموکراتیکەکانی جیهان ڕێکاری کردەیی لەم ڕاستایەدا بگرنەبەر.
