سەردانی سکرتێری گشتیی یەکیەتیی لاوانی دێموکراتی رۆژهەڵاتی کوردستان لە بنکەی نەتەوە یەکگرتووەکان لە هەولێر سەرلەبەیانی رۆژی یەک شەممە رێکەوتی 14/06/1395 ، پێشەوا عەلی پوور سکرتێری گشتیی یەکیەتیی لاوانی دێموکراتی رۆژهەڵاتی کوردستان لەگەڵ بەڕێز زیتۆ سیانی بەرپرسی دێسکی مافی مرۆڤی نەتەوەیەکگرتووەکان لە هەولێر کۆبۆوە.
لەم دیدارەدا پێشەوا عەلی پوور تیشکی خستە سەر پێشێلکارییەکانی مافی مرۆڤ لە ئێران، بەتایبەیت لە ماوەی رابردوودا و هەروەها کەیسی ئێعدامی بەکۆمەڵی زیندانیانی سیاسی و هەموو ئەو ئەوانەی کە لەسەر جیاوازیی ئایین ئێعدام کراون. باسێکی دیکەی سکرتێری گشتیی لاوان تەرخان کرابوو بە کەیسی کۆڵبەرانی سنوور لە رۆژهەڵاتی کوردستان و هەروەها مندالانی سەرشەقام لە ئێران. پێشەوا عەلی پوور وێڕای جەخت کردنەوە لە سەر پێشێلکردنی مافی مرۆڤ و بەها ئینسانییەکان لە لایەن دەسەڵاتدارانی تارانەوە، باسی لە زیندوو بوونی کۆمەڵگای مەدەنی لە رۆژهەڵاتی کوردستان کرد و لەسەر هەست بوونی لاوانی کوردی بۆ بەرپەرچدانەوە سیاسەتەکانی کۆماری ئیسلامی دژی نەتەوەی کورد بەرز نرخاند. پاشان بەڕێز زیتۆ سیانی بەرپرسی دێسکی مافی مرۆڤی نەتەوە یەکگرتووەکان لە هەولێر وێڕای دەستخۆشی لە یەکیەتیی لاوانی دێموکراتی رۆژهەڵاتی کوردستان، رایگەیاند کە ئەوان داتا و زانیارییەکانی یەکیەتیی لاوان وێڕای هەموو ئەو داتایانەی کە لەسەر پێشێلکاری مافی مرۆڤ لە ئێران بەدەستیان دەگات دەگەیەننەوە بنکەی نەتەوە یەکگرتووەکان لە ژێنێڤ و هەروەها راشیگەیاند کە پشتگیری یەکیەتیی لاوانی دێموکراتی رۆژهەڵاتی کوردستان دەکەن لە بەرەو پێشبردنی کاری رێکخراوەیی و هۆشیاری لاوان و برەودان بە دیموکراسی.
