ئێوارەی ڕۆژی پێنج شەممە ١٥ی مەی ٢٠٢٥ کۆبوونەوەی شوڕای یەکیەتیی لاوانی ئینترناسیۆنال سۆسیالیست بە بەشداری یەکیەتیی لاوانی دێموکراتی ڕۆژهەڵاتی کوردستان و بەشێکی بەرچاوی ئەندامانی ئەم ڕێکخراوەیە ، لە “پریشتینا “ی پێتەختی وڵاتی کۆزۆڤۆ دەستی بەکارەکانی کرد.
هەر لە پێشەکی کارەکانی شۆڕادا کۆبوونەوەی کۆمیتەی مەدیتەرانەی لاونای ئینتێرناسیۆناڵ بە پێشکەشکردن و کۆبەندی ڕاپۆرتی تایبەت بە ئێران و وڵاتانی دیکەی ئەندام لەم کۆمیتەیە بەڕێوە چوو و هەرکام لە بەشداربووان ڕاپۆرتی خۆیان سەبارەت بە بارودۆخی لاوان هێنایە بەر باس.
کۆبوونەوەی شۆڕای لاوانی ئینترناسیۆنال سۆسیالیست بە بەشداری ئاڵبین کورتی سەرۆک وەزیرانی وڵاتی کۆزۆڤۆ و جۆرج پاپاندریئا سەرۆکی پێشووی ڕێکخراوی ئینترناسیۆنال سۆسیالیست (ئێس ئای) دەستی بە کار کرد.
لە میانەی ئەم کۆبوونەوەیە دا سێ نوێنەر هەرکام لە وڵاتانی ئاڵمان، سوید و پورتوگاڵ بە دەنگی زۆرینەی ئەندامانی شوڕا لە کۆمیتەی ئوروپای ڕێکخراو دا وەکوو جێگری سەرۆکی ڕێکخراوەکە هەڵبژێردران، پاشان بڕیار درا کە دەستەی سەرۆکایەتی بە هاوکاری ئەندامانی بەڕێوەبەری ڕێکخراو ئامادەکاری بۆ کۆنگرەی داهاتووی ئەم ڕێکخراوەیە بکا.
لە میانەی کۆبوونەوەی شوڕای یەکیەتیی لاوانی ئینترناسیۆنال سۆسیالیست دا نوێنەری یەکیەتیی لاوان چەندین دیدار و چاوپێکەوتنی لەگەڵ نوێنەرانی وڵاتانی ڕۆژهەڵاتی ناوەراست، ئاسیا، ئەفریقا، ئەمریکای لاتین و ئوروپا هەبوو و جەختی لەسەر هاوکاری زیاتری ڕێکخراوەیی و هەروەها پشتیوانی لاوانی ئەم وڵاتانە بۆ مەسەلەی کورد بەتایبەتی لە ڕۆژهەڵاتی کوردستان کردەوە و بە خۆشحاڵییەوە پێشوازییەکی باشی لێ کرا.
شایانی باسە یەکیەتیی لاوانی دێموکراتی ڕۆژهەڵاتی کوردستان بە پێنج بڕیارنامەی تایبەت بە دۆخی ڕۆژهەڵاتی کوردستان بەشداربووی شؤڕای باڵای لاوانی ئینتێرناسیۆناڵ سوسیالیست بوو کە لە ڕاپۆرتەکانی داهاتوودا زانیاری زیاتر بڵاو دەکەینەوە.
