ڕۆژی سێشەممە ١ی بانەمەڕ، لە هەولێری پایتەختی هەرێمی کوردستان، گردبوونەوەیەکی ناڕەزایەتی بۆ سەرکۆنەکردنی هێرشە درۆنی و مووشەکییەکانی ڕێژیمی ئیسلامیی ئێران بۆ سەر خاکی هەرێمی کوردستان و کەمپە مەدەنییەکانی حیزبەکانی ڕۆژهەڵاتی کوردستان، بەڕێوە چوو.
ئەم گردبوونەوەیە کە لەلایەن لێژنەی كاری هاوبەشی چەپی كوردستان ڕێک خرابوو و چالاکانی مەدەنی و سیاسیی خەڵکی باشووری کوردستان و پارچەکانی دیکەی کوردستان تێیدا بەشدار بوون، بە سروودی ئەی ڕەقیب و ساتێک بێدەنگی بۆ گیانی پاکی شەهیدانی کوردستان دەستی پێ کرد.
پاشان بە ئامادەبوونی دەزگاکانی ڕاگەیاندن، بەیاننامەی لێژنەی كاری هاوبەشی چەپی كوردستان خوێندرایەوە و تێیدا وێڕای ئیدانەکردنی هێرشەکانی ڕێژیمی ئێران، داوا لە حکوومەتی فێدراڵی عێراق و ناوەند و ڕێکخراوە نێودەوڵەتییەکان، بەتایبەتی ناوەندەکانی مافی مرۆڤ کرا، سنوورێک بۆ ئەم دەستدرێژییانەی ڕێژیمی ئێران بۆ سەر خاکی هەرێمی کوردستان و کەمپەکانی خەڵکی سڤیل دابنرێت.
لە گردبوونەوەکەدا، ناڕازییان وێنەی شەهیدانی هێرشەکانی ڕێژیمی ئێران بۆ سەر هەرێمی کوردستان و کەمپەکانی حیزبەکانی ڕۆژهەڵاتیان بەرز کردەوە و دروشمیان دژی ڕێژیمی ئێران گوتەوە.
شایانی باسە، لەم گردبوونەوەیەدا، ئەندامانی ڕێکخراوە مەدەنی و دێموکراتیکەکانی ڕۆژهەڵاتی کوردستان، بەتایبەتی ئەندامانی یەکیەتیی لاوانی دێموکراتی ڕۆژهەڵاتی کوردستان، چالاکانە بەشدار بوون.
