سەرلەبەیانی رۆژی هەینی رێکەوتی ١٣/٢/٢٠١٥ شاندێکی یەکیەتیی لاوانی دێموکڕاتی رۆژهەڵاتی کوردستان لە سلیمانی بەشداری کرد لە کۆنفڕانسی نێودەوڵتی ” ڕیگای ئاشتی و دێموکراسی – میانەڕەوی دژ بە توندڕەوی ”
لەسەر بانگهێشتی رێکخراوی لاوانی ئینتێر ناسیۆناڵ سۆسیالیست و رێکخراوی ئۆلۆف پاڵمە شاندێکی یەکیەتیی لاوانی دێموکراتی رۆژهەڵاتی کوردستان بە سەرپەرەستی پێشەوا عەلی پوور سکرتێری گشتیی رێکخراو بەشدار بوون لە کۆنفراسی نێودەوڵەتی ” ڕیگای ئاشتی و دێموکراسی – میانەڕەوی دژ بە توندڕەوی ”
سەرەتای رێوڕەسمەکە بە ساتێک وەستان بۆ گیانی پاکی شەهیدان دەستی پێکرد، پاشان پەیامی رێکخراوی ئۆلۆف پاڵمە لەلایەن ئیزابێل لاندییێن خوێندرایەوە، پەیامی لاوانی ئینتێرناسیۆنال سوسیالیست بڕگەی دووهەمی کۆنفڕانس بوو کە لەلایەن خاتوو ئەڤین ئەنجیر پێشکەش کرا.
پانێلی یەکەمی کۆنفڕانس لەژێر ناوی “ئەو قەیرانە تازانەی رووبەڕووی رۆژهەڵاتی نێوەڕاست ئەبنەوە” لەلایەن مەلا بەختیار کارگێری مەکتەبی سیاسی یەکیەتیی نیشتمانی پێشکەش کرا
پانێلی دووهەمی کۆنفڕانس کاتژمێر ٢:٣٠ پاش نیوەڕۆ دەستی پێکرد و کاریگەری سیاسی و ئایدۆلۆژی و گەشەکانی هەرێمی و ناوچەیی لەسەر قەیرانەکان تەوەری سەرەکی پانێلەکە بوو کە لەلایەن بەڕێزان مفید جەزائیری وەزیری پێشووی راگەیاندنی حکومەتی ئێراق و فەرید ئەسەسەرد بەرپرسی سەنتەری لێکۆڵینەوەی ستراتیژی یەکیەتی نیشتمانی پێشکەش کرا.
پانێلی سێهەمی کۆنفڕانس تەرخانکرابوو بە رۆڵی کورد و دەرئەنجامەکانی پرسەکانی کورد کە لە هەرچوار بەشێ کوردستان نوێنەرانی لاوان بەشذارییان تێدا کرد.
بەنوێنەرایەتی لەلاوانی باشوور بەڕێز هێمن عەمید سکرتیری رێکخراوی ئازادی لاوان باسێکی لە ئالوگٶرەکانی ناوچە و دۆخی هەرێمی کوردستان و بەرنگاری داعش کرد.
لە رۆژهەڵاتی کوردستان سەرەتا فواد خاکی بەیگی سکرتێری یەکیەتیی لاوانی دێموکراتی کوردستانی ئێران باسەکەی خۆی بە دۆخی هەنووکەیی رۆژهەڵاتی کوردستان دەست پێکرد و هەروەها جەختی لە یەکییەتیی ریزەکانی کورد کرد لەم قۆناغەدا.
پاشان پێشەوا عەلی پوور سکرتێری یەکیەتیی لاوانی دێموکڕاتی رۆژهەڵاتی کوردستان لە ئیدامی باسی تایبەت بە رۆژهەڵاتی کوردستان ئاماژەی بە کۆمەلێک بابەت کرد و وتی : “بەداخەوە لەکۆتاییەکانی سەدەی بیستەم و سەرەتاکانی سەدەی بیست و یەکەم, بەئیسلامیکردنی سیاسەت وەکوو میوانێکی رەزاقوورس سنوورەکانی کوردستانی تەنی و پێش هەمووشیان بەئەنجام گەیشتنی شۆرشی گەلانی ئێران لە ١٩٧٩ بوو، کەچی دوایی بەرهەمی شۆرشی گەلانی ئێران لەلایەن ئاخووندەکان دزراو حکومەتێکی ئەمنی و سەربازی شیعی ئەسنا عەشەری لەئێران دامەزرا. ئەگەرچی پێشتر دەوڵەتی ئیسلامی لەناوچەو جیهانیش کەم نەبوون، بەڵام ئەوە یەکەم سیستەمی حوکمرانی مەزهەبی بوو، کە بۆ راگرتنی دەسەڵاتەکەی هەموو کارێکی نائینسانی دەکرد، لە تەسفییەکردنی خەڵکی ناوخۆییەوە بگرە هەتا هەناردەکردنی ئینقلابی چەکداری شیعی بۆ دەرەوەی سنوورەکان، بۆ ئەوەی دونیا لەو دیو سنوور سەرقاڵ بکات و مەجال نەدات کۆمەڵگای نێودەوڵەتی ئاورلە سەرکوتەکانی ناوخۆی ئێران نەدەنەوە.”
سکرتێری گشتیی یەکیەتیی لاوانی دێموکراتی رۆژهەڵاتی کوردستان لە درێژەی باسەکەیدا وتی :” چەکدارکردنی میلیشیا مەزهەبییەکان لەلایەن کۆماری ئیسلامی ئێرانەوە رەنگە یەکەم هۆکاری لەدایکبوونی گروپی بەناو دەوڵەتی ئیسلامی لەعێراق و شام (داعش) بێت، چونکە هەبوونی میلیشیان چەکداری تووندرەو بەبیرۆکەی دامەزراندنی هێلی شیعی و ئیمپراتۆرییەتی شیعە لەناوچەدا وڵاتانی کەنداوو بگرە تورکیاشی بێزار کرد، لەگەڵ ئەوەش شەقامی سوننەی عێراقی بەهۆی کاریگەرییەکانی ئێران لەسەر سیاسەتەکانی نوری مالیکی کەوتنە بەر بێحورمەتی و بێرێزییەکی زۆرەوە، هەموو ئەوانە وایکرد میلیشیایەکی خوێنرێژو نا مرۆڤانەی داعش وەکوو دژکردەوەیەک بەرامبەر ئیسلامی سیاسیی ئێرانی دروست بێت کە ئێستا هەموومان لەسەر گۆی زەوی لەگەڵی رووبەرووین. لەو دۆخەدا ئەوەی لەسەرشانمانە ئەوەیە کە یەکەم بگەڕێینەوە بۆ ئەوەی لەرووی کۆمەڵایەتییەوە دادپەروەرییەکی کۆمەڵایەتی لەناوچەدا پێرەو بکەین و لەرووی سیاسیشەوە ئابووری و سیاسەت وەکوو دووانەیەکی لەیەک دانەبراو لەیەک نزیکتر بکەینەوە، بۆ ئەوەی کەس خەمی نانی نەبێت بۆ تێرکردنی ئێستا و دوارۆژی و پەنا بۆ هیچ ئایدۆلۆژیایەک نەبات.”
لە ئیدامەی کاری پانێلی سێهەم نوێنەرەکانی پارچەکانی رۆژئاوا و باکوور بابەتیان پێشکەش کرد و بەمشێوەیە رۆژی یەکەمی کۆنفڕانس کۆتایی پێهات .