خەڵکی سەربەرزی کوردستان!
بنەماڵەی شەهیدانی ڕێگای ڕزگاریی کوردستان!
تێکۆشەران، پێشمەرگە و ئەندامانی حیزبی دێموکرات!
ژنان ،لاوان و خوێندکارانی نیشتمانپەروەر!
ئەمساڵ کە ٨٠هەمین ساڵیادی دامەزرانی حیزبی دێموکراتی کوردستانی ئێرانە، بەسەر ساڵێکدا تێدەپەڕین کە بۆ خەڵکی ئێران و بەتایبەتی ڕۆژهەڵاتی کوردستان ساڵێکی پڕاوپڕ لە ڕووداوی جۆراوجۆر بووە. لەم ساڵەدا ڕێژیمی ئیسلامیی ئێران زیاتر لە جاران بەنیسبەت دنیای دەرەوە بەرەوڕووی ئاستەنگ و کێشەی سیاسی و ئابووری بووەوە، کە ئەنجامی سەرەڕۆی و سیاسەتە چەوت و دژەمرۆیییەکانی بەرپرسانی ڕێژیمە. ئەگەرچی ئەم زەخت و گوشارانە لەلایەن دەرەوە بەرەوڕووی ئەم ڕێژیمە بوونە، بەڵام سیستمە ئەمنییەتییەکان بۆ پڕکردنەوە بۆشایییە سیاسی و ئابوورییەکانی وەک هەمیشە لە سیاسەتی خۆپەڕاندنەوە کەڵکیان وەرگرت و تۆڵەیان لە خەڵک کردەوە و بە تۆمەتی ناڕەوا و جۆراوجۆرەوە خەڵکیان دەگرت و فەزای میلیتاریزەیان بەسەر کۆمەڵگادا زاڵ دەکرد.
گوشار و زەختەکانی کۆماری ئیسلامی بە نیسبەت خەڵکی بێدەسەڵات و بێتاوان هەموو چین و توێژێکی کۆمەڵگای دەگرتەوە، بەڵام لەوانە مامۆستایان، خوێندکاران، لاوان و ژنان زیاتر لەژێر هەڕەشە و مەترسیدا بوون. لەم پێوەندییەدا مامۆستایانی زمانی کوردیش تووشی دەسبەسەرکردن و زیندانیکردن بوونەوە. ئەو مامۆستانەی کە بە هۆی حوکمی ناعادڵانەی ڕێژیمی ئێران ڕەوانەی زیندان کراون و یان بانگهێشتی ناوەندە ئەمنییەتییەکان کران، ئەو کەسانە بوون کە خۆبەخشانە لە پێناو گەشەکردنی زمان و چاندی کوردی و یان پێگەیاندنی کچان و کوڕان بەپێی زانستی ستاندارد و سەردەمیانە ئەرکی پیرۆزی مامۆستایەتییان ڕادەپەڕاند، کە نموونەی بەرچاویان، زیندانیکردنی مامۆستا سروە پوورمحەممەدی، یەکێک لە مامۆستایانی زمانی کوردی لە سنە بوو.
هەر لەم ساڵدا، ڕێوڕەسمی نەورۆزی خاکیپۆشان، لە شار و گوندەکانی ڕۆژهەڵات، وەکوو مەیدانێکی بەرخۆدان و بانگەوازی ئاشتی و ئازادی خۆی نواند. رۆڵی ژنان و لاوان لەو ڕێوڕەسمانەدا دەربڕینێکی نوێ بوو لە شوناسخوازی و نیشتمانپەروەری؛ ژن و لاوان کە لە نێویاندا خوێندکارانیش بەدی دەکران بە دەور و دەنگی بەرزیان، نەورۆزیان کردە هێما و سەمبۆلی خەبات بەدژی تاریکپەرەستی.
هەر لەم ساڵەدا شەڕی دوازدە ڕۆژە و هێرشی لەناکاوی ئیسرائیل بۆسەر ئێران و کوشتنی دەیان فەرماندەی پلە بەرزی نیزامی و زانایانی ئەتۆمی لە ئێران یەکێک لەو ڕووداوانە بوو کە پەیامی گۆڕان و وێنەی ڕاستەقینە و پۆشاڵینی لە هەمیشە زیاتری کۆماری ئیسلامی بە خەڵکی کورد و ئێران پیشان دا.
هەروەها یەکێک لە تاڵترین ڕووداوەکانی ئەمساڵ شەهیدبوونی سێ ژینگەپارێز لە ئاویەری سنە و پێشکەشکردنی گیانیان بۆ پاراستنی خاک و ئاو و ژینگەی وڵات بوو، کە لە مەراسمی بەخاکسپاردنی ئەم شەهیدانە خەڵکی کوردستان پەیامی تووڕەیی و ڕقی پیرۆزی خۆیان بە گوێی ڕێژیم و باڵی نیزامی ئەم ڕێژیمە (سپای پاسداران) گەیاند و بیرۆکەی “سەربەستی” و “پاراستنی ژینگە” لەم جووڵە شارستانییە یەکی گرت. گیانفیدایی ئەم ژینگەپارێزانە و خاوەنداریەتیی خەڵک لە ڕۆڵەکانیان باس لەوە دەکات کە خەباتی کوردستان تەنیا خەباتی سیاسی نییە، بەڵکوو خەباتی شارستانی و جەماوەریی و بەرزکردنی بەرپرسایەتی لە هەموو بەشەکانی ژیانە.
٨٠ ساڵ پێش، حیزبی دێموکراتی کوردستانی ئێران کە بە شێوازێکی مودێرن و دێموکراتیک بزووتنەوەی نیشتمانی دامەزراند، ئەمڕۆش بە پشتبەستن بە ئەزموون و خوێنی هەزاران شەهید، هێشتا شوێندانەرترین ڕەوتی خەباتی کوردایەتی و فاکتەری سەرەکیی بەستێنی لەباری هوشیاری سیاسیی ڕۆژهەڵاتی کوردستان و پێشەنگی خەباتی فرەڕەهەندی نەتەوەی کوردە.
ئێمە وەکوو یەکیەتییەکانی خوێندکاران، ژنان و لاوانی دێموکرات، لەسەر ئەم ڕێچکە و ڕێبازە کە هەم مودێڕن و خۆگونجێنە لەگەڵ پێشکەوتنەکانی سەردەم و هەم لەسەر دادپەروەری و یەکسانیی ژن و پیاو و هەروەها پرنسیپە دێموکراتیکەکان پێداگرە، بەردەوام دەبین و وەفادار دەمێنینەوە.
پیرۆز بێت ۲٥ی گەلاوێژ، ڕۆژی دامەزرانی حیزبی دێموکراتی کوردستانی ئێران!
سەرکەوتوو بێت بزووتنەوەی ڕزگاریخوازیی کورد!
یەکیەتییەکانی خوێندکاران، ژنان و لاوانی دێموکرات
٢٤ی گەلاوێژ ٢٧٢٥ی کوردی
