شیوا مورادیان
٣٦ ساڵ پێش ئێستا هەواڵێک ئاسمانی شینی کوردستانی تاریک کرد.هەواڵێک کە ڕیشەی دار بەڕووەکانی کوردستانی والێکرد لە ئازار خۆیان بەئاڵێنن بە بەردەکانی بەرماڵی کەڵە پیاوێک لە قەندیل کە هیچکات ناگەڕێتەوە ئەو دەڤەرەو و چیدیکە پێڵاوەکانی ناکەونە سەر ئەم خاكە تاکوو دیسان شانازی ئەوەیان بە نەسیب بێ کە باوکی مینا پێی لەسەر دابنێ.٢٢ی پووشپەڕی ساڵی ١٣٦٨ی هەتاویی دوکتور قاسملووی مەزن لەتەک هاوڕێیان عەبدوڵڵا قادری‌ئازەر نوێنەری حیزب لە ئورووپا و دوکتور فازڵ ڕەسووڵ دۆستی نزیکی دوکتور قاسملوو کاتێک بۆ چارەسەریی کێشەی کورد لە رۆژهەڵاتی کوردستان رۆیشتنە وڵاتی ئوتریش لەسەر مێزی وتووێژ بەدەستی دیپلۆمات تێرۆریستەکانی کۆماری ئیسلامی لە ڤییەن تێرۆر کران.
لە پاش شەهیدکرانی قاسملووی بیرمەند، کوردستان بێ رێبەر ئەژیت، بەڵام رێبوارانی ڕێگای قاسملووی مەزن بێ یادی ئەو تەنانەت یەک چرکەساتێش ناژین، دوژمنانی کورد پێیان وابوو گەر قاسملووی رێبەر شەهید بکرێت ئەوە بزووتنەوەی کورد لە رۆژهەڵاتی کوردستان لە نێو دەچێ، بەڵام بێ ئاگابوون لەوەی کە ڕێبەری مەزن بۆ خۆی فەرمووی کە من مردم، کورد نامرێ. بیر و هزری قاسملوو وەها لە زێهنی تاکی کورددا بیچمی گرتووە کە دوای زیاتر لە سی ساڵ پاش شەهیدکرانیشی بەردەوام لاوانی کورد لەسەر شەقامە میلیتاریزەکراوەکانی رۆژهەڵات پڕ بە گەروویان هاوار دەکەن؛ قاسملوو قاسملوو ڕێگات درێژەی هەیە و بە دوژمنەکانیان سەلماندیان کە ڕەنگە سەردەمانێک بەترسەوە هەموو خەڵکی رۆژهەلات سرتەی ناوی قاسملوویان دەکرد بەڵام ئێستا بەدەنگی بەرز وانە ئازادییەخوازییەکانی بە گوێی هەموواندا دەدەنەوە.
ڕاستییەکی حاشا هەڵنەگرە بە شەهیدبوونی قاسمووی وانە بێژی سەرچیاکانی وەتەن رۆژهەڵات و حیزبی دێموکرات بەتایبەتی نەبوونی ڕێبەریان پێوە دیارە بەڵام سەرەڕای ئەم ڕاستییە تاڵە، رێبازەکەی کاک دوکتور بەردەوامە تا گەیشتن بە ئازادی و دێموکراسی و دادپەروەریی.
کە پەیامی هەتاو واتە دوکتور قاسملوو ئەمەیە کە ئازادی فیداکاری دەوێت، ئەرکی لاوانی نیشتمان قورستر دەبێ بە تێگەیشتن لەوە بابەتە بۆ بەدەست‌هێنانی ئەو ئازادییە رێبەرەکەمان و هەزاران تێکۆشەری نیشتمانەکەمان بە گیانی خۆیان فیداکارییان بۆ کرد. هەرچەن نابێ ئەوە لە بیر بکەین کە قاسملووی زانا و بیرمەند هەموو جار باسی لەوە دەکرد کە دەبێ لە ژیانی تاکە کەسی و حیزبی خۆماندا، فێربوون و خۆپێگەیاندن بە چەکی زانست بکەین بە ئەرکی رۆژانەمان تا کوو باشتر لە کێشەکانی نەتەوەکەمان بزانین و هەوڵ بدەین هەرکامەمان لە شوێنی خۆمان ببین بە تاکێکی وشیاری کۆمەڵگا و بۆ بەدەست هێنانی مافی رەوای گەلەکەمان خۆمان بە بەرپرسیار بزانین .
کۆتا قسەم ئەوەیە کە هەر چەند لە گەورەی و بیرمەندی وپاشان لە ئازاری شەهیدبوونی قاسملووی دێموکرات بڵێم هێشتا کەمە، قاسملوو بە بوونی ئەوەی سکرتێری گشتیی حیزبی دێموکراتی کوردستانی ئێران بوو بەڵام بوو بە ڕێبەرێکی کارازماتیکی نەتەوەیی و گەڵی کورد وەک رێبەری هزری و سیاسی هەمووکات یادی لێدەکەنەوە. ئازاری نەمانی قاسملووی مەزن برینێکە بەسەر دڵی نیشتمانەوە کە هیچکات ساڕێژ نابێت، بەڵام ئەوەی ڕوونە فکری قاسملوو تێکەڵ بە هەناسە و خوێنی گەلی کورد بووگە و قاسملوو لە رێبازدا هەردەم زیندووە.
