سەرلەبەیانی رۆژی سێ شەممە 10/2/2015 شاندێکی یەکیەتیی لاوانی دێموکڕاتی رۆژهەڵاتی کوردستان لەشاری سلێمانی سەردانی رێکخراوی ئازادیی لاوانیان کرد
شاندێکی یەکیەتیی لاوانی دێموکڕاتی رۆژهەڵاتی کوردستان بە سەرپەرەستی پێشەوا عەلی پوور سکرتێری گشتیی، سەردانی رێکخراوی ئازادیی لاوانیان کرد و لەلایەن شاندێکی رێکخراوی ئازادی لاوان بە سەرپەرەستی هێمن حەمید سکرتێری ئەم رێکخراوە پێشوازییان لێکرا.
سەرەتای دانیشتنەکە هێمن حەمید سکرتێری رێکخراوی ئازادیی لاوان وێڕای بەخێرهاتنی گەرمی شاندی یەکیەتیی لاوان، پیرۆزبایی سەرکەوتنی کۆنگرەی حەوتەمی لە شاندی لاوان کرد و هیوای سەرکەوتنی بۆ بەڕیوەبەری نوێ خواست.
پاشان پێشەوا عەلی پوور سکرتێری یەکیەتیی لاوانی دێموکراتی رۆژهەڵاتی کوردستان بە نوێنەرایەتی دەستەی بەڕێوەبەری نوێی یەکیەتیی لاوان سپاسی شاندی خانەخوێی کرد.
هێمن حەمید سکرتێری رێکخراوی ئازادی لاوان سەبارەت بە کۆنفڕانسی داهاتووی لاوانی ئینتێرناسیۆناڵی سۆسیالیست کە بە هاوکاری رێکخراوی ئۆلۆف پاڵمە لە شاری سلێمانی بەڕێوەدەچیت باسێکی پێشکەش کرد. هێمن حەمید لە بەردەوامی وتەکانیدا ئاماژەی بە تەوەری باسەکانی کۆنفڕانس کرد کە بریتین لە ئاڵوگۆرەکانی رۆژهەڵاتی نێوەڕاست و ئیسلامی سیاسی. لەم بارەوە بەڕێزیان وێڕای ئاماژەدان بە بەشداری لاوانی رۆژهەڵاتی کوردستان لەم کۆنفڕانسە، هیوای خواست کە یەکیەتیی لاوانی دێموکڕاتی رۆژهەڵاتی کوردستان و رێکخراوەکانی رۆژهەڵات باسەکانی کۆنفڕانس دەوڵەمەندتر بکەن.
پاشان پێشەوا عەلیپوور سکرتێری یەکیەتیی لاوان ئاماژەی بەچەند بابەت کرد و وتی : “ئینتێرناسیۆنالی سۆسیالیست هەمیشە سەکۆیەک بووە بۆ گەیاندنی دەنگی کورد بە کۆمەڵگای نێودەوڵەتی، ئەمجارەشیان بە گرتنی ئەم کۆنفڕانسە لاوانی ئینتێرناسیۆنالی سوسیالیست و رێکخراوی ئۆلۆف پاڵمە لەپێناو ئاسایشی کۆمەڵگای نێودەوڵەتی و گەیشتن بە تەبایی گەلان لە ناوچەکە، دەتوانن یارمەتیدەر بن بەدۆخی ئێستای رۆژهەڵاتی نێوەڕاست و دڵنیام کە بە یەکدەنگی و هاوئاهەنگی هەموو لایەک دەتوانین بەگرتنەبەری میکانیزمی گونجاو لەبەرامبەر تۆندئاژۆیی ئیسلامیدا بوەستینەوە، هەروەها ئێمە وەک یەکیەتیی لاوانی دێموکڕاتی رۆژهەڵاتی کوردستان چەندە خۆمان بە نسبەت لاوانی رۆژهەڵات ئەرکدار دەبینین، هێندەش خەمی لاوانی کورد لە پارچەکانی تر و لاوانی نەتەوەکانی تر دەخۆین و بەم هیوایە ئەم کۆنفڕانسە سەرتایەک بێت بۆ کاری هاوبەش لە پێناو هوشیاری هەرچی زیاتر لەنێو لاوانی کوردستان.”
دوای کاتژمێرێک ئاڵوگۆڕی بیر و را لەکەشێکی دۆستانەدا، دانیشتنەکە کۆتایی هات
شایانی باسە شاندی یەکیەتیی لاوانی دیموکرات پێکهاتبوو لە بەڕێزان: پێشەوا عەلی پوور سکرتێری گشتیی، ئومید مودەبێری بەرپرسی پێوەندییەکانی یەکیەتیی لاوان لە سلێمانی و هاوڕی ئیبن عەبباسی جێگری کۆمیتەی بەڕێوەبەری