کۆمیتەی حیزبی دێموکراتی کوردستان لە وڵاتی سوئیس بە هاوکاری‌ و هاوبەشیی یەکیەتیی ژنانی دێموکراتی کوردستان و یەکیەتیی لاوانی دێموکراتی ڕۆژهەڵاتی کوردستان رۆژی شەممە، 27 ی بەفرانبار بە بەڕێوەبردنی رێوڕەسمێک بەرەو پیلی 2ی رێبەندان ساڵڕۆژی دامەزرانی کۆماری کوردستان چوون.
لەو رێوڕەسمەدا کە بە سرودی نەتەوایەتیی ئەی رەقیب‌و رێزگرتن لە یادو بیرەوەریی شەهیدانی حیزب‌ و گەل دەستی پێکرد، زاهید شاعیری، بەرپرسی کۆمیتەی سوئیسی حیزبی دێموکراتی کوردستان بەو بۆنەیەوە پەیامی پیرۆزبایی هەیئەتی بەڕێوەبەریی رێوڕەسمەکەی پێشکەش کرد‌و لەسەر بارودۆخی ئێستای خەبات‌ و بزووتنەوەی سیاسی‌و مەدەنیی کورد لە رۆژهەڵاتی کوردستان بۆ بەشداران دوا.
خوێندنەوەی پەیامی یەکیەتیی لاوانی دێموکراتی ڕۆژهەڵاتی کوردستان لەلایەن ئاریا جەبارپوور، بەرپرسی کۆمیتەی ئەو ڕێکخراوەیە لە سوئیس، پەیامی حیزبی کومونیستی ئێران، شاخەی کوردستانیی کۆمەڵە‌ و پێشکەشکردنی چەندین سروود و گۆرانی‌و بەستەی شۆڕشگێری‌ و هەروەها کۆمەڵێک هەڵبەست لەلایەن چیمەن بارام میرزا و خوسرەو مستەفانزاد بڕگەی دیکەی ئەم رێوڕەسمە بوون. لە بەشێکی دیکەی ئەم بەرنامەیەدا لە لایان یەکیەتی ژنانی دێموکراتی رۆژهەڵاتی کوردستانەوە رێزنامە پێشکێش بە چەند ژنی چالاک کرا.