ڕۆژی دووشەممە ٢١ی بانەمەڕی ١٤٠٥، لەسەر داوای سەنتەری “ئۆڵۆف پاڵمێ” لە شاری ستۆکهۆڵم، کاک “مستەفا هیجری” سکرتێری گشتیی حیزبی دێموکراتی کوردستانی ئێران بە هاوڕێیەتی چەند کەس لە ئەندامانی کومیتەی گشتیی سوید و “ئارۆ یووسفپوور” بە نوێنەرایەتیی یەکیەتیی لاوانی دێموکراتی ڕۆژهەڵاتی کوردستان لە سوید، سەردانی ئەو ناوەندەی کرد و لەلایەن بەرپرسانی ئەو ناوەندەوە بەگەرمی پێشوازییان لێ کرا.
ئەو چاوپێکەوتنە لە باڵەخانەی ئەو ناوەندە کە بە ماڵی سۆسیال دێموکراتەکانی سوید بەناوبانگە، پێکهات. لەو دیدارەدا “ئۆسکار ئێرنڕووت” بەرپرسی ئەو ناوەندە و خاتوو “سانا ئێلیاسۆن” نوێنەری نێونەتەوەییی ئەو ناوەندە و ژماریەک لە لاوان و چالاکانی سۆسیال دێموکرات بەشدار بوون.
ئۆسکار ئێرنڕووت وێڕای بەخێرهێنانی بەڕێز سکرتێری گشتیی حیزب گوتی: ئێمە لە نزیکەوە چاوەدێریی ڕووداوەکانی ئێران دەکەین و حیزبی ئێوە و سۆسیال دێموکراتەکان دەستەخوشکی یەکترن.
کاک مستەفا وێڕای سپاس بۆ ڕەخساندنی ئەو دەرفەتە گوتی: کۆماری ئیسلامی لەو شەڕەدا لە هەموو بارێکەوە زەبری زۆر قورسی وێکەوتووە و زۆربەی بەرپرسە باڵاکانی هەر لە ڕێبەری باڵاوە تا زۆر فەرماندەی دیکەی سەربازی و ئیتلاعاتیی خۆی لەدەست داوە.
هەروەها کاک مستەفا پێکهێنانی هاوپەیمانیی هێزە سیاسییەکانی کوردستانی ئێرانی وەک هەنگاوێکی بەجێ لەپێناو یەکگرتنی ئۆپۆزیسیۆنی کۆماری ئیسلامی باس کرد و ئامانجەکانی ئەو هاوپەیمانییەی وەک پێکهێنانی ڕێژیمێکی دێموکراتیک لە ئێراندا کە خەڵک بۆ خۆیان چارەنووسی خۆیان بەدەستی خۆیان دیاری بکەن و لەوێدا هەموو تاکەکانی کۆمەڵگە بەتایبەتی ژنان بە مافەکانی خۆیان بگەن، باس کرد.
کاک مستەفا لە وڵامی پرسیارێکدا سەبارەت بە شێوەی هاوکاریی ئەو ناوەندە بۆ دۆزی ڕەوای کورد لە ڕۆژهەڵات گوتی: لە سەرەتادا وڵاتانی ڕۆژاوایی بە نەرمی هەڵسوکەوتیان لەگەڵ ئەو ڕێژیمە کرد، بەڵام مێژوو دەریخست کە کۆماری ئیسلامی ئاڵوگۆڕی بەسەردا نایەت. چونکە ڕێژیمێکی ئیدئۆلۆژیک ئاڵوگۆڕی بەسەردا نایەت و ئێمە پێمان وایە کە وڵاتانی ڕۆژاوایی پێویستە بیر لە گۆڕینی ڕێژیم بکەنەوە.
