ئەم رێوڕەسمە ئێوارەی رۆژی یەکشەمە 30 ی سەرماوەز بە بەشداریی سەدان کەس لە لاوانو کادرو پێشمەرگەکانی حیزبو شاعیران و هونەرمەندانی میوان بەرێوە چوو.
رێوڕەسمەکە بە سروودی نەتەوایەتی ” ئەی رەقیب” و ڕاگرتنی ساتێ بیدەنگی بۆ گیانی پاکی شەهیدانی رێگای رزگاری کورستان دەستی پێکرد و پاشان پەیامی یەکیەتیی لاوان لەلایەن ئامانج زیبایی، ئەندامی دەستەی بەڕێوبەریی ئەم رێکخراوەیە خوێندرایەوە.
لەبەشێکی پەیامەکەی یەکیەتی لاواندائامانج زیبایی وێڕای پیرۆزبایی ئەمرۆژە مەزنە وتی “ئەگەر شەوی یەلدا بۆ وڵاتانی دیکە تەنیا شەوی درێژی ساڵەو بەو بۆنەوە جەژن دەگرن، بەڵام بۆ ئێمە گرینگایەتی و مانایەکی دیکەی هەیەو شەوی یەلدا بۆ ئیمە جیا لە درێژترین شەوی ساڵ، شەوی لە دایکبوونی شەهید دوکتۆر قاسملووشەو بەم بۆنەوە ئیمە لاوان پەیمانی لە ەڵ یادی بەرزی ئەو رۆحە نەمرە نوی دەکەینەوە.”
ئەندامی دەستەی بەڕێوبەری لاوان لە پەیامەکەی لاواندا تیشکی خستبۆ سەر رەوتی زیندانیانی سیاسی زیندانی ورمێ و مانگرتنەکانی ئەم دواییانە، ئاڵۆگۆڕەکانی رۆژائاوای کوردستان، ڕەوتی ئاشتی لە باکووری کوردستان و هەروەها هێرشی بەربڵاوی تێروریستانی داعش بۆ سەر خاکی کوردستانو لە دوایین بەشی پەیامەکەی لاواندا هاتوە کە لە چوارچێوەی ئامانجەکانی قاسملووی نەمردا داوا لە سەرجەم چین و توێژەکانی رۆژهەڵاتی کوردستان دەکەین کە هەوڵەکانیان بۆ بەرەنگاری کردن لە لە پەراوێز خستنی پرسی کورد لە رۆژهەڵاتی کوردستان چڕتر بکەنەوە و کار بۆ ئەوە بکەن کە کارتی کورد لە رۆژهەڵاتی کوردستان بە هێزتر بکەن.
لە بڕگەیەکی دیکەی ئەو بەرنامەیەدا شێعرێک لە وەسفی شەهید قاسملوودا لەلایەن ئەحمەد قازی خوێندرایەوەو مامۆستا عبدوڵڵا حەسەنزادە لەلایەن دەفتەر سیاسیی حیزبی دێموکراتی کوردستانەوە وتارێکی بەو بۆنەیەوە پێشکێش کرد.
مامۆستا حەسەنزادە لە پەیامەکەیدا گوتی” دوکتۆر قاسملوو لە یەکەمین تێکۆشەرانی لاوان بوو، ئەو رەمزو سەمبۆلێک بوو بۆ لاوان کە لە کاتی لاوەتیدا وەک لاوێک خەبات بکەنو لە دواییدا ئەو هێز و پوتانسیلەیان بۆ ئامانجێکی گەورەتر کە ئامانجی نەتەوەییە تەرخان بکەن.”
مامۆستا حەسەنزادە وێڕای دڵخۆشی بۆ لاوانی کورد گوتی “هەرچەند تا ئێستە لە ناو کورداندا تاکێکی دیکە وەک شەهید قاسملوو هەڵنەکەوتووە، بەڵام جەختی کردەوە کە بوون بە قاسملوو نە مەحاڵەو نە گوناح، بەڵکوو پێویستە و بە هەوڵدان هەر تاکێک دەتوانێ بگاتە ئەو ئاستە.”
مامۆستا حەسەنزادە لە بەشێكی دیکەی قسەکانیدا پڕژایە سەر تایبەتمەندییەکانی ئەو ڕێبەرە مەزنەو گوتی ” شەهید قاسملوو مرۆڤێکی بە تەواو مانا هەڵکەوتە بوو. زانایی، تێگەیشتن، زانیاری، تێکۆشان و ماندوونەناسی تایبەتمەندییەکانی هەرە گرینگی شەهید قاسملوو بوون.”
لە بڕگەیەکی دیکەی ئەو ڕێوڕەسمەدا د. هاوژین سڵیوە، مامۆستا وریا جەلیزادە، فازڵ شەوڕۆ و مامۆستا بابان بابانی شێعرەکانیان خوێندەوەو سروودێک لە لایەن تاهێر خەلیلی، هونەرمەندی دەنگخۆشی کورد پێشکێش کراو خوێندنەوەی چەند کۆپلە شیعرێک لە لایەن مامۆستا هیوا حەلاق و رازاوە هەمزەپوور و عەباس حەق بین بەشەکانی دیکەی ئەم رێوڕسمەبوونو شەوی یەڵدای یەکیەتیی لاوان بە چەند بڕگە گۆرانی لە لایەن سەرکەوت هەورامی و محمەد ئەمین کەریمی و کۆماری بەهاری کۆتایی پێهات.
