پاشنیوەڕۆی رۆژی چوارشەمە رۆژی جیهانی مافی مرۆڤ شاندێکی پایەبەرزی یەکیەتی لاوان سەردانی بارەگای نەتەوە یەکگرتووەکانیان کرد لە شاری هەولێر شاندێکی یەکیەتی لاوانی دێموکراتی رۆژهەڵاتی کوردستان بە سەرپەرەستی پێشەوا عەلی پوور سکرتێری گشتی رێکخراو، لەلایەن سۆکۆڵ کەندی نوێنەری نەتەوە یەکگرتووەکان لە شاری هەولێر و زەیتۆ سیانی بەرپرسی ئۆفیسی مافی مرۆڤی نەتەوە یەکگرتووەکان پێشوازیان لێکرا.
لەسەرەتای دانیشتنەکەدا سکرتێری یەکیەتی لاوان وێڕای پیرۆزبایی رۆژی جیهانی مافی مرۆڤ لە هەموو داکۆکیکارانی مافەکانی مرۆڤ، باسی لە رەوشی مافی مرۆڤ لە ئێران و رۆژهەڵاتی کوردستان کرد و هەروەها دۆخی نالەباری زیندانیانی سیاسی بەتایبەت زیندانیانی سیاسی گرتووخانەی ورمێی بۆ بەرپرسانی نەتەوە یەکگرتووەکان لە هەولێر شی کردەوە.
سکرتێری یەکیەتی لاوان وێڕای ئاماژە بەوەیکە گۆڕینی سەرۆک کۆماری ئێران نەتەنیا هیچ ئاڵوگۆڕێکی لە سیستمی کۆماری ئیسلامیدا دروست نەکرد بەڵکوو بە پێچەوانەوە ئێعدام و ئەشکەنجە و دەستبەسەرکردنی چالاکانی سیاسی و مەدەنی زیاتر بووە و هەنووکە ماوەی ٢١رۆژە ٢٧ گیراوی سیاسی کورد لە زیندانی ورمێ بەهۆی ئەوەی لەبەندی سیاسی را گواستراونەتەوە بۆ بەندی تاوانبارانی گەورە، مانیان لە خواردن گرتووە و دۆخی جەستەییان نالەبارە.
سەبارەت بە دۆخی زیندانیانی سیاسی گرتووخانەی ورمێ و بۆ ئاگادار کردنەوەی ناوەندە نێودەوڵەتییەکان یەکیەتی لاوان راپۆرتێکی ئامادەکردبوو کە لەم دانیشتنەدا پێشکەش بە بەرپرسانی نەتەوەیەکگرتووەکان کرا.
لە درێژەی ئەم دانیشتنەدا سۆکۆڵ کەندی نوێنەری نەتەوەیەکگرتووەکان لە هەولێر وێڕای دەربڕینی هاوخەمی خۆی بۆ کورد و نەتەوەکانی تر لە ئێران، رایگەیاند کە ئێمە دەنگی ئێوە دەگەیەنینە کۆمەڵگای نێودەوڵەتی و داوا لە سەرۆکی نەتەوەیەکگرتووەکان لە نیۆیۆڕک دەکەین کە دێسکی مافی مرۆڤ لە ئێران بەزووترین کات سەبارەت بە پرسی مانگرتنی زیندانیانی سیاسی ورمێ ئەرکدار بکات و هەروەها هەڵوێستیان هەبێ سەبارەت بە پێشێلکاری ئاشکرای مافی مرۆڤ لە رۆژهەڵاتی کوردستان و ئێران.
سۆکۆڵ کەندی هەروەها رایگەیاند:” ئێمە دەمێکە کورد دەناسین و باش دەزانین کە نەتەوەیەکی ئاشتی خوازن”، بەڕێزیان وێڕای ئاماژە بە قۆناغی زێڕینی کورد لە رۆژهەڵاتی کوردستان و دامەزرانی کۆماری کوردستان، هیوای خواست کە لەداهاتوودا کورد لە رۆژهەڵاتی کوردستان دووبارە ببێتەوە خاوەن دەوڵتی خۆی و شانبەشانی کوردانی باشوور و رۆژئاوا لەبەرەوپێشبردنی دێموکراسیدا یارمەتیدەر بن.
لەکۆتاییدا سۆکۆڵ کەندی وێڕای پشتیوانی لە داواکانی یەکیەتی لاوانی دێموکراتی رۆژهەڵاتی کوردستان، خۆشحاڵی خۆی بە لەسەرهەست بوونی لاوانی رۆژهەڵات سەبارەت بە مافی مرۆڤ و پرسەکانی تری ناو کۆمەڵگا دەربڕی و هیوای خواست یەکیەتی لاوان لە بواری مافی مرۆڤدا بەردەوام بێت و چالاکانە کار بکات.
شایانی باسە شاندی یەکیەتی لاوان پێکهاتبوو لە پێشەوا عەلیپوور سکرتێری گشتی و بەڕێزان خاتوو شەونم هەمزەیی و ئاگری شاریکەندی ئەندامانی چالاکیی یەکیەتی لاوان.
