شەوی ڕابردوو واتا دووشەممە لەسەر سێشەممە هونەرمەند جەعفەر ماملێ برای هونەرمەندی ناوداری کورد محەممەد ماملێ بەهۆی نەخۆشیەوە لە شاری مەهاباد کۆچی دوایی کرد.
جەعفەر ماملێ بچووکترین کوڕی سەعید ماملێ و گەورەی بنەماڵەی ماملێ ، لە ساڵی ۱۳۱۹ هەتاوی لە شاری مەهاباد لەدایک بووە.
لە سەرەتای منداڵییەوە باوکی کۆچی دوایی کردووە. براکانی هەوڵ دەدەن تا ئەو جێیەی بۆیان بلوێ لە نازی باوکانە بێبەش نەبێت و کەلێنی گەورەی بێباوکی بۆ پڕ بکەنەوە.
دۆخی نالەباری ژیانی ئەو بنەماڵەیە وا لە هونەرمەند جەعفەر ماملێ دەکات کە پۆلەکانی سەرەتایی خوێندنگە جێ بهێڵێت و کار بکات، تا بتوانن یاریدەدەر بێت بۆ وەدەستهێنانی بژێوی ژیانی خۆی و بنەماڵەکەی.
تایبەتمەندییەکی سەرنجڕاکێش کە ماڵباتی ماملێ بە گشتی هەیانە ئەوەیە کە، هیچ کۆسپ و لەمپەرێک نەیتوانی ئێستاشی لەگەل بی ناتوانێ دەنگی خۆشیان کپ و ڕێبازی هونەرییان کوێر بکاتەوە. ئەو تایبەتمەندییە لە ڕۆژە خۆش و ناخۆشەکانی میللەتەکەیاندا بەردەوام لەگەڵیان بووە و بووە بە خەمڕەوێن و هەتوانێکی بچووکی برینە قووڵەکانی ئەو گەلە. ئەوان لە منداڵییەوە بەو کولتوورە ڕاهاتوون و لە قوتابخانەی باوکیان، هونەرمەند و دەنگخۆشی سەردەمی خۆی، سەعید ماملێوە فێری وانەکانی گۆرانی گوتن و چرینی قەتارە و خوێندنەوەی بەستە و هۆنراوەکانی وەفایی بوون.
دیارە هونەرمەند جەعفەر ماملێش لەم تایبەتمەندییە بێبەش نەبووە و بەری هونەری لە مەحزەری براگەورەکانی بەتایبەتی کاک حوسێن ماملێ و کاک محەممەد ماملێ چنیوە. بەڕێزیان لەسەرتای مناڵییەوە شارەزاییەکی باشی لە گوتنەوەی قەتارە و شێعرەکانی وەفایی دا لەخۆی پێشان داوە.
جەعفەر ماملێ جیا لەوەی لە کۆڕی هاوڕێیان و بنەماڵەییدا هونەرەکەی بە شێوەیەکی نافەرمی دەردەخست، لە هەمانکاتیش دا لە هەندێک کۆڕی هونەریدا بەشداری کردووە.
جەعفەر ماملێ برای هونەرمەندی گەورەی کورد و ئەندامی حیزبی دێموکڕاتی کوردستان، نەمر محەممەدی ماملێ بوو. بنەماڵەی ماملێ، بنەماڵەیەکی دڵسۆز و نیشتمانپەروەر و جێگەی ڕێزی خەڵکی کوردن و لە هەر بوارێکەوە کە بۆیان لوابێ خزمەتیان بە کورد و کوردستان کردووە و بە تایبەت لە بواری هونەریدا خزمەتێکی بەرچاویان بە فەرهەنگی کورد کردووە.
بنەماڵەی ماملێ وێرای خزمەتی هونەری چەند کەسیان لە نێوڕیزەکانی حیزبی دێموکڕاتی کوردستاندا خزمەتێکی بەرچاویان بە شۆڕشی گەلەکەمان کردووە و کوڕێکی نەمر محەممەد ماملێ بە ناوی نەجات ماملێ لەگەڵ ٥٨ لاوی مەهابادی لەلایەن بەکرێگیراوانی ڕێژیمی کۆماری ئیسلامیی ئێرانەوە و بە فەرمانی فەرمانداری ئەوکاتی مەهاباد جەلاییپوور و سپای پاسدارانەوە لە سیدارە درا.
لەلایەن سکرتاریای یەکێتی لاوانی دێموکڕاتی ڕۆژهەڵاتی کوردستانەوە سەرەخۆشی خۆمان ئاراستەی بنەماڵەی بەڕێزی ماملێ و خزم و کەس و کاری و خەڵکی مەهاباد دەکەین و خۆمان بە شەریکی خەمیان دەزانین.
بۆ خوێندنەوەی ژیاننامەی کۆچکردو لێرە کرتە بکە.
وێنە:ماڵپەڕی ماملێ