لەو رۆژە جیهانییەدا پەیامی ئێمە بۆ نەتەوە یەکگرتووەکان و سازمانەکانی سەر بەو ناوەندە نێودەوڵەتییە روونە، نەتەوەیەکگرتووەکان دەبێ باش بزانێ کە متمانە بەو ناوەندە و رێکخراوەکانی، لە بیر و رای گشتی جیهاندا کاڵ بۆتەوە و ئەم رێکخراوە نەیتوانیوە لە بوارەکانی تەندروستی، ژینگەیی، ئاشتی جیهانی و مافی نەتەوەکان دەوری خۆی بگێڕێت و هەر ئەمەش وایکردووە ئەم رێکخراوە لە روانگەی جیهانیان بێ متمانە دەرکەوێت. لە دۆخێکدا کە لە رۆژهەڵاتی کوردستان مامۆستای قوتابخانە بە تاوانی وتنەوەی زمانی کوردی حوکمی دەساڵ زیندانی بەسەردا دەسەپێندرێت و لاوانی کورد دەخرێنە زیندانەکان و کۆبونەوەی دیالۆگ و پرس و راگۆڕینەوەی شارستانی لەسەر دۆخی جیهان و ئیران دەبێتە ئامانجی موشەکەکانی سپای پاسداران، ئەو رێکخراوە و ئۆرگانەکانی بۆ بێدەنگی هەڵدەبژێرێن و تاکەی بەتەمان مەرگی خەڵکی ئێران و کوردستان بەچاوی خۆیان ببینن؟
دەسەڵاتی ناوەندیی تاران زیاتر لە یەک سەدەیە هەوڵ دەدات لە رێگای دروستکردنی ناسنامەی ناڕاستی ئێرانی و تەبلیغ بۆ ئەو ناسنامەیە، لە رێگای میدیا و ئۆرگانیزمی ژێر دەسەڵاتی خۆی پرسەکانی ئێوە لاوان دیزە بە دەرخۆنە بکات . ئەم رێژیمە بە پەرەدان بە بێکاری و هەڵوەدا کردنی ئێوەی لاوان بۆ دەرەوەی وڵات و تووشکردنتان بە ماددەی هۆشبەر، دەیهەوێ وزەی لاوانەتان و بوونتان وەک سەرمایەی ئینسانی نەتەوەی کورد بەفێڕۆ بدات و دوورتان بخاتەوە لە گەڕان بەدوای هۆوییەتی میللی و ئارستەدان بە کۆمەلگا و گەڕان بەدوای تێکۆشانی قۆناغی لاوەتی. ریژیم دەیهەوێ بیرکردنەوەی لاوانەتان لەو قۆناغەی ئێستاتان بەڵاڕێدا ببات. ئێمە پێمان وایە لەگەڵ ئەوەی کە رێژیم بەشێک لەو پیلانانەی جێبەجی کردوە لە رێگای کەڵکاژۆ لە ئاستی لاوازیی هوشیاریی بەشێک لە لاوان، بەڵام بە خۆشیەوە نەیتوانیوە بیرۆکەی تێکۆشان لەناو لاوانی کورد بە بۆنبەست بگەیەنێت. بە خۆشیەوە دەبینین رۆژ بە رۆژ هەنگاو نانی لاوان بەرەو رزگاری نەتەوەیی و تێکۆشان بۆ ژیانێکی ئازاد کە تێیدا لاوان بتوانن کارامەیی خۆیان لە بواری جۆراوجۆردا بۆ خزمەت بە نیشتمانەکەیان بخەنە گەڕ، لەرێگای تێکۆشانی مەدەنی بەربڵاو و هاوپێوەندی و بەشداری مەعنادار لە کایە کۆمەڵایەتیی و هەرەوەزە نێشتیمانییەکان، لەپەرەسەندن دایە.
لەو رۆژە جیهانییەدا و هەروەها لەبەرەبەری یادی ٧٥ساڵەی دامەزرانی حیزبە خۆشەویستەکەی کۆمەڵانی خەڵکی کوردستان واتا حیزبی دێموکرات، پێویستە هەموو لایەک ئاوڕێکی جدی لە خەبات و تیکۆشانی خۆمان بدەینەوە، نەتەوەی کورد بۆ بەدەست خستنی مافەکانی لە رۆژهەڵات نرخی زۆری داوە و لەو رێیەدا هەزاران شۆڕەلاوی لە مەیدانی خەباتدا لەدەستداون و یەکیەتیی لاوانی دێموکراتی رۆژهەڵاتی کوردستانیش لەو بارەوە کەمی نەهێناوە و لاپەڕەکانی مێژووی فیداکارانەی نەتەوەکەمانی بە خوێنی ئەندامانی بە ئەمەگی خۆی نووسیوەتەوە. ئەرک و رەسالەتی خەبات کە لەوانەوە بۆ ئێمە ماوە پێمان دەڵێ کە دەبێ لەو قۆناغەدا زیاتر لە هەموو کات ئێحساسی مەسئولیەت بکەین، ئێحساسی مەسئولیەت لەهەمبەر نەتەوە و خاک دەبێ زیاتر لە هەموو کات لە تێکۆشانی لاواندا رەنگ بداتەوە، تەجروبە نیشانی داوە کە بەربڵاوی و ئاڵۆزی لە گوتار و لە رێکخستندا ناتوانێ بمانگەیەنێتە هیچ کوێ، بۆیە پێمان وایە بۆوەی باشتر پرسەکانی نەتەوەکەمان بە دنیا بناسێنین و دەنگمان باشتر ببیسترێت، پێویستمان بە یەک ئادرەسی روون و جدی هەیە بۆ کورد لە رۆژهەڵاتی کوردستان، ئەو ئادرەسە روون و جدییە بە دڵنیایەوە دێموکراتێکی یەکگرتوویە کە لە ریزەکانی خۆیدا کچان و کوڕانی کورد هەر لە لۆرستان و ئیلام و کرماشانەوە تا سنە و ورمێ و خوراسان لە خۆیدا جێ بکاتەوە. دێموکراتێک کە هەم هیوا بەخش بێت و هەمیش لە کوردستان و دەرەوەی وڵات لاوان لەژێر یەک ئاڵا و یەک رێبازدا کۆبکاتەوە، ئاواتی هەموو دڵسۆزانی کوردە کە بە خۆشیەوە لەو قۆناغەدا جدییەتێک دەبنیرێ بۆ جێبەجیکردنی ئەو کارە مێژووییە. بەو هیوایە کە لاوانی کورد لەسای تەبایی نێوان کورد بتوانن خەونەکانیان لەگەڵ خەونی سەربەستیی نیشتمان وەدی بێنن.
سەرکەوێ خەباتی رزگاریخوازی نەتەوەی کورد بە بەشداری لاوانی شۆڕشگێڕ
