لە ڕۆژی تایبەت و پڕشکۆی ١٢ی بانەمەڕ، ڕۆژی شەهیدکرانی تێکۆشەری نەمر سمایل شەریفزادە و ڕۆژی خوێندکاری کورد، گەرمترین پیرۆزبایی خۆمان ئاراستەی ئێوە هاوڕێیانی هاوخەبات دەکەین.
شەهید سمایل شەریفزادە، وەک خوێندکارێکی بوێر و نیشتمانپەروەر، بوو بە هێمای خەباتی نەتەوەیی و خوێندکاری کوردی. شەریفزادە لە ساڵی ١٣٤٧ی هەتاوی (١٩٦٨ی زایینی) لە ڕێگای ئازادی و سەربەخۆیی گەلەکەمان، ژیانی خۆی بەخت کرد و بوو بە چرایەکی ڕووناک لە مێژووی خەباتی ڕۆژهەڵاتی کوردستاندا.
ئەمڕۆ، پاش ٥٧ ساڵ لە شەهیدبوونی، خەباتی نەتەوەیی و دێموکراتیکی گەلی کورد بەردەوامە و خوێندکاران پێشەنگی ئەم خەباتەن. یەکیەتیی خوێندکارانی دێموکراتی کوردستان، وەک ڕێکخراوێکی پێشەنگ، بە درێژایی مێژوو ڕۆڵێکی بەرچاوی لە بزووتنەوەی ڕزگاریخوازی کورددا هەبووە و هەروا بەردەوامە لە خەبات لە پێناو دابینکردنی مافە نەتەوەییەکانی گەلەکەمان.
لەم ڕۆژە پیرۆزەدا، یەکیەتیی لاوانی دێموکراتی ڕۆژهەڵاتی کوردستان، هاوپەیمانی خۆی لەگەڵ ئێوە دووپات دەکاتەوە و پێداگری لەسەر پتەوکردنی پەیوەندی نێوان هەردوو ڕێکخراوەکەمان دەکات. ئێمە دڵنیاین کە بە یەکگرتوویی و هاوکاری نێوانمان، دەتوانین ڕێبازی شەهیدان و خەونی ئازادی گەلەکەمان بەدی بهێنین.
سڵاو لە گیانی پاکی شەهید سمایل شەریفزادە!
بەرز و پیرۆز بێت ١٢ی بانەمەڕ، ڕۆژی خوێندکاری کورد!
سەرکەوتوو بێت خەباتی یەکگرتووی گەلەکەمان بۆ ئازادی و دێموکراسی!
یەکیەتیی لاوانی دێموکراتی ڕۆژهەڵاتی کوردستان
١٢ی بانەمەڕی ٢٧٢٥ی کوردی
٢ی مای ٢٠٢٥ی زایینی
