لاوانی شۆڕشگێڕ و نیشتمانپەروەری کوردستان!
ئەندامان و لایەنگرانی یەکیەتیی لاوانی دێموکراتی ڕۆژهەڵاتی کوردستان!
هەروەک ئاگادارن ٢١ی گەلاوێژی هەموو ساڵێک کۆمەڵگای نێونەتەوەیی یادی ڕۆژی جیهانیی لاوان بەرز ڕادەگرن کە نەتەوەیەکگرتووەکان بڕیاریدا بۆ دیاریکردنی ڕۆژێک بۆ لاوان لەسەرجەم وڵاتان.
بێگومان لە وڵاتانی پێشکەوتوو ئەو ڕۆژە جێژن دەگرن و لاوان بە چالاکی جۆراوجۆر ئەو یادە بەرز ڕادەگرن.
مخابن لە ئێرانی ژێر دەستی کۆماری ئیسلامیدا بە هۆی ئەوەیکە ژینگەیەکی ساخڵەم و تەندروست بۆ گەشەی لاوان بوونی نییە، لاوان بە هۆی بێکاری و بێ دەرەتانی و پەیدا کردنی بژێوی ژیانیان لە یادکردنەوەی ئەو ڕۆژە بێبەشن و، بگرە زۆربەی لاوانی ئێران و کوردستان ئێستاکە شایەد نەزانن ڕۆژێک بەم ناوە دیاریکراوە!
دەسەڵاتی سەرەڕۆی کۆماری ئیسلامی کە هیچ دەرفەتێکی بۆ تێکۆشانی لاوان لە بوارە جۆراوجۆرەکاندا نەڕەخساندووە و ئامادە نییە ئاوڕ لە پرسی لاوان و خوێندەوارانی ناوخۆی ئێران بداتەوە، لەوپەڕی ڕووهەڵماڵاوی خۆیدا خەریکە سامانی سەر زەوی و ژێر زەوی ئێران بۆ پەروردەکردنی گرووپە میلیشیاکان لە ئەفغانستان و عێراق و لوبنان و سووریا و یەمەن و فەلەستین تەرخان دەکات و دەرفەتی ژیانێکی ئارامیی لە لاوانی ئەو وڵاتانەش ئەستاندۆتەوە.
ڕێژیمی کۆماری ئیسلامی کە ماددەی هۆشبەر بە سیستماتیک لەناو لاواندا بڵاو دەکاتەوە و لە بری دروست کردنی کارخانە و دروست کردنی هەلی کار بۆ لاوان، لەلایەک بۆتە هۆکاری دەرپەڕاندنی لاوانی خوێندەوار لە کوردستان کە ئەمەیان کارەساتی مرۆییی لێکەوتۆتەوە و بە دەیان لاوی کوردستان لە ڕێگای گەیشتن بە وڵاتانی ئورووپایی گیانیان لەدەستداوە، لەلایەکیش ژیانی ئەو لاوانەی کە لە زێدی خۆیان ماونەوە ڕووبەڕووی چەرمەسەری دەکاتەوە و مەجبورن بۆ بژێوی ژیان ڕووبکەنە “کۆڵبەری” کە ئەمەش کایەکردنە بە ژیانی تاکی کورد.
لاوانی شۆڕشگێڕی ڕۆژهەڵاتی کوردستان!
هەروەک دەزانن سیستمی جاشایەتی فکری یەکێک بووە لەو ئامرازانەی کە کۆماری ئیسلامی لەسەرەتای هاتنە سەرکاری خۆی بۆ کۆنتڕۆڵی کوردستان کەڵکی لێ وەرگرتووە و بەداخەوە بەشێک لە لاوانی کورد لە داوی بەڵێنە درۆیەکانی کۆماری ئیسلامی کەوتوون و بەرامبەر بە شۆڕشگێڕانی کورد دەستیان داوەتە چەک، یان لە ڕێگای سیخووڕییەوە تێکۆشەرانی کوردیان خستۆتە داو کە نموونەی ئەم دواییانە تێرۆری هاوڕێ مووساباباخانی ئەندامی کۆمیتەی ناوەندی حیزبی دێموکراتی کوردستان بوو.
ئێمە وەک یەکیەتیی لاوانی دێموکراتی ڕۆژهەڵاتی کوردستان، بانگ لەسەرجەم لاوانی شۆڕشگێڕی کورد دەکەین کە بۆ بەدەستهێنانی مافی چارەنووس و پاراستنی شوناسی نەتەوەییان، پشتیوانی لە حیزبی دێموکراتی کوردستان بکەن و ببنە پارێزەری خاک و پێشمەرگەی کوردستان.
لاوانی ورەبەرزی کوردستان دەبێ هوشیارتر بن و بزانن کە ڕێژیمی کۆماری ئیسلامی لەدوا ساتەکانی تەمەنی خۆی هەوڵدەدات بە تێرۆر و شەهید کردنی بژاردە شۆڕشگێڕەکانی کورد ئیرادەی خەبات و تێکۆشانی ئێمە کپ بکات، بەڵام بێ ئاگایە لەوەی کە لە بری هەر هاوڕێیەکی شەهیدمان، دایکان و باوکانی کوردستان بە سەدان لاو بۆ ڕیزی پێشمەرگە دەنێرن و ئیزن نادەن سەنگەری خەباتی شۆڕشگێڕانی کورد چۆل بێت.
لاوانی دڵبرینداری کوردستان!
لەدۆخێکدا کە کۆماری ئیسلامی سڵ لە یاسا و ڕێسا نێودەوڵەتییەکان ناکاتاوە و بێ باکانە تێرۆری کردۆتە ناسنامەی خۆی، ئەوە مافێکی ڕەوایە کە ئێوەش بۆ جێبەجیکردنی دادپەروەری پەنا بۆ تۆڵە کردنەوە ببەن.
ئەستاندنی تۆڵەی شەهیدان کردەوەیەکی شۆڕشگێڕانەیە کە لە بۆشایی دادگەریدا، بژاردەیەکی گونجاوە کە لاوانی کورد نابێ لەبیری بکەن.
روحی شەهیدان شاد بێت
ڕۆژی جیهانی لاوان بە ئەستاندنەوەی تۆڵەی خوێنی شەهیدان پیرۆز بکەن
هەردەم سەربەرز و سەرکەوتوو بن
یەکیەتیی لاوانی دێموکراتی ڕۆژهەڵاتی کوردستان
کۆمیتەی بەڕێوەبەریی گشتی
21/05/1400 – 12/08/2021
