پەیامی یەکیەتییەکانی لاوانی دێموکرات بەبۆنەی ڕۆژی جیهانیی لاوان
“داهاتوو بۆ ئێمەیە”
لاوانی شۆڕشگێڕی کوردستان!
خەڵکی نیشتمان پەروەری کورد!
ساڵی ١٩٩٩ ڕێکخراوی نەتەوە یەکگرتووەکان و بە گشتی کۆمەڵگای جیهانی ڕۆژی ١٢ی ئاگۆستیان بۆ ڕۆژی جیهانیی لاوان دیاری کردوە. دیارە هەر کام لە وڵاتانی جیهانیش بۆخۆیان ڕۆژێکیان بۆ لاوان دیاری کردووە. کە ئامانج لەو کارە وەبیرهێنانەوەی تێکۆشانی لاوانە وەک داینەمۆی کۆمەڵگا و ئاوڕدانەوەیە لە ویست و داخوازییەکانی ئەم توێژە کە خاون ئیرادە و توانای تایبەتن بۆ پێشکەوتن و بونیاتنانی داهاتوویەکی گەش. لە ڕۆژێکی وەهادا دەرفەتە تاکوو بەربەستەکانی بەردەم توێژی لاوان خەسارناسی بکرێن و ڕەهەندە کاریگەرەکانی بەشداری لاوان لە کاروباری کۆمەڵایەتی، سیاسی، ئابووری و سەرجەم بوارەکانی دیکە گەنگەشە بکرێن.
خەباتی نەتەوایەتیی کورد لەپێناو بەدەستهێنانی مافەکانی و هەروەها بەمەبەستی پێکهێنانی کۆمەڵگایەکی ئازاد و دێموکراتیک و یەکسان بە ڕەچاوکردنی پڕەنسیپەگەلی مرۆڤتەوەرانە، سەرجەم چین و توێژەکانی کۆمەڵی کوردەواری لە ڕەوتی بەرەوپێشبردنی کۆمەڵگا و هەروەها گەیشتن بە ئامانجەکانی خۆی بەشدار و ئەرکدار کردوە.
لەم نێوەدا دەبێت بە سەرنج و وردبینی زیاتر ئاوڕ لە توێژی لاوان بدەینەوە کە وەکوو داینامۆیەک بۆ پێشڤەچوون و سەرکەوتنی وڵات لە هەموو بوارەکاندا چالاکانە بەشدارن.
بە ئاوڕدانەوە لە مێژووی کورد بە تایبەتی لەسەدەی ڕابردوو، بە باشی بۆمان دەردەکەوێت کە لاوان توێژیکی کاریگەر بوون لە ڕەوتی خەباتدا و بە شێلگیری و فیداکاری خۆیان شوێن پەنجەیەیان بە تێکۆشانی نەتەوەییەوەدیارە.
جەماوەری خۆڕاگری خەڵکی کوردستان!
ئێمەی لاوانی کورد سەلماندوومانە کە تەنیا لە چوارچیوەی تیئۆری و درۆشمدا قەتیس نەماوین، بەڵکوو بە شێوەی کرداری لە مەیدانداین و بە باوەڕ و بە ئەندێشە و ئیرادەیەکی بەرز ئامادەین بۆ سەرخستنی کۆمەڵگای کوردەواری.
ئێمەی لاوانی کورد وەکوو توێژێکی پڕداخوازی و ئایدیا و خولیای بەرز بە هۆی ئەویکە وڵاتەکەمان لە ژێر دەستی داگیرکەردایە و لە مافەکانمان بێبەری کراوین، بەنیسبەت وڵاتانی پێشکەوتوو و دێموکراتیی جیهان لە دۆخێکی جیاوزداین، هەر بۆیە بەڵێن دەدەین کە نە تەنیا بۆ توێژی لاوان بەڵکوو بۆ هەموو کۆمەڵگای کوردەواری لە تێکۆشان و خەبات بەردەوام دەبین و بەڵێن دەدەین هەموو تواناکانمان بخەینە گەڕ بۆ سەرخستنی کورد و کوردستان.
لاوانی خوێنگەرمی دێموکرات لە ڕۆژهەڵاتی کوردستان!
ئێمەی لاوانی دێموکرات یەکگرتووییمان کردۆتە بنەمای تێکۆشان و بەڵێن دەدەین نەتەوە و نیشتمان بۆ ئێمە لەسەرەوی هەموو بابەتێک بێت و هێڵی سوورمان تەنیا سەربەخۆیی وڵاتەکەمان بێت.
بە لەبەرچاو گرتنی ئەوەیکە بەربەستەکانی بەردەم لاوانی کورد گرێدراوە بە مافە ئینسانی و دمۆکراتیک و نەتەوەییەکان، ئامادەین کە وەکوو هەمیشە هاوکار و پاڵپشتی هەموو چین و توێژەکان بین و ئەو چاوەڕوانییەشمان بۆ پاڵپشتی کردن لە هەموو چین و توێژەکان هەیە.
ئێمە لاوانی کورد دڵنیاین و بەڵێن دەدەین هەتا سەرکەوتنی نەتەوەکەمان لە مەیدانداین و هیچ بەربەستێک ناتوانێت ڕێگرمان بێت بۆ پێشکەوتنی کۆمەڵگای کوردەواری و دڵنیاین کە داهاتوو بۆ ئێمەیە.
بەرز و پیرۆز بێت ڕۆژی جیهانی لاوان
هەر شەکاوە بێت ئاڵای بەرز و پیرۆزی کوردستان
یەکیەتییەکانی لاوانی دێموکرات
یەکیەتیی لاوانی دێموکراتی ڕۆژهەڵاتی کوردستان
یەکیەتیی لاوانی دێموکراتی کوردستانی ئێران
٢١ی گەلاوێژی ١٤٠١
١٢ی ئاگۆستی ٢٠٢٢