لاوانی شۆڕشگێڕی رۆژهەڵات!
ئەندامان و لایەنگرانی یەکیەتیی لاوان!
رۆژی ١٢ی ئاگۆست واتا ٢١ی گەلاوێژ لەلایەن نەتەوەیەکگرتوەکانەوە بەرۆژی جیهانی لاوان دیاری کراوە
و لاوان لە وڵاتانی دنیا لەو رۆژەدا بە تێکۆشان و چالاکی خۆیان تەعبیر لە لاویەتی و وزە و تواناکانیان دەکەن و خۆیان بۆ چوونە ناو پڕۆسەی گەورەتر لە کۆمەڵگا ئامادە دەکەن.
دیاری کردنی رۆژێک لە رۆژەکانی ساڵ لەلایەن نەتەوەیەکگرتووەکانەوە بێگومان بێ فەلسەفە و بێ ئامانج نەبوە و گەورەترین هۆکاری دەستنیشانکردن رۆژێک بۆلاوان دەکرێ ئەوە بێ کە لاوان هیزی سەرەکی و بزوێنەری کۆمەڵگان و سەرەداوی هەموو ئاڵوگۆڕ و شۆڕشێک لە دنیادا دەگەرێتە لای لاوان.
لاوانی شۆڕشگێڕی رۆژهەڵات!
ئێمە لەسەردەمێکدا بەرەوپیلی رۆژی جیهانی لاوان دەچین کە لاوانی کورد لە ژێر دەسەڵاتی حکومەتی ئیسلامی ئێران بێبەشن لە ماف و ئازادییە سەرەتاییەکانیان و لەجیاتی ئەوەی وێڕای لاوانی جیهان فێستیواڵ و چالاکی بەڕێوەببەن، بەداخەوە ئەو رۆژە جیهانییە لەلایەن دەسەڵاتی سەرکوتکاری ئێران بەردی لەسەر دانراوە و ئیزن نادرێت لەو رۆژەدا لاوان ئێحساسات و هەستی نەتەوەیی و لاوانەی خۆیان دەرببڕن. و رێژیمی ئێران بە پڕکردنی زیندانەکان لە هێزی لاو و تێکۆشەرانی سیاسی لەلایەک و لەلایەکیش بە هەوڵدان بۆ پەرەئەستەندنی سیستمی جاشایەتی فکری و جەستەیی و بڵاوکردنەوەی سیستماتیکی مادەی هۆشبەر و بە چاوپۆشی لە چالاکی هێزە سەلەفییە تەکفیرییەکان ،هەوڵی داوە لاوانی کورد بەرەو هەڵدێر ببات و بەداخەوە لەم سیاسەتەیدا تا ئاستێک سەرکەوتوو بوە.
لاوانی رزگاریخوازی کورد!
ئێوە زۆرجار سەلماندووتانە هەوێنی شۆڕشێکی گەورەن و زۆر جار بە تێکۆشانی خۆتان ئەو پەیامەتان بە ئێمە گەیاندووە، ئێوە بە چالاکی وەرزشی و شاخەوانی و دروستکردنی گرووپی ژینگە پارێزی و بردنە سەری ئاستی هوشیاری سیاسی و نەتەوەیی و هەروەها بە تێکۆشان لە زانکۆکاندا بەرپەرچی سیاسەتەکانی رێژیمی ئێرانتان داوەتەوە و سەلماندووتانە چەندی رێژیم هەوڵی کپ کردنی ئیرادەی لاوانی کوردی هەبێ، دە هێندەش ئیرادەی لاوی کورد بەرزە لە ئاست ئەم سیاسەتە.
هەر لەم سۆنگەیەوە و بەبۆنەی رۆژی جیهانی لاوان یەکیەتیی لاوان هەڵمەتی دژی مادەی هۆشبەر رادەگەیەنێت لە رۆژهەڵاتی کوردستان و داوا لە لاوانی کورد بە گشتیی و ئەندامان و لایەنگرانی یەکیەتیی لاوان دەکەین کە پەیوەستی ئەم هەڵمەتە بن و لەپێناو هوشیاری و رزگاری لاوانی کورد، لەئاستێکی بەریندا چالاکی بنوێنن. لاوانی کورد لە رۆژهەڵات پێویستە زیاتر لە جاران لە مەیدانی مافخوازی دا دیار بن و نیشانی بدەن کە لەهەمبەر مافەکانیان بێدەنگ نابن و سیاسەتی زۆرە ملی و سەپێندراوی رێژیمی ئێران قەبوڵ ناکەن.
سەرکەوێ ئیرادەی لاوانی شۆڕشگێڕی کورد
بەرز و پیرۆز بێ رۆژی جیهانی لاوان
یەکیەتیی لاوانی دێموکراتی رۆژهەڵاتی کوردستان
کۆمیتەی بەڕێوەبەریی گشتیی
7/8/2017