هاونیشتمانیانی ئازادیخواز!
نەتەوەی ئاشتیخواز و مافویستی کورد!
لاوان، ژنان و خوێندکارانی شۆڕشگێڕی نیشتمان!
٧٨ ساڵ بەر لە ئێستە، لە کاتێکدا کە هێشتا ڕێکخراوی نێوەنەتەوەیی بۆ کۆتاییهێنان بە شەڕ و پێشێلکردنی مافی خەڵکی بێدەسەڵات دانەمەرزابوو و نزیک بە ٨ مانگ بەر لەم پێکهاتە جیهانییە، لە گۆشەیەک لە خاکی نیشتمان و لە شاری مەهاباد، دێموکراتترین حیزب لە ناوچەکە سەری هەڵدا و بوون و مانی نەتەوەیەکی بندەست و بێدەسەڵاتی بە گوێی داگیرکەران و دەسەڵاتداران ناوچەکە چرپاند.
لەو کاتەی کە تازە شەڕی ماڵوێرانکەری دووهەمی جیهانی کۆتایی پێ هاتبوو و گۆڕینێک لە ژئۆپۆلتیکی جیهان و بەتایبەت ئێران هاتبووە ئاراوە، کۆمەڵێک کەسایەتیی نیشتمانپەروەر و دڵسۆزی نەتەوەی کورد کە ۳ ساڵ پێش، بناغەی پێکهاتەیەک بە ناوی کۆمەڵەی “ژێکافـ”ـیان دانابوو، بە خوێندنەوەیەکی قووڵی سیاسی، کۆمەڵایەتی و ئابووریی کوردستان و ناوچەکە لە ۲ی ڕێبەندانی ۱۳۲٤ی هەتاوی، بە ڕێبەرایەتی و پێشەنگایەتیی “پێشەوا قازی محەممەد”، کۆمارێکی دێموکراتیک و سەروەریخوازیان ڕاگەیاند.
کۆماری کوردستان کە هەڵقوڵاوی خەون و ئاواتێکی لەمێژینە نەتەوەی کورد بوو، بە خێراییەکی کەم و بێوێنەدا لە بەشە جۆراوجۆرەکانی کوردستان دەنگی دایەوە و سەرنجی هەموو نیشتمانپەروەر و کوردێکی بەئەمەگی بۆ لای خۆی ڕاکێشا و لەو شوێنانە کە دەرفەت و هەلی بۆ ڕەخسابوو کەسایەتییەکانی کوردستانی لەم ئەزموونە نوێیەدا ئەرکدار و بەرپرس کرد.
ئەگەر ئەم کۆمارە تەمەنێکی وەهای نەبوو و هەلومەرجی سیاسی، ڕێکەوتنی حکومەتی پالەوی و یەکیەتیی سۆڤیەت و خەمساردیی و خەیانەتی هێندێ نابەرپرسی نێو کۆمار دەرفەتی ئەوەی پێ نەدا کە بەرەو ناوچەکانی دیکەی ڕۆژهەڵات شۆڕ ببێتەوە و کەم توانی درێژە بە ڕۆڵی سیاسی، فەرهەنگی و کۆمەڵایەتیی خۆی بدات، بەڵام ئاسەوار و شوێنپەنجەکانی هەتا ئێستەش بە بزووتنەوەی نەتەوەیی ـ دێموکراتیکی کوردستانەوە نەک دیارن بەڵکوو وانەکانی بوونەتە ئەزموونی خەباتی هەنووکەییمان.
ئاسەوارەکانی کۆماری کوردستان لە خەباتی ڕزگاریخوازی کورد هێندە قووڵ و کاریگەرە، هیچ ڕێکخراوێکی ناسیۆنالیزمی کورد ناتوانێت لە پێوەرە نەتەوەیییەکانی ئەم خەباتە هزری و سیاسییە لا بدات و پشتگوێی بخات، کە دەکرێت ئاماژە بە هێندێ چەمک و کەتواری حاشاهەڵنەگر بکرێت کە لە دەسکەوت و ئەنجامەکانی کۆمار لە قەڵەم دەدرێن:
ئاڵا و پێشمەرگە:
دوو بەرهەم و دیاریی کۆماری کوردستان، هێمای سەربەستی و خۆڕاگریی نەتەوەییی کوردن و بوونە هۆی ئەوەی کە ئەو عەقڵیەتە لە مێشکی تاکی کورد بیچم بگرێت کە ئێمەش وەک هەر نەتەوەیەکی سەر گۆی زەوی دەبێت خاوەن هێما و ناونیشانێکی نەتەوەیی بین و ئەو بەرپرسایەتییە لە ناخی ڕۆڵە بەئەمەگەکانی کورد دروست بکات کە لەژێر ناوی “پێشمەرگە” داکۆکی لە بوون و مانی نەتەوە و خاک و ئاڵاکەیان بکەن.
زمان ڕەمزی مانەوەی نەتەوە:
زمان، ڕەمزی مانەوەی نەتەوە و خاکێکە کە بوون و گەشەکردنی زمان بەندە بە گەشە و هەڵکشانی ئەم دوو چەمکە. نەتەوەیەک کە زمانەکەی فەوتا، بەدڵنیاییەوە خۆیشی دەفەوتێت، بۆیە پەروەردەکردنی مناڵان بە زمانی دایک لە سیاسەت و یاساکانی کۆماری کوردستان، سیاسەتێکی بنەڕەتی و گرنگ بوو و بە چاپ و بڵاوکردنەوەی ڕۆژنامە، گۆڤار و گرنگیدان بە نووسەران و شاعێرانی کورد لە دەوری کۆماری ئەم بەرپرسایەتییە بەجێ گەیاند و ئێستەش “زاراکان و سەیوانـ”ـەکان ئەم بەرپرسایەتییەیان بە ئەستۆ گرتووە.
ئازادی و دادپەروەری:
ئازادی سروشتیترین و بنەڕەتیترین مافی هەر مرۆڤێکە و هیچ مرۆڤێک بۆی نییە ئەم مافە لە هیچ مرۆڤێکی دیکە وەرگرێت و لە هەمبەر ژیانێکی ئاسوودە و خۆشگوزەران نابێت ئازادی لە هیچ مرۆڤێک بستێنرێتەوە. ئەم دوو چەمکە کە دوانەی ژیانێکی سەربەست و ڕاستەقینەی مرۆڤن، لە کۆماری کوردستان بناغەکانی پتەو و قایمیان بۆ دانرا و هەتا ئێستەش حیزبی دامەزرێنەری کۆمار ـ حیزبی دێموکرات ـ لەسەریان و لە پێناو ئازادی و بەدێهاتنی دادپەروەری بۆ کۆمەڵگای کوردستان خەبات دەکات.
گرنگیدان بە ژنان، لاوان و خوێندکاران:
ژنان کە نیوەی کۆمەڵگان و لاوان داهاتووی وڵات، و خوێندەوار و خوێندکاریش کە هەم ژنان لە خۆ دەگرێت و هەم لاوان، ڕۆڵی سەرەکیی گەشەی زانست و پێگەیشتوویی کۆمەڵگایان لە ئەستۆیە. ئەم سێ توێژە کە کۆڵەکەی کۆمەڵگان لە بەرنامە و سیاسەتی کۆمار بزر نەبوون و پشتگوێ نەخران، بۆیە بە دامەزراندنی ڕێکخراوێک بۆ ژنان “یەکیەتیی یایانی کوردستان” و بنیاتنانەوە ڕێکخراوی لاوان “ئیتحادیەی جەوانانی دێموکرات” و هەروەها “ناردنی کەسە بلیمەتەکانی کوردستان بۆ دەرەوەی وڵات”، کۆماری کوردستان لەم ڕاستایەدا بناغەیەکی پتەوی داڕشت، کە دەرئەنجامەکەی لە بەرخۆدان و ڕاسانی لاوان، ژنان و خوێندکاران لە ڕاپەڕینی “ژینا” و بزووتنەوەی “ژن ژیان ئازادیـ”ـدا دەبینینەوە.
لە کۆتاییدا وەکوو یەکیەتییەکانی لاوان، ژنان و خوێندکارانی دێموکرات، بە بۆنەی ۷٨ ـەمین ساڵیادی ڕاگەیاندنی کۆماری کوردستان؛ بە لاوان، ژنان و خوێندکارانی ڕزگاریخوازی کورد دەڵێین: کە ئەم بڕگە لە مێژووی نەتەوەکەمان بڕگەیەکی زێڕین و درەوشاوەیە و پێویستە ئامانجەکانی بە دەستی جیلی داهاتووی نیشتمانەکەمان بگات، بۆ ئەوەی لە بنیاتنانی نیشتمانێکی سەربەست و بەختەوەردا ڕەچاو بکرێن و بەم پێیە بناغەی ژیانێکی ئازاد و دادپەروەرانە دابنرێت.
بەهیوای وەدیهاتنی ئامانجی لەمێژینەی نەتەوەکەمان و بنیاتنانەوەی کۆمارێکی دیکەی کوردستان!
یەکیەتییەکانی لاوان، ژنان و خوێندکارانی دێموکرات
۲ی ڕێبەندانی ۲۷۲۳ی کوردی
