ناوەندی هەواڵ- سویس: ٢ی ڕێبەندان ٧١هەمین ساڵەوەگەڕی یەکەمین حکومەتی سەربەخۆی کوردستان لە وڵاتی سویس و بە بەشداری کۆەمەڵێکی زۆر لە ئەندام، لایانگر و دۆستانی حیزبی دیموکراتی کوردستان، و دەیان کەس لە نەتەوە جیاوازەکانی دیکەی ئێران، نێشتەجێ لەو وڵاتە، لە لایەن کومیتەی حیزبی دیموکراتی کوردستانە و بە هاوکاری یەکێتییەکانی ژنان و لاوان پیرۆز کرا.
ڕۆژی یەکشەممە ڕێکەوتی ٢٩ی جانیواری ٢٠١٧ی زایینی، ڕێوڕەسمێکی پڕ شکۆ سەرەتا بە سروودی نەتەوایەتی ئەی رەقیب کە لە لایان کۆڕی سروودی لاوانەوە پێشکەش کرا و خولەکێک بێدەنگی بۆ ڕێزگرتن لە شەهیدانی بزووتنەوەی ڕزگاریخوازانەی گەلەکەمان دەستی پێکرد. پاشان پەیامی کومیتەی کومیتەی سویس لە لایەن هاوڕی زاهید شاعیری، بەرپرسی کومیتەوە پێشکەش کرا. پاشان خاتوو تەوار ئەبرووزەنی پەیامی یەکێتی ژنانی دیموکراتی کوردستان و کاک ڕێبوار مووسەوی پەیامی یەکێتی لاوانی دیموکراتی ڕۆژهەڵاتی کوردستانیان لە سویس خوێندەوە.
هاوڕێیان ڕەحمان ئیبراهیم زادە، هێمن بێتووشی و کەمال ماملێ، بە خوێندنەوەی چەند پارجە هۆنراوەیەک چێژێکی زیاتریان بەخشییە ڕێورەسمەکە. بە دوای ئەوە دا کۆڕی هەڵپەڕکێی یەکێتی لاوانی دیموکرات، چەند پارچە هەڵپەڕکێیەکی جوانیان پێشکەش کرد.
پاشان نۆبە گەێشتە پەیامی حیزبی و ڕیکخراوە بەشدارەکان و لەو بەشەش دا هەر یەکە لە:
– یەکێتی نیشتمانی کوردستان
– بزووتنەوەی گوڕان
– یەکێتی دیموکراتی کورد لە سوریە
– سازمانی خەباتی کوردستانی ئێران
– حیزبی شیوعی کوردستان
پەیامەکانی خۆیان بەو بۆنەوە پێشکەش کرد.
بەشی کۆتایی ئاهەنگی ٢ی ڕێبەندان تەرخان کرا بۆ شایی و هەڵپەڕكی کە لەو بەشەش دا گۆرانیبێژانی دەنگ خۆش محەممەد بۆکانی، سیروس ئیمامی و نازێ عەزیزی بە چەندین گۆرانی خۆش و ڕەسەنی کوردی شەو ئاهەنگەکەیان خۆشتر و ڕازاوەتر کرد و ئامادە بووانیش تا درەنگای شەو بە هەڵپەڕکێ و شایی شەو ئاهەنگەکەیان بەڕێ کرد. پێویست بە ئاماژەیە کە پێشکەشکاری بەرنامەکە خاتوو شادی ویجدانی بە خوێندنەوەی چەندین پارچە هۆنراوە و پەخشانی شۆڕشگێڕانە و تایبەت بەو ڕۆژە مەزنە، ڕێوڕەسمەکەی بە جوانترین شێوە بەڕێوەبرد.
کومیتەی حیزبی دیموکراتی کوردستان- سویس
وێنەکانی ئەو ڕێوڕەسمە لێرەوە ببینە
