بێری شەڵماشی لە ساڵانی ڕابردوودا و بەتایبەت لە دەسپێکی شۆڕشی ژیناوە تا ئێستا بە بەردەوامی هەوڵی داوە بە نووسین و دەرکەوتن لە میدیا جۆراوجۆرەکانی وڵاتی هولەند و وڵاتانی دیکە، پرسی کورد بەگشتی و بەتایبەت پرسی ژنان لە کوردستان بوروژێنێ.
ناوبراو لە زۆربەی نووسین و دەرکەوتنە میدیاییەکانیدا ڕاشکاوانە باسی لە سیاسەتی سەرکوت و هەڵاواردنی ڕێژیمی کۆماری ئیسلامیی ئێران بەرانبەر بە خەڵکی مافخوازی کوردستان و ژنان کردووە.
بێری شەڵماشی یەکێک لە سینەماکارانی کوردە کە وێنە و بەرهەمەکانی لەلایەن میدیا جیهانییەکانەوە بە گەرمی پێشوازییان لێ دەکرێ و بڵاو دەبنەوە.
ئەم کچە کوردە سەبارەت بە کاندیدبوونی خۆی بۆ وەرگرتنی خەڵاتی ژنی میدیایی ساڵ لە وڵاتی هولەند وێڕای داواکاری بۆ بەشداریی خەڵکی هولەند و بەتایبەت هاونیشتمانییانی کورد لەم هەڵبژاردنە، ڕایگەیاند: وەرگرتنی ئەم خەڵاتە دەبێتە هۆی ئەوەی بە هێزێکی زیاترەوە لەم ڕێگایە بەردەوام بم و خزمەت بە خەڵکەکەم بکەم.
