پاشنیوەڕۆی رۆژی هەینی ٢٧/١/٢٠١٧ لە سکرتاریای یەکیەتیی لاوان شاندێکی یەکیەتیی لاوان بەسەرپەرەستی پێشەوا عەلی پوور سکرتێری گشتیی رێکخراو پێشوازی کرا لە شاندێکی کۆما جڤانێن کوردستان بە سەرپەرستی هەڤاڵ مانی.
شاندی یەکیەتیی لاوان وێڕای بەخێرهاتن کردنی شاندی میوان ئاوڕیان لە پرسگەلی لاوان لە رۆژهەڵات و باکووری کوردستان دایەوە و لەمبارەوە پێشەوا عەلی پوور سکرتێری گشتیی یەکیەتیی لاوان باسی لە کۆمەلێک بابەتی سیاسی و کۆمەڵایەتی تایبەت بە لاوان کرد لەم سەردەمەدا، پێشەوا عەلی پوور وتی: بۆ ئێمە وەک یەکیەتیی لاوانی دێموکراتی رۆژهەڵاتی کوردستان گرنگە کە لەم دۆخەدا رێکخراوەکانی لاوان لێک نزیک بن و هاوکار و هاوئاهەنگ بن لە بەرەو پێشبردنی دۆزی لاوانی کورد لە هەموو بەشەکانی کوردستان و ئێمە وەک یەکیەتیی لاوان پشتگیری رێکخستنە مەدەنیەکانی ناو رۆژهەڵات دەکەین کە شکڵێکی نوێیان بە تێکۆشانی مەدەنی داوە و ناسیۆنالیزمێکی مەدەنیانەیان هێناوەتە کایەوە.
پێشەوا عەلی پوور لە ئیدامەی قسەکانیدا وتی: لە کاتی راگەیاندنی کۆماری کوردستان تا شەهید بونی پێشەوا قازی تاکید لەسەر یەکگرتوویی کراوە و دەبێ بە هەموومان هێما و رەمزە نەتەوەییەکان بپاریزین وەسیەتی پێشەوا قازی بکەینە مانفێستێکی نەتەوەیی و لاوان لەسەر ئەم ریبازە خەبات و تێکۆشان بکەن و پێشمەرگە وەک چۆن لە تەنگانەدا فریای کۆبانی کەوت و پاشان بەڕێوەبردنەکەی تەحویلی خەڵکی خۆیداوە، هەر بەم روحەش دەبێ گەریلا و شەرڤان لە پاراستن و سەقامگیری و ئاوەدانی کوردستاندا ئەرک وەخۆگر بن.
پاشان هەڤاڵ مانی سەرپەرستی شاندی لاوانی پەکەکە وێڕای بە پۆزێتیڤ زانینی باسەکانی یەکیەتیی لاوان وتی: ئێمە وەک لاوانی پەکەکە وێڕای بەداخبوونمان لە تێڕۆری تێکۆشەران و پێشمەرگەکانی دێموکرات لە شەوی یەڵدا ، ئەو تێرۆرە مەحکوم دەکەین و بەهەموومان دەبێ بەرپەرچی پلانەکەنی دوژمنان بدەینەوە، ئێمە مێژویەکی هاوکاریمان هەیە لەگەڵ یەکیەتیی لاوان و وێڕای پشتیوانی کردن لە تێکۆشانی ئێوە، خوازیارین کە کۆنفڕانسی چوارەمی لاوان بۆ هەرچواربەشی کوردستان لەم دۆخەدا دەست پێبکەینەوە و هەروەها ئاکادێمیایەکی هاوبەش بۆ لاوانی کورد پێکبهێنین کە لەوێدا لاوان بە بیری نەتەوەی پەروەردە و رێکخستن بکرێن.
شاندی یەکیەتیی لاوان وێڕای پشتگیری دەربڕین بۆ ئەم دوو پڕۆژەیە کۆمەڵێک بابەتی دیکەیان هێنا گۆڕی و لەوانە میدیایەکی تایبەت بە لاوان کە لەودا بە روونی هێما و سیمبولە نەتەوەیەکان بکەنە نموونەی تێکۆشان بۆ لاوانی کورد و رێز لە هەموو فرەچەشنی سیاسی بگیرێت لە هەموو پارچەکانی کوردستان.