سەر لە ئێوارەی ٣٠ی سەرماوەزی ١٤٠٣ی هەتاوی، بە دەسپێشخەری کۆمیتەی ئاگریی یەکیەتیی لاوانی دێموکراتی ڕۆژهەڵاتی کوردستان، ڕێوڕەسمێڪی بەشکۆ تایبەت بە شەوی یەڵدا شەوی لەدایکبوونی ڕێبەری ناوداری میللەتی ڪورد دوکتور قاسملوو لە مەڵبەندی ١ی کوردستان بەڕێوەچوو.
سەرەتای ڕێوڕەسمەکە بە سروودی نەتەوایەتی ئەی ڕەقیب و چەند ساتێڪ بێدەنگی بۆ ڕێزگرتن لە گیانی پاکی شەهیدانی کورد و کوردستان دەستی پێڪرد.
ـ دواتر “سیبەل خوبایی” پێشکەشکاری ڕێوڕەسمەکە بەنوێنەرایەتیی کۆمیتەی ئاگریی یەکیەتیی لاوانەوە، بەخێرهاتنی سەرجەم میوانەکانی کرد.
ـ پاشان پەیامی یەکیەتیی لاوانی دێموکراتی ڕۆژهەڵاتی کوردستان لەلایەن هاوڕێ “شیوا مورادیان”بەرپرسی ڕاگەیاندنی ڕێکخراو پێشکەشی بەشداربووان کرا، شیوا مورادیان لەسەرەتادا وتی : ” ئەمڕۆ لێرە کۆبوینەتەوە تا لە گۆشە نیگایەکی جیاواز و لەسەردەمێکی جیاوازدا، ئاوڕ لە هزر و ڕامانی ڕێبەرێک بدەینەوە کە نیوسەدە لەوە پێش، ئەمڕۆی کوردستانی دەبینی. ڕێبەرێک کە بە درێژەدان بە خەباتی نەتەوایەتی پێشەوامان قازی محەممەد، جارێکی دیکە دەرگای خەباتی بۆ لاوانی ئەوسەردەم و ئێستاش واڵا کرد و ڕێگەی سەربەستی و سەربەخۆیی بۆ هەموار کردن. دوکتور قاسملوو ڕێبەرێکی دیار و ڕەچەشکێنیکی شوێندانەر بوو لە بزووتنەوەی ڕزگاریخوازی کورد و حیزبی دێموکرات، کە تا بە ئەمڕۆش ئایدیاکانی سەرچەشنی خەباتی سەدان هەزار لاون.”
ـ لەبڕگەیەکی دیکەی ڕێوڕەسمەکەدا سروودێک بە ناوی “ئەی قاسملوو ئەی قاسملوو” لەلایەن گرووپی سروودی یەڵدا بە سەرپەرەستی هاوڕێ “دیجلە خوبایی” پێشکەش کرا.
لە بڕگەی دواتردا شێعرێک لە ژێر ناوی ” نرخی ئازادی” لەلایەن هاوڕێ “ئاسۆ مینا” پێشکەش کرا.
پاشان هاوڕێ “عوسمان ڕەحمانی” گۆرانییەڪی بە ناوی “ژن ژیان ئازادی” پێشکەشی بەشداران کرد.
بڕگەیەکی دیکەی ڕێوڕەسم تەرخانکرابوو بە شێعری هاوڕێ “شاڕوخ حەسەنزادە” کە شێعرێکی بە ناوی “یەڵدای ئێمە” تایبەت بەم یادە پێشکەش کرد.
ـ بڕگەی دواتری ڕێوڕەسم بە پێشکەشکردنی چەند بڕگە هەڵپەڕکێ کە لەلایەن کۆڕی هەڵپەڕکێی یەڵدا و بە سەرپەرەستی هاوڕێ “پێشەوا قازی” ئامادە کرابوو، ڕازایەوە.
پاشان هونەرمەند سەیاد هەرکی گۆرانییەک بە ناوی “دیلان” پێشکەش کرد.
بڕگەی کۆتایی ڕێوڕەسم بە هەڵپەڕکێی گشتی بەشداران کۆتایی پێهات
