ڕێکخراوی IUSY داوا لە دەسەڵاتدارانی ئێران دەکات دەستبەجێ لەسێدارەدانی پەخشان عەزیزی ڕابگرن
ڕێکخراوی IUSY داوا لە دەسەڵاتدارانی ئێران دەکات دەستبەجێ لەسێدارەدانی پەخشان عەزیزی تەمەن 40 ساڵە کە توێژەری کۆمەڵایەتی کوردە ڕابگرن، پەخشان عەزیزی نزیکەی دە ساڵ لە ژیانی خۆی تەرخان کردووە بۆ پاڵپشتیکردنی ژنان و منداڵانی ئاوارەبوو بەهۆی شەڕی داعش لە ڕۆژئاڤا.
ڕۆژی پێنجشەممە، پارێزەرازنی یاسایی ئەو دووپاتیان کردەوە کە دەزگای قەزایی ئێران داواکارییەکەی بۆ پێداچوونەوە بەدادگاییکردنەوەی پەخشان عەزیزی ڕەتکردۆتەوە و لە هەمان کاتدا هەڵپەساردنی حوکمی لەسێدارەدانیشی هەڵوەشاندۆتەوە، ئەمەش بووەتە مەترسیی دەستبەجێی لەسێدارەدان. تانە لێدان لەو بڕیارە لە ماوەی کەمتر لە یەک ڕۆژیدا ڕەتکرایەوە، بەبێ ئەوەی هیچ پێداچوونەوەیەکی مانادار بە دۆسیەی کەیسەکەدا بکرێت، ئەمەش نەبوونی تەواوەتی ڕێوشوێنی یاسایی نیشان دەدات.
چەندین پسپۆڕی مافی مرۆڤی نەتەوە یەکگرتووەکان، ڕێکخراوی لێبوردنی نێودەوڵەتی و ڕێکخراوەکانی دیکە هۆشدارییان داوە کە دادگاییکردنی پەخشان عەزیزی پێشێلکردنی دادگاییکردنی دادپەروەرانەیە. سزادانی ئەو خانمە لەسەر بنەمای تۆمەتی سیاسییە نەک پرۆسەیەکی دادوەری یاسایی.
IUSY داوا دەکات دەستبەجێ دەسەڵاتدارانی ئێران:
- ١- حوکمی لەسێدارەدانی پەخشان عەزیزی ڕابگرن و مافی دادگایییەکی سەربەخۆ و دادپەروەرانە بە پێی پێوەرە نێودەوڵەتییەکانی مافی مرۆڤ دەستەبەر بکەن.
٢- دڵنیابوون لە شەفافییەتی تەواو لە ڕێوشوێنە یاساییەکانیدا بە ڕێگەدان بە چاودێرانی سەربەخۆ و ڕێکخراوەکانی مافی مرۆڤ کە دەستیان بە دۆسیەکەی بگات.
٣- کۆتاییهێنان بە بەکارهێنانی سزای لەسێدارەدان دژی زیندانیانی سیاسی و چالاکان و کەمینە نەتەوەییەکان، بەتایبەتی لەو حاڵەتانەی کە ڕێکاری یاسایی بە شێوەیەکی توند پێشێل کراوە.
IUSY هاوسۆزی تەواو لەگەڵ پەخشان عەزیزی و هەموو ئەوانەی بەهۆی چالاکیی و هەوڵە مرۆییەکانیانەوە بە ناڕەوا کراونەتە ئامانج دەردەبڕێت. ئێمە داوا لە حکومەتە نێودەوڵەتییەکان و نەتەوە یەکگرتووەکان و ڕێکخراوەکانی مافی مرۆڤ دەکەین کە ڕێکاری دیپلۆماسی و یاسایی خێرا لە دژی کۆماری ئیسلامی ئێران بگرنەبەر بۆ پێشگرتن بەم لەسێدارەدانە.
ئێمە بێدەنگ نابین لە کاتێکدا ژنێکی بێتاوان دەکوژرێت.
