نووسین: ئاسۆ ئەحمەدیان
دەمەوێت ڕوو بکەمە کۆمەڵگای کوردی و هەموو ئەو کەسانەی کە دەنگیان هەیە و گرنگی بە مافی مندالان دەدەن.
بەڕێزان،
ئەمڕۆ بە دڵێکی پڕ خەم و نیگەرانییەوە ڕوو دەکەمە ئێوە سەبارەت بە ڕووداوێکی ناخۆش کە بریتییە لە ئەشکەنجەدانی قوتابییەکی کورد لەلایەن مامۆستایەکەوە. ئەم جۆرە ڕەفتارانە دەرەنجامی ڕاستەوخۆی سیستەمی پەروەردەی کۆماری ئیسلامین کە بەردەوام مافی نەتەوەکانی کورد پێشێل دەکات.
سیستەمی پەروەردەی کۆماری ئیسڵامی لە بنەڕەتدا لەسەر بنەمای سەرکوتکردن و پەراوێزخستنی کەمینە نەتەوەییەکان، بەتایبەت گەلی کورد، دامەزراوە. ئەم سیستەمە سیاسەتی سیستماتیکی توندکردووە دژی مافی خوێندن بە زمانی دایک و ناسنامەی کولتووری کوردان. ئەشکەنجەدانی قوتابییەکی کورد نموونەیەکی بەرچاوە لەم سیاسەتە دژە کوردییە.
منداڵانی ئێمە گەورەترین سەرمایەی داهاتووی نەتەوەکەمانن. ئەوان مافی ئەوەیان هەیە لە ژینگەیەکی ئارام، دوور لە توندوتیژی و لەناو کولتوور و زمانی خۆیاندا پەروەردە بکرێن، نەک لە سیستەمێکدا کە ناسنامەیان سڕدەکاتەوە و مامۆستایان هان دەدات بۆ سووکایەتی و توندوتیژی بەرامبەریان.
داوا دەکەم:
١. کۆمەڵگای نێودەوڵەتی و ڕێکخراوەکانی مافی مرۆڤ فشار بخەنە سەر کۆماری ئیسلامی بۆ کۆتایی هێنان بە سیاسەتی دژە کوردی لە سیستەمی پەروەردەدا.
٢. مافی خوێندن بە زمانی دایک بۆ هەموو نەتەوەکان، بەتایبەت نەتەوەی کورد، دەستەبەر بکرێت.
٣. دادگاییکردنی ئەو مامۆستایانەی کە بەشداری لە توندوتیژی دژی قوتابییان دەکەن و بەرپرسیارانی باڵای سیستەمی پەروەردە کە ڕێگەیان بەم دۆخە داوە.
٤. دانانی سیستەمێکی چاودێری سەربەخۆ لە ناوچە کوردییەکان بۆ پاراستنی مافی قوتابییان و ڕێگرتن لە هەر جۆرە توندوتیژییەک.
با هەموومان وەک کۆمەڵگایەکی بەرپرس و هوشیار، چاودێری پرۆسەی پەروەردەی منداڵانمان بکەین و نەهێڵین سیستەمی کۆماری ئیسلامی درێژە بە پێشێلکردنی مافەکانیان بدات. کاتی ئەوە هاتووە گۆڕانکارییەکی ڕیشەیی لەم سیستەمە داسەپاوەدا بکرێت و مافەکانی گەلی کورد بە تەواوی بناسرێت.
