ئەندامانی بەڕێزی کۆنگرەی نۆیەمی یەکیەتیی لاوانی دێموکڕاتی ڕۆژهەڵاتی کوردستان!
تێکۆشەرانی ڕیزەکانی یەکیەتیی لاوانی دێموکڕات بەگشتی!
دەگەڵ سڵاوی شۆرشگێڕانە
ئاگادار بووم کە بەم زووانە ڕێکخراوە تێکۆشەرەکەتان نۆیەمین کۆنگرەی خۆی بەڕێوە دەبا. بەداخەوەم کە لە کوردستان نیم و شانسی ئەوەم نیە لە نیزیکەوە بەشداری خۆشی و شادیتان بم و ڕاستەوخۆ پیرۆزبایی ئەم ڕووداوە گرنگەتان عەرز بکەم. بۆیە ئیزنم بدەن بەم کورتە نووسراوە گەرمترین پیرۆزباییتان لێ بکەم و سەرکەوتنی کۆنگرە و خەباتی پێشکەوتنخوازانەی لەمەو دواتان بە ئاوات بخوازم.
وەچەی لاوی کۆمەڵگە لە کوردستانیش وەک هەموو کۆمەڵگە ئینسانییەکان نەخشێکی گرنگیان لە پێشخستنی ژیان و خەباتی نەتەوەکەیاندا هەبووە و یەکیەتیی لاوانی دێموکڕاتی کوردستانیش لە قۆناخە جۆراوجۆرەکانی تەمەنی هەشتا ساڵەی خۆیدا هەم لە پەروەردەکردنی بەرەی لاوی کۆمەڵدا خزمەتی زۆری لەدەست هاتوە و هەم لەوەش زیاتر پاڵپشتێکی قایم بۆ حیزبی دێموکڕاتی کوردستان حیزبی پێشڕەوی خەباتی ڕزگاریخوازانەی خەڵکی خۆرهەڵاتی کوردستان (کوردستانی ئێران) بووە کە لەم ڕێگایەدا ڕەنجی کێشاوە و قوربانیی داوە.
کۆنگرەی ئەمجارەتان لە هەلومەرجێکدا دەگیرێ کە وڵاتەکەمان و ناوچەکەمان بەتێکڕا چاوەڕوانی ئاڵوگۆڕی گرنگی سیاسین. ئەرکی ئەم کۆنگرەیەیە کە هەلومەرجەکە باش هەڵسەنگێنێ و نەخشەڕێگای گونجاو بۆ تێکۆشانی لاوان و یەکیەتیی لاوان لە قۆناغی تازەی خەباتدا دیاری بکا. هیوادارم هەموو ئەندامانی کۆنگرە لە ئاستی بەرپرسایەتیی قۆناغەکەدا بن و بە بەشداریی چالاکانە لە باسەکانی کۆنگرەدا ئەرکی مێژوویی سەرشانیان بەجێ بگەیەنن.
سەرکەوێ کۆنگرەی نۆیەمی یەکیەتیی لاوانی دێموکڕاتی ڕۆژهەڵاتی کوردستان.
دڵسۆزتان عەبدوڵڵا حەسەنزادە
٢٢ی خەرمانانی ١٤٠٤- ١٣ی سێپتامبری ٢٠٢٥
