بەڕێزان ئەندامانی بەڕێوەبەری یەکیەتیی لاوانی دێموکراتی ڕۆژهەڵاتی کوردستان!
بە بۆنەی بەستنی کۆنگرەی ۹ی ڕێکخراوکەتان پیرۆزبایی گەرمی خۆمان پێشکەش بە ئێوە بەڕێزان و بەڕێوەبەران و هەموو ئەندامانی لاوان دەکەین.
هەرچەند لە کاتێکدا کە دۆخی نێوخۆی ئێران زیاتر لە هەر کاتێک هەستیار و بەستێنسازی ڕووداو و گۆڕانکارییەکانە و دوای شەڕی ۱۲ رۆژەی ئێران و ئیسرائیل سەرەتای تێکشکانی هەیمەنەی ڕێژیم بوو.
ڕێژیم لە نێوخۆی وڵاتیشدا لە هەمبەر ویست و داخوازەکانی پێکهاتە جۆراوجۆرەکانی داماو و زەبوونە و هەر بۆیەش دەزگای سەرکوتکەری ڕێژیمی ئێران بە هەموو شێوەیەک بۆ چاوترسێنکردنی خەڵک رۆژ نییە بە تۆمەتی جۆراوجۆر کچان و کوڕانی لاو بەتایبەت لاوانی ڕۆژهەڵات دەسبەسەر نەکا و سزای قورسیان بەسەردا نەسپێنن و ڕۆژ نییە لاوانی ئێمە لە سێدارە نەدرێن و لە سووچی زیندانەکان بەشێوەی دڕندانە ئەشکنجەیان نەدەن. ڕۆژ نییە خەڵکی بێتاوان بە تۆمەتی جۆراوجۆری نایاسایی و نادادپەروەرانە لە نادادگاکانی ڕێژیمدا سزای قورسی وەک سێدارەیان بەسەردا نەسەپێ.
یەکی دیکە لە بەربەستەکانی سەر ڕیگای لاوان بێدەرتانی کاری ڕۆژانەیە کە بۆ بژێوی ژیانی خۆیان پەنا دەبەنە بەر کاری قورسی کۆڵبەری و ئەو ماوەیە بینیمان کە ئەو ئەرکە تەنیا پیاوان بەڵکوو کچان و ژنانیش لە ئەستۆیان گرتووە و ئەوانیش وەک پیاوان بۆ پارووە نانێک گیانی خۆیان خستووەتە مەترسیەوە و ئەوەش خاڵیکی ڕەشی دیکەیە بە مێژووی ئەو ڕێژیمەوە کە لە کاتێکدا ئێران و بەتایبەت کوردستانی ڕۆژهەڵات یەکێک لە دەوڵەمەندترین وڵاتەکانی جیهانە لاوەکانی بە چ دژواریەک خەریکن ژیان بەسەر دەبەن.
گومان لەوەدا نییە کە لاوانی وڵات و بەتایبەت لە ڕوژهەڵاتی کوردستان هەمیشە بە خۆڕاگری و تێکوشانیان نیشانیان داوە لە هەموو خەباتە جۆراو جورەکانی وڵاتەکەیاندا لەسەر باوەڕ و تێکوشانیان بەردەوام بوون.
لاوانی هەستیار و بوێر!
لە کۆتاییدا ئاماژە بە گرینگترین ڕووداوی مێژوویی لە دەیەی ڕابردووی ئیران و ڕۆژهەڵاتی کوردستان کە ئەویش بزووتنەوەی ژن، ژیان، ئازادی”یە دەکەین کە ڕۆڵی سەرکی ئەو بزووتنەوە پیرۆزە لەسەر شانی کچان و کوڕانی لاوی کۆمەڵگە بوو و ئەوان بوون بە خوێنی خۆیان شۆڕشێکی پیرۆزیان خوڵقاند و جیهانیان هەژاند. یەکی دیکە لە شانازیەکانی کوردستانی ڕۆژهەڵات بوونی لاوانی ئەرک وەخۆگر و دڵسۆز لە ڕێکخراوەکانی مەدەنی و ngoکان و ڕێکخستنەکان بووە.
نەورۆزی جامانەکان و نەورۆزی خاکیپۆشان و هەموو کاتە هەستیارەکانی وەک کۆکردنەوەی یارمەتی بۆ ڕووداوە نەخوازراوەکان و کوژاندنەوەی ئاگر لە دارستانەکان کاتگەلێک بوون کە کچان و کوڕانی لاوی کۆمەڵگە سەڕافەتی و سەرپەرستیان کردووە و تەنانەت لەو ڕیگەیەوشدا شەهید دراوە.
بە هیوای سەرکەوتن لە هەموو ئەرکەکانی خۆتان و سەرکەوتن بۆ لاوانی وڵاتەکمان
یەکیەتیی ژنانی دێموکراتی کوردستانی ئێران
سێشەممە ۱٨ی خەرمانانی ۱٤۰٤
