بەڕێزان! ئەندامان و لایەنگران و بەشدارانی کۆنگرەی حەوتەمی یەکیەتیی خوێندکارانی دێموکراتی کوردستان!
لەگەڵ سڵاو و ڕێز لە خزمەت سەرجەم خوێندکارانی ڕزگاریخواز و ئازادیخواز و هۆشیاری ڕۆژهەڵاتی کوردستان، لە دڵەوە پیرۆزبایی پێکهێنانی کۆنگرەی حەوتەمی یەکیەتیی خوێندکارانتان لێ دەکەین. ئەم کۆنگرەیە هێمای بەئاگاهاتنەوەی ئەو لاو و خوێندکارانەیە کە لەنێو تاریکایی سانسۆر و هەڵاواردن و سەرکوتدا، هێشتا باوەڕیان بە ڕووناکایی بیرکردنەوە و هۆشیاری و ئازادییە. یەکیەتییەکەتان تەنها ڕێکخراوێکی خوێندکاری نییە، بەڵکوو بەشێکە لە ویژدانی بەئاگابووی نەتەوەی کورد کە ئەرکی مێژوویی خۆی لەسەر بنەمای گرێدانی زانست و هۆشیاری و خەباتی نەتەوەیی، ڕادەپەڕێنێت.
لە هەلومەرجێکدا کە ڕۆژهەڵاتی کوردستان ڕووبەڕووی هەژاری، سەرکوتی فەرهەنگی و سڕینەوەی سیستەماتیکی نوخبەکان بووەتەوە، ڕۆڵی خوێندکارانی کورد لە چواردیواریی زانکۆکاندا سنووردار نابێتەوە. خوێندکاری کورد ئەمڕۆ دوو ئەرکی مێژوویی هەڵگرتووە: هۆشیاریی کۆمەڵایەتی و بەرپرسیاریەتیی نەتەوەیی. خوێندکاری کورد دەبێ پردێک بێت لەنێوان زانکۆ و کۆمەڵگەدا؛ لەنێوان بیرکردنەوە و ڕزگاریدا. لە سەردەمێکدا کە داگیرکەر هەوڵ دەدات زەینی کورد لە خودی خۆی بەتاڵ بکاتەوە، ئەرکی خوێندکاری کورد بەهێزکردنی شوناس، زمان و هۆشیاریی نەتەوەییە.
کۆنگرەی ئەمساڵ دەتوانێت و دەبێ ببێتە هۆی پێناسەکردنەوەی پێگەی خوێندکار لە پڕۆسەی ڕزگاریی نەتەوەییدا. هیوادارین ئەم کۆنگرەیە هەنگاوێک بێت بەرەو پتەوکردنی پەیوەندیی زانست و شوناس و ئازادی و ڕزگاری. یەکیەتیی خوێندکارانی دێموکراتی کوردستان دەبێ وەک دەنگی هۆشیارکردنەوە و هیوا لەنێو لاوان و خوێندکاراندا بمێنێتەوە، بێگومان بەم شێوەیە بەشێک لە ڕێگای ڕزگاریی نەتەوەکەمان خۆش دەکات.
ئێمە وەک یەکیەتیی لاوانی دێموکراتی ڕۆژهەڵاتی کوردستان، پشتیوانیی خۆمان بۆ هەوڵ و خەباتی ئێوە دووپات دەکەینەوە و زیاتر لە پێش هاوکارتان دەبین. هەر بژین و سەرکەوتوو بن و بەهیوای هاتنە دیی ئامانجە بەرزە نەتەوەیی و نیشتمانییەکانی کوردستانییان.
وێڕای سپاس و ڕێز
یەکیەتیی لاوانی دێموکراتی ڕۆژهەڵاتی کوردستان
ڕەزبەری ١٤٠٤ی هەتاوی
