بەڕێزان! ئەندامان و لایەنگران و بەشدارانی کۆنگرەی پێنجەمی یەکیەتیی ژنانی دێموکراتی کوردستانی ئێران!
لەگەڵ سڵاو و ڕێز لە خزمەت سەرجەم ژنانی ڕزگاریخواز، ئازادیخواز، یەکسانیخواز و هۆشیاری ڕۆژهەڵاتی کوردستان، لە دڵەوە پیرۆزبایی بەستنی کۆنگرەی پێنجەمی یەکیەتیی ژنانتان لێ دەکەین.
خەباتی ژنانی کورد بۆ شوناس، ئازادی، ڕزگاری و یەکسانی، کۆڵەکەی گرنگی بەرخۆدان و خەباتی نەتەوەیی و نیشتمانیی ئێمەیە. ئێوە بە ڕاوەستان لەهەمبەر هەڵاواردن و خەبات بۆ پاراستنی زمان و فەرهەنگی کوردستان و خەبات بۆ مافی ژنان، ڕێبازی ڕزگاریتان ڕووناکتر کردووەتەوە. ڕۆڵی مێژوویی ئێوە دەیسەلمێنێت کە بەبێ ئامادەبوونی هۆشیارانە و پێشڕەوانەی ژنان، هیچ بزووتنەوەیەکی ئازادیخواز و ڕزگاریخواز و یەکسانیخواز، ناگاتە ئەنجام.
ئێمە وەک نەسڵی لاوی کوردستان، لەم خەبات و ڕێبازە پیرۆزەدا هاوسەنگەرتانین. باوەڕمان وایە کە هاوکاریی نێوان لاوان و ژنان، هێزێکی نوێ بۆ داهاتووی کوردستان دەئافرێنێت؛ داهاتوویەک کە تێیدا ئازادی، یەکسانی و کەرامەتی مرۆڤ، نەک دروشم، بەڵکوو ڕاستیی ژیانی نەتەوەکەمانە.
لەم کۆنگرەیەدا و لە ڕەوتی خەباتتاندا، ئاواتەخوازی سەرکەوتنتانین.
وێڕای سپاس و ڕێز
یەکیەتیی لاوانی دێموکراتی ڕۆژهەڵاتی کوردستان
خەزەڵوەری ١٤٠٤
