٢٥ی نۆڤامبر؛ دەرفەتە ناوازەکە
ئاسۆ مینبەری؛ ڕۆژنامەوان و چالاکی بواری ژنان
هاوکات لەگەڵ ٢٥ی نۆڤامبر و دەستپێكی کەمپەینی ١٦ ڕۆژەی پرتەقاڵی، ژنان لە سەرتاسەری جیهاندا بە مەبەستی وشیارکردنەوە و بەرەنگاربوونەوەی توندوتیژییەکان دەست بە چالاکی دەکەن.
لەو وڵاتانەیدا کە دەسەڵاتی زاڵ، دەسەڵاتێکی ئازاد و دێموکراتیک بێت، دەسپێشخەرییەکە دەکەوێتە ئەستۆی دەوڵەت و ناوەندە تایبەتەکان و بە شێوازی جیاواز کەمپەینەکە بەڕێوە دەبەن، بەم جۆرە جیا لە ڕێزگرتن لە مافەکانی ژنان و هەوڵدان بۆ نەهێشتنی توندوتیژییەکان، ئەو پەیامە گرینگە بە هاووڵاتییانی خۆیان دەدەن کە یاسا و دەسەڵات پاڵپشتێکی سەرەکی بۆ توێژی ژنانن و ژنان دەتوانن لە کاتە دژوارەکاندا پشت بە دەسەڵات و یاساکانی وڵاتەکەیان ببەستن.
ئەم پرسە بەگشتی لە ڕۆژهەڵاتی نێوەڕاست و بەتایبەتیش لە ئێرانی ژێردەسەڵاتی کۆماری ئیسلامیدا، زۆر جیاوازە! دەسەڵاتی زاڵ هاوکات لەگەڵ ئەوەی کە هیچ بایەخێک بە ئازادی و داواکارییەکانی ژنان نادات و ئێستاشی لەگەڵدا بێت پەیوەستی کۆنوانسیۆنی خەبات بۆ نەهێشتنی هەڵاواردنەکان دژی ژنان نەبووە، بە شێوەی سیستماتیک و لە ڕێگەی یاساکانەوە بووەتە سەرەکیترین سەرچاوەی توندوتیژی.
لە ماوەی ساڵانی ڕابردوودا، ژنان و کچان بە سەدان جۆری جیاوازی توندوتیژییان لە کۆمەڵگەی ئێراندا ئەزموون کردووە، لە قەیرانی منداڵهاوسەرییەوە بگرە هەتا بێبەریکردن لە مافی کار و خوێندن، لە دەستدرێژیی سێکسییەوە هەتا قەتڵی سیستماتیک و توندتیژیی ئانلاین و دیجیتاڵ!
لە ڕاستیدا کۆماری ئیسلامی هاوکات لەگەڵ گەشەی زانست و پێشکەوتنی کۆمەڵگە، هەوڵی نوێکردنەوەی مێتۆدەکانی سەرکوتی ژنان و کچانی داوە و بەم شێوەیە کۆمەڵگەی لە بەشێکی بەرچاو لە وزە و پۆتانسییەلی کارا و بەئەزموون بێبەری کردووە و توندوتیژییەکان لە لێدانی فیزیکی تێپەڕیون و جۆری مەترسیدارتریان هاتووەتە ئاراوە.
گەڵاڵەی جەوانیی حەشیمەت، کارتی هیوای دایک، ڤیدیۆکلیپی تەبلیغ بۆ دیاردەی منداڵهاوسەری، سەپاندنی سزای بەندکران، لێدانی قامچی، بڵاوکردنەوەی حەبی دەستدرێژی، قەتڵی سیستماتیک، یاسای دژەژن، گەشتی ئێرشاد و چاوەدێری و کۆنتڕۆڵی ژنان، تەنیا نموونەگەلێک لە هەزاران جۆر توندوتیژین کە ئەمڕۆکە لەژێر چاوەدێریی کۆماری ئیسلامیدا و لە ڕاستای پەرەسەندنی ئیدئۆلۆژیی چەقبەستووی ویلایەتی فەقێدا بەرەوڕووی ژنان و کچان دەبێتەوە.
چاوخشاندنێک بە ڕووداوەکانی سێ ساڵی ڕابردوو و بەرزبوونەوەی ڕێژەی ژنان و کچانی بەندکراو و حوکمدراو بە بەندیخانە و سێدارە، قەتڵە حکوومەتییەکانی سەردەمی شۆڕشی ژینا و بڵاوکردنەوەی وێنەی ژنان و کچان و هەوڵ بۆ ناوزڕاندنی ئەم توێژەی کۆمەڵگە لەلایەن ناوەندە سەرکوتکەرەکانی ڕێژیمەوە کە تۆڵەکردنەوە لە بەشداریی چالاکانەیان لە شۆڕشەکەدا بوو، تەنیا بەشێک لەو توندوتیژییانەن کە بە ئاشکرا و لەپێش چاوی جیهانەوە بەرانبەر بە ژنان و کچان ڕوویان دا.
ئەگەرچی توندوتیژییەکان دژی ژنان تەنیا لە چوارچێوەی توندوتیژیی ساختاری و سیستماتیکدا کورت ناکرێنەوە و جۆری دیکەی وەکوو توندوتیژیی جێندەری، کۆمەڵایەتی، ئابووری، خێزانی و سێکسی، ئانلاین و دیجیتاڵ، ژنکوژی و قەتڵ لەژێر ناوی نامووس و دەیان جۆری دیکە لەخۆ دەگرێت، بەڵام نابێ لەبیرمان بچێت کە بوونی سیستمی دەسەڵاتداریی دادپەروەر و یەکسانی تەوەر، دەتوانێت لە کەمکردنەوەی توندوتیژییەکاندا ڕۆڵی بەرچاو بگێڕێت.
ئەمساڵ لە کاتێکدا دەچینە نێو کەمپەینی ١٦ ڕۆژی پرتەقاڵییەوە کە توندوتیژییەکان بەتایبەت لە کۆمەڵگەی کوردستان و لە چوارچێوەی توندوتیژیی سیستماتیکدا پەرەیان سەندووە و بێبەزەییانە لەلایەن ڕێژیمەوە دژی ژنان بەردەوامن. ئەم ١٦ ڕۆژە دەرفەتێکی ناوازەیە بۆ ئەوەی کە بە ئاگادارکردنەوە و وشیارکردنەوەی کۆمەڵگە، هەوڵ بۆ دەستنیشانکردن و بەرەنگاربوونەوەی توندوتیژییەکان دژی ژنان بدەین.
