ڕۆژانی هەینی تا یەکشەممە ٩ تا ١١ی سەرماوەزی ٢٧٢٥ی کوردی هاوکات لەگەڵ ٢٨ تا ٣٠ی نوامبری ٢٠٢٥، کۆنگرەی لاوانی حیزبی سۆسیال دێموکراتی ئاڵمان (حیزبی SPD) بە دروشمی “داهاتوو لەگەڵ ئێمە بونیات دەنرێت”، لە شاری “مانهایم”ی ئاڵمان بەڕێوەچوو کە یەکیەتیی لاوانی دێموکراتی ڕۆژهەڵاتی کوردستانیش بەفەرمی بانگهێشتی ئەم کۆنگرەیە کرابوو.
ئێوارەی ڕۆژی یەکەمی کۆنگرە، بەرپرسانی ڕێکخراوەی لاوانی سۆسیال دێموکراتی ئاڵمان (ڕێکخراوی JUSOS) وێڕای بەخێرهاتنکردنی میوانان و ئەندامانی بەشداربوو لە سەرانسەری ئاڵمان، ڕاپۆرتی چالاکییەکانیان پێشکەشی ئامادەبووان کرد و پاشان هەڵبژاردن بۆ بەڕێوەبەریی نوێ دەستی پێ کرد.
لە ژوورێکی تایبەتدا کە تەرخان کرابوو بۆ نوێنەرانی چەندین ڕێکخراوەی ئینترناسیۆناڵی لاوان، بەرپرسانی لاوانی سۆسیال دێموکراتی ئاڵمان بەخێرهاتنی میوانانیان کرد و کورتەیەکیان لە چۆنیەتیی بەڕێوەچوونی کۆنگرەکەیان بۆ میوانانی بانگهێشکراو هێنایە بەرباس.
ڕۆژی دووەمی کۆنگرە، چەند پانێلێک بەڕێوە چوو کە لە یەکێک لە پانێلەکاندا خاتوو “باربل باس” هاوسەرۆکی حیزبی سۆسیال دێموکراتی ئاڵمان (SPD) باسێکی پێشکەشی ئامادەبووان کرد.
لە ژووری تایبەت بە میوانانی دەرەوە، لە دوو کاتی بەیانی و دوانیوەڕۆدا، میوانانی بەشداربوو ڕاپۆرتی ساڵانەی خۆیان پێشکەشی ئامادەبووان کرد و هاوڕێ “ساسان خاتوونی” بە نوێنەرایەتیی یەکیەتیی لاوانی دێموکراتی ڕۆژهەڵاتی کوردستانیش ڕاپۆرتی خۆی پێشکەشی ئامادەبووان کرد.
نوێنەری یەکیەتیی لاوان باسێکی سەبارەت بە بارودۆخی مافی مرۆڤ لە ڕۆژهەڵاتی کوردستان و ئێراندا هێنایە بەرباس کە کۆماری ئیسلامی گوشارێکی زۆری خستووەتە سەر لاوان، چالاکانی سیاسی، مەدەنی و کولتووری؛ هەروەها ئاماژەی بە ژمارەی دەستبەسەرکراوەکان و لەسێدارەدراوەکان لەلایەن کۆماری ئیسلامیی ئێرانەوە کرد.
هاوڕێ ساسان خاتوونی باسی لەوەش کە زمانی کوردی تا ئێستاش لە قوتابخانە و زانکۆکان قبوڵ ناکرێت و زۆرجاریش کار و چالاکیی مەدەنی ڕووبەڕووی کۆت و بەند دەبێتەوە، بەڵام نەتەوەی خۆڕاگری ئێمە بەتایبەت لاوان، بە هەموو شێوەیەک بەردەوامن لە خەباتی ئاشتیخوازانەی گەلەکەمان.
لە درێژەی ڕاپۆرتەکاندا چەندین پرسیار لەلایەن بەشداربووان لە نوێنەری یەکیەتیی لاوان کرا و هاوڕێ ساسان خاتوونی بەوردی وڵامی پرسیارەکانی دایەوە.
ڕۆژی سێهەم و کۆتایی کۆنگرە، لە پانێلێکدا کە هەموو ئەندامان و میوانان تێیدا بەشدار بوون، وێڕای ڕاگەیاندنی ئەنجامەکانی کۆنگرە و هەڵبژاردنەکان، بەڕێوەبەرانی نوێی ڕێکخراوی لاوانی حیزبی سۆسیال دێموکراتی ئاڵمان ناسێندران و کۆنگرە کۆتایی بە کارەکانی خۆی هێنا.
شایانی باسە کە یەکیەتیی لاوانی دێموکراتی ڕۆژهەڵاتی کوردستان لەگەڵ ڕێکخراوی لاوانی حیزبی سۆسیال دێموکراتی ئاڵمان (Jusos)، ڕێکخراوی دەستەخوشکن و هەردووک لا ئەندامی ڕێکخراوی یەکیەتیی لاوانی نیونەتەوەیی ئینترناسیۆنال سۆسیالیست-ن (IUSY).
