بۆچی گرنگە لاوانی کورد لە تۆڕە کۆمەڵایەتییەکاندا بەشداریی چالاکانەیان هەبێت؟
شیوا حەسەنپوور؛ خوێندکار
لە جیهانی ئەمڕۆدا سۆشیالمیدیا یەکێکە لە بەهێزترین ئامرازەکان کە لاوانی کورد دەتوانن بەکاری بهێنن بۆ گێڕانەوەی مێژووی کورد و کوردستان و دروستکردنی پەیوەندی لەنێو وڵات و دەرەوەی وڵاتدا، وەک گەیاندنی پەیامی سیاسی و مافی مرۆیی، دروستکردنی یەکگرتوویی و هتد. بۆ ئێمەی کورد ئەم ئامرازە دوو جار گرنگە، چونکە ئێمە سەدان ساڵە سانسۆر دەکرێین، ناکرێت بڵێین کە ئەم سانسۆرکردنە لە سۆشیالمیدیا هەر بوونی نییە، بەڵام زۆر کەمترە. لەڕاستیدا ئەم ڕۆژانە چالاکبوون لە تۆڕە کۆمەڵایەتییەکاندا بۆ ئێمەی لاوی کورد هەر چالاکییەکی ئاسایی نییە و پێم وایە بەرگرییە لە نەتەوەمان، کولتوور، مێژوو، زمان و مافەکانمان و بەگشتی هەبوونمان. بەڵام بێگومان گرنگه کە بزانرێت چۆن بەکار بهێندرێت کە ئامانجەکە بپێکێت.
لەم بابەتەدا زۆر بەکورتی باسی چەند ڕێگایەکی بەکارهێنانی تۆڕە کۆمەڵایەتییەکان دەکەم کە پێمان دەڵێت بۆچی گرنگە لاوانی کورد چالاکانە تۆڕە کۆمەڵایەتییەکان بەکار بهێنن.
پاراستنی زمان، کولتوور و مێژوومان
لاوانی کورد دەتوانن بە نووسینی وتاری نەتەوەیی، سیاسی و مێژوویی و دروستکردنی ڤیدیۆی کورت و هێنانە بەرباسی بابەتی زمانی دایکی، مێژوویی، نیشاندانی کولتووری نەتەوەکەمان بە دونیای دەرەوە، بەرگری لە وڵات و نەتەوەکەمان بکەن و ڕاستییەکان بە گوێی جیهان بگەیەنن.
دروستکردنی یەکگرتوویی و پەیوەندی
داگیرکەران بە درێژاییی مێژوو لە هەوڵی تێکدانی یەکگرتوویی ناوماڵی کورد بوون، هەروەها بە دانانی سنووری دەستکرد جارێکی دیکە هەوڵیان داوە پەیوەندیی نێوان هەر چوار پارچەی کوردستان بپچڕێنن و بەتەواوی نەتەوەی کورد بە پارچەپارچەکردن لەنێو خۆیاندا بتوێننەوە. بەڵام لەم سەردەمەدا لاوانی کوردستان دەتوانن لە تۆڕە کۆمەڵایەتییەکان سنوورەکان ببەزێنن و بە یەکگرتوویی کار و چالاکی بکەن و پەیامەکان بە بەهێزتر لە کوردستانی گەورەدا بڵاو بکەنەوە و تەنانەت بیگەیەننە دەرەوەی کوردستانیش. هەروەها دەتوانن هەر لەم ڕێگەیەوە پەیوەندی لەگەڵ ڕێکخراوەکان، ڕۆژنامەوانان و چالاکوانانی دەرەوەی وڵاتیشدا دروست بکەن.
لایەنی مافی مرۆڤ
سەدان ساڵە نەتەوەی کورد بە هەموو شێوەیەک و دوور لە مرۆڤایەتی و لە بێدەنگیدا کۆمەڵکوژ دەکرێت، بە کیمیاباران، ئەشکەنجە و سێدارە. لاوانی کورد دەتوانن ڕۆژانە هەواڵەکان لە لاپەڕەکانی خۆیاندا بەتایبەتی ئەپی ئێکس (تویتەر) بە زمانی ئینگلیزی بە شێوەیەکی کورت و پوخت بڵاو بکەنەوە، هەروەها لە ڕێگەی کورتەڤیدیۆ و بە زمانی کوردی و ژێرنووسی ئینگلیزی ئەم تاوانانە لەقاو بدەن و ببنە دەنگی نەتەوەکەمان.
ئەنجام
بێگومان زۆر ڕێگا هەیە بۆ چالاکیکردن لە تۆڕە کۆمەڵایەتییەکاندا، بەڵام من چەند ڕێگایەکم باس کردووە و ئەمانە پیمان دەڵێن کە تۆڕە کۆمەڵایەتییەکان تەنیا ئامرازێکی سەرگەرمی نین، بەڵکوو دەتوانرێت وەک ئامرازێک بۆ خەبات لە دونیای ئەمڕۆشدا بەکار بهێندرێت. ئەگەر ئێمە لاوانی کورد بۆ خۆمان باس لە ڕاستییەکان نەکەین، دوژمنان لەم دەرفەتەش کەڵک وەردەگرن و بە چەواشەکاری لە ڕوانگەی خۆیان و بە پێناسەی داتاشراوی خۆیان باسی کوردستان و کورد.
