ڕێکخراوی JUSOS لاوانی حیزبی سۆسیال دێموکراتی ئاڵمان (SPD)، بۆ پشتیوانی لە ناڕەزایەتییەکانی ئێران و ڕۆژهەڵاتی کوردستان پەیامێکی بڵاو کردەوە و ڕایگەیاند: ئێمە وەک ڕێکخراوی JUSOS، هاوسۆزیی خۆمان لەگەڵ ڕێکخراوی دەستەخوشکمان “یەکیەتیی لاوانی دێموکراتی ڕۆژهەڵاتی کوردستان” دەردەبڕین و لەگەڵ هەموو خەڵکی ئێران، کورد، بەلووچ و خەڵکی ڕاپەڕیو کە بۆ ئازادی و کەرامەت دێنە سەر شەقامەکان ڕادەوەستین.
دەقی پەیامەکە بەم شێوەیەیە:
چەندین ڕۆژە خەڵکی ئێران و ڕۆژهەڵاتی کوردستان دژی بەرزبوونەوەی نرخەکان و تەنگەژەی ئابووری و دژی ڕێژیمێکی دیکتاتۆر خۆپیشاندان دەکەن کە ئەم ڕێژیمە بە توندوتیژی و دڕندەیییەوە وڵامی قەیرانە کۆمەڵایەتییەکان و نەبوونی ڕەواییی سیاسی دەداتەوە. مانگرتنی سەرانسەری لە دژی هەڵاوسان و نەبوونی ئاسۆیەکی ڕوون، گۆڕدرا بۆ ناڕەزایەتی لە دژی ستەمکاریی سیاسی و ڕێژیمی ئاخوندەکان.
لاوان لە هێڵی پێشەوەی ئەم ناڕەزایەتییانەدان و لە کاتێکدا ئینتەرنێت بەتەواوی داخراوە، لەلایەن ڕێژیمەوە بەرەوڕووی توندوتیژیی دڕندانە دەبنەوە. ئەوانەی خۆپیشاندان دەکەن، لەلایەن ڕێژیمەوە بە “دوژمنی خودا” تۆمەتبار دەکرێن و هەڕەشەی کوشتنیان لێ دەکرێت.
ئێمە وەک لاوانی “JUSOS” (لاوانی حیزبی سۆسیال دێموکراتی ئاڵمان SPD)، هاوسۆزیی خۆمان لەگەڵ ڕێکخراوی دەستەخوشکمان “یەکیەتیی لاوانی دێموکراتی ڕۆژهەڵاتی کوردستان” دەردەبڕین و لەگەڵ هەموو خەڵکی ئێران، کورد و بەلووچ و خەڵکی ڕاپەڕیو کە بۆ ئازادی و کەرامەت دێنە سەر شەقامەکان، ڕادەوەستین.
ئاڵوگۆڕی دێموکراسیی ڕاستەقینە لە ئێستادا دەتوانێت و دەبێ لە کۆمەڵگەی مەدەنیی ئێران دەربکەوێت و ئەوان شایەنی هەموو پشتیوانییەکن، بەڵام ئەڵمانیا و یەکیەتیی ئەورووپاش دەبێ ئەم بەرپرسیارێتییە لە ئەستۆ بگرن. دواجار دەبێ هەموو بەشەکانی ڕێژیم گەمارۆ بدرێن و یەکیەتیی ئەورووپاش سپای پاسدارانی ئێران بخاتە نێو لیستی ڕێکخراوە تیرۆریستییەکانی خۆیەوە. هەروەها چاوەڕوان دەکەین حکوومەتی ئەڵمانیا هەموو ئامرازێکی دیپلۆماسی بەکار بهێنێت و پاڵپشتی لە کۆمەڵگەی مەدەنی و خەبات بۆ ئازادی و دێموکراسی بکات و هەموو پەیوەندییەکان لەگەڵ ئێران ڕابگرێت.
ئێمە بە هاودەنگی، لەگەڵ هەموو خەڵکی ئێران و ڕۆژهەڵاتی کوردستانین کە دژی ڕێژیمی ئاخوندەکان و بۆ ئازادی خۆپیشاندان دەکەن. دەسەڵاتی ئاخوندەکان لەمێژە کۆتایی پێ هاتووە!
