ئەمڕۆ لە سەرانسەری جوغرافیای ئێران و ڕۆژهەڵاتی کوردستان، ئەو هاوارانەی تێکۆشان، بەرخۆدان و ئازادی کە بەرز دەبنەوە، تەنیا ڕەنگدانەوەی ئازار و مەینەتیی ئەم دوایییانە نین، بەڵکوو ئەمە تەقینەوەی ئیرادەیەکە کە سەدان ساڵە بە کۆمەڵکوژی بێدەنگ دەکرێت و بە سێدارە زنجیر دەکرێت.
ئەمڕۆ لە سەرانسەری ڕۆژهەڵاتی کوردستان و ئێران، ئەو تیرۆر و کۆمەڵکوژی و لەسێدارەدانانەی لەلایەن دەوڵەتی ئێرانییەوە ئەنجام دەدرێن، ناتوانن ئاواتی گەلەکەمان بۆ ئازادی بکوژێننەوە. مێژوو شایەتحاڵی ئەوەیە کە هیچ دیکتاتۆرییەتێک نەیتوانیوە ئاگری ئازادی و خەباتی لاوان بکوژێنێتەوە و هەرگیز ناتوانێت.
ئێمە لەگەڵ ئەو کەسانەین کە سەر بۆ ستەم دانانوێنن!
ئەو بزووتنەوەیەی کە بە شەهیدکردنی ژینا ئەمینی دەستی پێ کرد، ئەمڕۆ بووە بە داستانی ڕاپەڕینی گەلێک کە شەقام و کۆڵان و گۆڕەپانەکانی پڕ کردووە. ئەوانەی پێیان وایە دەتوانن بە گولـلە جەستەی لاوان بوەستێنن، بەڵام نابێ لەبیریان بچێت کە ئەمە لاوان بەرەو خەبات و بەرخۆدانێکی بەهێزتر هان دەدات. ئێمە لەگەڵ ئەو کەسانەین کە بە سەربڵندییەوە لە دادگاکاندا ڕادەوەستن و لە بەندیخانەکاندا ئەی ڕەقیب دەڵێنەوە و لە شەقامەکاندا سەنگەر دەبەستن. دوژمن ئەگەر تانک و تۆپ و جەلادی هەبێت، ئێمە ئیرادە و هۆشیاریی نەتەوەییمان هەیە کە لەسەر بنەمای فەلسەفەی “ژن، ژیان، ئازادی” و “کوردستان یەک وڵاتە، ڕۆژاوا ڕۆژهەڵاتە”دایە.
بیرتان نەچێت، لاوانی کورد لە هەموو کاتێکدا پێشەنگی بەرخۆدانن!
ئێمە وەک لاوانی کورد هاوار دەکەین و دەڵێین: “کۆمەڵکوژییەکانتان ئێمە ناترسێنن، ستەمەکانتان چاومان ناترسێنن! دڵمان لە مەهاباد، ئامەد، هەولێر و قامیشلۆ بە یەک هەست و یەک ئامانج لێدەدات. ئێمە ئەندامی خەباتێکی هاوبەشین بە سەرکردایەتیی شێخ عوبەیدوڵڵا، شێخ سەعید، سەید ڕەزا، پێشەوا قازی محەممەد و مەلا مستەفا بارزانی کە سنوورەکان دەبەزێنن. ئێمە بە هێزی ڕێکخراو و ئاگری چالاکییەکانمان، ئەو دەستە خوێناوییانە دەشکێنین کە دەیانەوێت دەستدرێژی بکەنە سەر خوشک و براکانمان. بە هێزی ڕێکخراومان و ئاگری تێکۆشانمان بەردەوامین تا چۆک بە تاریکی دادەدەین.
ئەمە بانگەوازی ئێمەیە بۆ ڕای گشتیی جیهان و گەلی نیشتمانپەروەرمان لە دیاسپۆرا!
لاوانی کورد دەبێ خاوەندارێتی لە هەر دڵۆپە خوێنی کوردێک بکەن کە لە ئێران و ڕۆژهەڵاتی کوردستان ڕژاوە. با لە بەرامبەر ئەم سیستەمە ستەمکارە دەنگمان یەک بخەین. با ئیرادەی لاوانی کورد لە دیاسپۆرا و لە چوار پارچەی کوردستان نیشان بدەین کە پێکەوە خەبات و هاوکاری بکەن. مێژوو دەریخستووە کە گەورەکردنی بەرخۆدان تاکە ڕێگایە بۆ ڕاگرتنی کۆمەڵکوژییەکان.
بە ستەمکاران دەڵێین: “ئەم باهۆزە کە لە شەقامەکانەوە دەستی پێ کردووە، بناغەکانتان تێکدەڕووخێنێت و کۆتایی بە ئیمپراتۆرییەتی مادە هۆشبەرەکانتان دەهێنێت. لاوانی کورد هەرگیز سەر بۆ چەرخی ستەم و ئێعدام دانانوێنن و کاروانی بەرخۆدان و خەباتی لاوانی کورد ڕاناوەستێت تا نەگاتە ئامانجەکانی.
ئێمە وەک لاوانی پارتی وڵاتپارێزانی کوردستان (PWK)، داوا لە هەموو کوردانی هەر چوار پارچەی کوردستان و لە تاراوگەش دەکەین کە بە هاوبەشی و کاریگەرانە پشتیوانی لە ڕاپەڕینی ڕۆژهەڵاتی کوردستان و گەلانی ئێران بکەن. هەروەها داوا لە هەموو دامودەزگا و ڕێکخراوە سیاسی و مەدەنی و دێموکراتیکەکان دەکەین لە سەرانسەری جیهان کە پشتیوانی لە ئاشتی، ئازادی، دێموکراسی، مافی مرۆڤ و دادپەروەری دەکەن، دەنگی خۆیان بەرز بکەنەوە و هەڵوێستی بەهێز لە دژی ئەم ستەم و کۆمەڵکوژییانەی دەوڵەتی ئێرانی بگرنەبەر.
وەک لاوانی پارتی وڵاتپارێزانی کوردستان بە هەموو هێزێکەوە پشتیوانی لە خەباتی ئازادیخوازانەی خەڵکی ئێران و گەلەکەمان لە ڕۆژهەڵاتی کوردستان لە دژی ستەم و ستەمکاری دەکەین.
بژی بەرخۆدانی شکۆمەندی خەڵکی ڕۆژهەڵاتی کوردستان و ئێران!
بژی یەکڕیزی بۆ خەبات و هاوپەیمانیی لاوانی کورد!
بژی خەبات بۆ ئازادیی کوردستان!
بژی هۆشیاریی “کوردستان یەک وڵاتە، ڕۆژاوا ڕۆژهەڵاتە”!
کۆمیسیۆنی لاوانی پارتی وڵاتپارێزانی کوردستان/ PWK-Ciwan
١٤/٠١/٢٠٢٦
