ڕۆژی پێنجشەممە ڕێکەوتی ٢٣ی ڕێبەندان، “بانە عەزیزی” جێگری سکرتێری یەکیەتیی لاوان و بەرپرسی پەیوەندییەکان، بەشداریی لە کۆبوونەوەیەکی ئۆنڵاین کرد کە لەلایەن ڕێکخراوی لاوانی سۆسیالیستی ئوتریش ڕێکخرابوو و تەرخان کرابوو بە بارودۆخی ڕۆژهەڵاتی کوردستان و ئێران.
ئەم کۆبوونەوەیە تایبەت کرابوو بە یەکیەتیی لاوان و خستنەڕووی ئەو تاوانانەی کە حکومەتە یەک لە دوای یەکەکانی ئێران بەرانبەر بە کورد کردوویانە، بەتایبەتیتر خۆپیشاندانەکانی ئەم دواییانەی ڕۆژهەڵاتی کوردستان و نەتەوەکانی دیکەی نێو چوارچێوەی ئێران.
بانە عەزیزی لە باسەکەیدا ئاماژەی بە مێژووی هاوچەرخی ڕۆژهەڵاتی کوردستان کرد، لەنێوانیاندا باسکردن لە دامەزراندنی کۆماری کوردستان لە مەهاباد و ئەو تاوانانەی کە محەممەدڕەزاشا و حکومەتی پەهلەوی بەرانبەر بە کوردی کردوون.
هەروەها ئاماژەی بەوە دا کە ڕەزاشای پەهلەوی و محەممەدڕەزاشای کوڕی بە سیاسەتی “یەک نەتەوە، یەک زمان”، نەتەوەکانیان سەرکوت دەکرد، ئێستاش ڕەزا پەهلەوی لەژێر ناوی شازادە هەوڵ دەدات بە هەمان ئایدۆلۆژیا کە دەیان ساڵە کورد و گەلانی دیکەی ئێران دەچەوسێنێتەوە، دەسەڵات بەدەستەوە بگرێت. بەڵام نەتەوەی کورد هۆشداری دەدات لە گۆڕینی دیکتاتۆرییەک (کۆماری ئیسلامی) بە دیکتاتۆرییەکی دیکە (پاشایەتیی پەهلەوی).
ناوبراو لە بەشێکی دیکەی قسەکانیدا سەبارەت بە خۆپیشاندانەکانی ئەم دواییەی کوردستان و ئێران وتی: ناڕەزایەتی بەرانبەر بە هەژاری، هەڵاواردن، ستەمکاری و بێهیوایی تاوان نییە؛ بەڵام ڕژێمی ئێران هەوڵ دەدات هەموو دەنگێکی ناڕەزایەتی بە توندوتیژیی سیستەماتیک، کپ و بێدەنگ بکات.
بانە عەزیزی باسی لەوەش کرد: پچڕانی ئینتەرنێت و گەمارۆی دیجیتاڵی و سانسۆرێکی بەربڵاو، بەشێکن لەم ماشێنەی سەرکوتکردن؛ هەوڵێکن بۆ شاردنەوەی ڕاستییەکان و بڕینی پەیوەندیی خەڵک لەگەڵ جیهان و ڕێگریکردن لە تۆمارکردن و گواستنەوەی ئەو تاوانانەی کە بەرانبەر بە خۆپیشاندەران ئەنجام دەدرێن.
دوای باسێکی چڕوپڕ، بەشی کۆتایی کۆبوونەوەکە تەرخان کرا بۆ پرسیاری بەشداربووان کە لەلایەن “بانە عەزیزی”یەوە وڵام درانەوە.
