لە حەفتاوسێهەمین ساڵوەگەڕی دامەزرانی یەکێتیی لاوانی دێموکراتی رۆژهەڵاتی کوردستان، لاوانی ئازادیخوازی رۆژهەڵات و بەشێک لە ئەندامانی هەڵسووڕی رێکخراوەکە لە بەرزاییەکانی زاڵ بە سەر شاری رەبەت ئاگریان داگیرساند و شەقامەکانی ئەو شارەشیان بە دروشمە ئازادیخوازانەکانیان رازاندەوە. ئێوارەی رۆژی شەممە، ٢٢ی خاکەلێوە، ساڵڕۆژی دامەزرانی رێکخراوی یەکێتیی لاوانی دێموکراتی رۆژهەڵاتی کوردستان، دەستەیەک لە لاوانی کورد بە کردنەوەی ئاگر لە قەڵای رەبەت و دارستانی ماوەڵۆ، رێزیان لە رۆژی دامەزرانی رێکخراوەکەیان گرت. رۆژێک پێشتریش چەند دەستەی دیکە لە لاوانی ئازادیخواز بە نووسینی دروشم و بڵاوکردنەوەی پلاکارد بەم بۆنەوە، پەیامی یەکێتی لاوانیان بە دانیشتوانی شارەکە گەیاند. لاوان بە تایبەت لە شەقامی لیلانە، گەڕەکی قەبران، شەقامی سەرەکیی شار، گەڕەکی سەرچاوە و شەقامی گوێز چالاکی تەبلیغییان ئەنجام دا.