پاشنیوەرۆی رۆژی شەمە 6ی مارس بەبەشداری ئەندامانی ئەسڵی کۆمیتەی بەڕێوەبەری و راوێژکار و هەروەها بەڕێوەبەری دەرەوەی وڵات و کۆمیتەی شارەکان، حەوتەمین کۆبونەوەی بەڕێوەبەری گشتی لە سکرتاریای یەکیەتیی لاوان بەڕێوەچوو سەرەتای کۆبونەوەکە پێشەوا عەلی پوور سکرتێری گشتیی یەکیەتیی لاوان باسیکی لە سەر دۆخی رۆژهەڵاتی کوردستان و لاوانی کورد و بەستێنەکانی تێکۆشانی لاوان لە رۆژهەڵاتی کوردستان، پێشکەش کرد و پاشان راپۆرتی چالاکییهکانی ئهم ماوهیهی یهکیهتیی لاوان و پڕۆژەو بەرنامەکانی داهاتوویان لە هەموو بوارەکاندا خستە روو.
لە ئیدامەی باسەکەیدا پێشەوا عەلی پوور باسی لەو دەرفەتانە کرد کە تێیدا لاوانی کورد مەدەنیانە لە رۆژهەڵاتی کوردستان بەکاری دێنن و هەستی نەتەوەیی و نیشتمان پەروەری خۆیانی تێدا نیشان دەدەن. سکرتێری گشتیی یەکیەتیی لاوان وێڕای دەربڕینی پشتیوانی لەهەموو جووڵە و چالاکییەکانی لاوانی رۆژهەڵات لەو قۆناغەدا، باسی لە هەوڵەکانی یەکیەتیی لاوان بۆ گەیاندنی پرسەکانی لاوانی رۆژهەڵات بۆ کۆڕ و کۆمەڵە نێونەتەوەییەکان کرد و بەشداری کردن لە کۆنفرانس و کۆنگرە جیهانییەکانی بە دەرفەتێک وەسف کرد بۆ گەیاندنی دەنگی لاوانی کورد.
بەشێکی دیکەی کۆبونەوەکە تەرخانکرا بە بەشداری نوێنەرانی یەکیەتیی لاوان لە کۆنگرەی جیهانی IUSY و لەم بەشەدا نوێنەرانی یەکیەتیی لاوان باسیان لە کار و چالاکییەکانیان لەم کۆنگرەیەدا کرد و بەستنی کۆمەڵێک هاوپەیمانی لەگەڵ چەند رێکخراوی تایبەت بەلاوان لە ئورووپا و رۆژهەڵاتی نێوەراست و هەروەها باسکردن لە پرسی ژینگەی رۆژهەڵات و مافی مرۆڤ و دۆخی رۆژهەڵاتی نیوەراست لەو پرسانە بوون کە نوێنەرانی یەکیەتیی لاوان لەو کۆنگرەیە داوای کۆدەنگیان بۆ کردوە. لە ئیدامەی کاری کۆبوونەوەکەدا باسێکی تێر و تەسەل سەبارەت بە کۆمیتەکانی دەرەوەی وڵات و ئەرک و مافەکانیان لە نێو یەکیەتیی لاوانی دێموکراتی رۆژهەڵاتی کوردستان کرا و باس لەوەکرا کە لاوان لە دەرەوەی وڵات پێویستە دەورێکی بناغییتر بگێڕن بۆ بەرۆژەڤ کردنی پرسی کورد و لاوی کورد و هەروەها پرسی سوکایەتی کردن بە هاونیشتمانیانی یارسانی لەلایەن کۆماری ئیسلامییەوە کە بەشێوازێکی سیستماتیک بەڕێوەدەچێت، پێویستە لە کۆڕ و کۆمەلە ئورووپاییەکان بێننە بەرباس و دەنگی ئەم بەشە لە هاونیشتمانیانمان بن کە بە هۆی جیاوازی ئایینی لەناو سیستێمی ئیسلامی حکومەتی ئێران تووشی هەڵاواردن بوون و بێڕێزیان پێ دەکرێت.
سەبارەت بە چالاکییەکیەکانی داهاتووی یەکیەتیی لاوان، باس لە رێوڕەسمەکانی چوارشەمە سووری و نەورۆز و١٠ی خاکەلێوە و ٢٢ی خاکەلیوە ساڵڕۆژی دامەزراندنی یەکیەتیی لاوانی دێموکراتی رۆژهەڵاتی کوردستان کرا و باس لەوەکرا کە پێویستە ئەم بۆنانە بە شکۆوە هەم لە ناوخۆی رۆهەڵاتی کوردستان و هەم لە بنکەکانی پێشمەرگە و یەکیەتیی لاوان و هەم لە وڵاتانی ئورووپایی بەڕێوە بچن و پێویستە یاد کردنەوەی بۆنەی نەتەوەیی نەورۆز لە رۆژهەڵاتی کوردستان وەک دەرفەتێکی دی بەکار بێت بۆ نیشاندانی هەستی نەتەوەیی لاوانی کورد و پێویستە کچ و کوڕی کورد لەم رۆژەدا بە جلی کوردی و شۆخ و شەنگ پێشوازی لەم رۆژە نەتەوەییە بکەن و جاریکی دی بە سروودەی جەژنی نەورۆز و خوایە وەتەن ئاواکەی پێشوازی لەم رۆژە نەتەوەییەی کوردان بکەن. شایانی باسە کە کۆبونەوەکە دوای ٤ کاتژمێر کۆتایی پێهات