ڕۆژی شەممە ٣١ی ئۆکتۆبر کاتژمێر ١٢ی نیوەڕۆ شەشەمین کۆنفڕانسی ساڵانەی کومیتەی نۆڕوێژی یەکێتی لاوانی دێموکڕاتی ڕۆژهەڵاتی بە بەشداری دەیان کەس لە ئەندامانی لاوان و نوێنەرانی حیزب و ڕێکخراوەکان لە شاری سترۆمێن لە وڵاتی نۆڕوێژ دەستی پێکرد.
سەرەتای ڕێوڕەسمەکە بە سروودی نەتەوایەتی ئەی ڕەقیب و خولەکێک بێ دەنگی بۆ ڕێزگرتن لە گیان پاکی شەهیدان کورد و کوردستان دەستی پێکرد و پاشان لە لایەن بەڕێوەبەرانی کۆنفڕانسکە جەعفەر ڕەسووڵی و ئاشنا مامەش بەخێر هاتنی سەرجەم بەشدار بووان کرا.
پاشان پەیامی دەستەی بەڕێوەبەری کومیتەی نۆڕوێژی یەکێتی لاوان لە لایەن بەرێز حەسەن بێورانی ئەندامی دەستەی بەڕێوەبەرییەوە پێشکەش کرا. لە پەیامەکەی یەکێتی لاواندا هاتبوو کە
یه‌كیه‌تیی لاوان له هه‌لومه‌رجێك دا كۆنفڕانسی شه‌شه‌می له وڵاتی نۆڕوێژ ده‌گرێ كه وه‌ك هه‌میشه لاوان له نێوخۆی وڵات پێویستیان به یه‌كگرتووی و هاوده‌نگی بۆ به‌رپرچدانه‌وه‌ی سیاسه‌ته دژی ئینسانییه‌كانی كۆماری ئیسلامی‌یه و لاوان له نێوخۆی وڵات له هه‌موو كات زیاتر، دوور له هه‌ر چه‌شنه په‌رته‌وازه‌یی سیاسی و فیكری له نێو هێزه سیاسییه‌كانی رۆژهه‌ڵاتی كوردستان دا پێویستیان به هاوفكری و یه‌كیه‌تیی هه‌یه. هه‌ر له‌و په‌یوه‌ندییه‌ش دا خراپ نیه كه وه‌بیر رێكخراو و لایه‌نه سیاسییه‌كانی رۆژهه‌ڵاتی كوردستان بێنینه‌وه كه یه‌كیه‌تیی لاوان وه‌ك هه‌میشه لایه‌نگر و هه‌وڵده‌ره بۆ ته‌بایی و ئاشتی، هاریكاری و یه‌كگرتوویی هێزه‌كانی رۆژهه‌ڵاتی كوردستانه و له‌و پێناوه‌ش دا خراپ نیه وه‌بیر بێنینه‌وه كه یه‌كیه‌تیی لاوان پێی وایه كه پێویسته هێزه‌كانی رۆژهه‌ڵات هه‌وڵ بۆ یه‌كگرتوویی و هاریكاری زۆرتر له‌گه‌ڵ یه‌كتری بده‌ن.
لە کۆتایی پەیامەکەی یەکێتی لاواندا هاتبوو کە
ئێمه له كاتێك دا كۆنفرانسی شه‌شه‌می رێكخراوه‌كه‌مان له‌م وڵاته‌دا ده‌گرین كه له ماوه‌ی چه‌ند مانگی رابردوودا دیارده‌ی كۆچی لاوان، به تایبه‌تی لاوانی تێكۆشه‌ر و پێشمه‌رگه به‌ره‌و وڵاتانی ئه‌ورووپایی هه‌مووانی تووشی سه‌رسووڕمان كردوه. بۆ هه‌مووان ئاشكرایه كه كۆچكردن و جێهێشتنی زێد شتێكی یه‌كجار ناخۆش و دڵهه‌ژێنه، به‌ڵام نابێ ئه‌وه‌شمان له‌بیر بچێ كه لاوانی كورد چ له كوردستان و چ له ده‌ره‌وه‌ی وڵات ده‌توانن باشترین هێز و وزه بن بۆ ئه‌وه‌ی بزووتنه‌وه‌ی رزگاریخوازی له كوردستان دا به‌هێزتر و چالاكتر بێ. له‌و په‌یوه‌ندییه‌دا به پێویستی ده‌زانین كه هێزه‌كانی رۆژهه‌ڵاتی كوردستان، به تایبه‌تی یه‌كیه‌تیی لاوان، بۆ به‌سه‌ركردنه‌وه، كۆكردنه‌وه و وه‌گه‌ڕخستنه‌وه‌ی تواناییه‌كانی ئه‌و لاوانه له ده‌ره‌وه‌ی وڵات هه‌موو هه‌وڵێكی خۆی بخاته‌گه‌ڕ و هه‌وڵ بدات كه له‌مه‌وبه‌دوا به یارمه‌تی و به‌شداری ئه‌و لاوانه بتوانێ باشتر و به‌گوڕتر له جاران ئه‌رك و چالاكی رێكخراوه‌یی له پێناو به‌ژه‌وه‌ندی نه‌ته‌وه‌یی دا بخاته‌گه‌ڕ.
پاشان پەیامی بەرێز پێشەوا عەلیپوور سکرتێری گشتی یەکێتی لاوانی دێموکڕاتی ڕۆژهەڵاتی کوردستان کە بە شێوەی ویدۆ کۆنفڕانس نێردرابوو پێشکەش کرا.بەڕێژیان ئاماژەیان بەوەدا کە
کۆنگڕەی حەوتەمی لاوان لە ساڵی ڕابردوودا لە کاتێکدا پێکهات کە ئەم وڵاتانەی کوردستانیان بەسەردا دابەش بووە، تووشی کۆمەڵێک ئاڵ و گۆڕی خێرابوون، وە لە ماوەی یەک ساڵی ڕابردوودا هەم لە نێو خۆی وڵات هەم لە دەرەوەی وڵاتیش ساڵێکی پڕ لە چالاکی و تێکۆشان بۆ رێکخراوەکەمان بووە.وە پەیوەست بوونی لاوان بە ڕیزەکانی حیزبی دیموکڕات و پارێزەرانی ڕۆژهەلاتی کوردستان لاپەڕەیەکی نوییان لە خەبات و تێکۆشان هەڵداوەتەوە، وە هاوکات بە بەربەرەکانی لە گەڵ گرووپە تەکفیریە جیهادییەکان وە مادەهۆشبەرەکان وە سیستمی جاشایەتی فکری و جەستەیی وە هەروەها لاوان بە پاراستنی ژینگە وە زیندوو ڕاگرتنی فەرهەنگ و کلتوری کوردی تێکۆشانی مەدەنی خۆیان بردۆتە قۆناغێکی نوێ وە پارێزەری ڕاستەقینەی ڕۆژهەڵاتی کوردستان بوون،
لە درێژەدا بەڕێزیان ئاماژەیان بەوە کرد کە حیزبی دێموکڕاتی کوردستان وەکوو هێزیکی ئاشتی خواز، بەردەوام هەوڵی داوە کە کێشەی کورد لە ڕێگای ئاشتیخوازانەوە چارەسەر بکات، بەڵام بە داخەوە دووژمنانی کورد لە پەیامی ئاشتی تێناگەن، هەر بۆیەش حیزبی دێموکڕاتی کوردستان دەرگای بەرگری ڕەوای بۆ پاراستنی خاک و خەڵکی ڕۆژهەڵات دانەخستووەو ئەمەش بێ قوربانی نەبووە.هەوەرها بەڕێزیان ئاماژەیان بە دامەزراندنی یەکێتی لاوان لە زەمانی ژێکافدا کرد، وە ڕێکخستنەوەو نوێکردنەوە لە کۆماری کوردستاندا دەرخەری ئەو ڕاستییەیە کە لاوان هێزی سەرەکی کۆمەڵگان ، لە کۆتاییدا بەڕێزیان ئاماژەی بە کۆچی بە لێشاوی گەنجانی ڕژهەڵاتی بە هۆی زەبرو سەرکوتی ڕێژیمی ئێران بەرەو وڵاتانی ئورووپایی کرد کە ئەمەش ئەرکی زیاتر دەخاتە سەر کومیتەکانی لاوان لە دەرەوەی وڵات ، وە کۆنفڕانسی ئێوەش دەتوانێ پلان و بەرنامەی باشی بۆ پەروەردەی ئەم لاوانە هەبێ. بەڕێزیان هیوای سەرکەوتنی بۆ کۆنفڕانسەکە خواست کە کومیتەی تازە ببێتە هۆی ساباتی پەروەردەی نوێ بۆ لاوانی ڕۆژهەڵات لە وڵاتی نۆڕوێژ.
پاشان پەیامی کومیتەی حیزبی دێموکڕاتی کوردستان لە نۆڕوێژ لە لایەن بەڕێز کاک خوسرەو قادری،یەوە پێشکەش کرا ،پاشان پەیامی یەکێتی ژنانی دێموکڕاتی کوردستان لە لایەن بەڕێز نەمام زەڕیفەم پێشکەش کرا. پاشان ئەم کەسایەتی،یانەی خوارەوە سەبارەت بە ڕۆڵ و ئەرکی لاوان لە دەرەوەی وڵات، بارودۆخی لاوان لە کوردستان ،کۆچی لاوان بۆ دەرەوەی وڵات وتەیان پێشکەش کرد.
بەڕێزان
هاشم ڕۆستەمی
کەریم ئەڵاوەیسی
ڕزگار ئەمین نەژاد
مەریوان هەڵەبجەیی
هەروەها دوو بروسکەی پیرۆزبایی لایەن کۆمەڵەی کلتوری ڕۆمەریکەو کومیتەی فینلاندی یەکێتی لاوانی دێموکڕاتی ڕۆژهەڵاتی کوردستان،ەوە بە کۆنفڕانس گەیشت.
پاشان لە کۆتایی بەشی یەکەمی کۆنفڕانسدا کۆمەڵێکی بەرچاو لە ئەندامانی یەکێتی لاوان و کومیتە ناوچەکان بە هۆی چالاک بوونیان خەڵات کران.لە درێژەی بەشی دووهەمی کۆنفڕانسدا بەڕێز سۆران شێرزاد باسێکی سیاسی لە ژێرناوی لاوی کورد‌و بزاڤی شوناسخوازانەی‌‌و چۆنیەتی “گووران”ی سۆزی نەتەوەیی بەرەو عەقڵانییەتی نەتەوەیی پێشکەش کرد. دوواین بڕگە لە بەشی دووهەمی کۆنفڕانس ،هەڵبژاردنی دەستەی بەڕێوەبەری تازە بۆ ٢ساڵی داهاتوو بوو کە لەم بەشەدا کۆمەڵێکی زۆر لە لاوانی هەڵسووڕ و چالاک خۆیان بۆ بەڕێوەبەری ناونووس کرد کە لە هەڵبژاردنێکی ئازادو لە کەشێکی دێموکڕاتیکدا ئەم بەڕێزانە بە ئەندامی کۆمیتەی بەڕێوەبەری وڵاتی نۆروێژ هەڵبژێردران
١.جەعفەر ڕەسووڵی
٢.شەوین مەمەندی
٣.ئاکام پوورخزری
٤.ئاشنا مامەش
٥. ئاژوان مامەش
٦. موختار نەقشبەندی
٧. ئاواز خزرپوور
ئەم سێ کەش وەکوو جێگری دەستەی بەڕێوەبەری هەڵبژێردران
١. شاخەوان عەبدیپوور
٢. سیلڤانا بایەزیدپوور
٣. گۆران بابایی
لە کۆبوونەوەیەکی کورتی دەستەی بەڕێوەبەریدا هاورێ ئاژوان مامەش وەکوو بەرپرسی کومیتە دیاری کرا.
پاش چەندین کاتژمێر کاری بەردەوام شەشەمین کۆنفڕانسی کۆمیتەی نۆڕویژی یەکیەتیی لاوانی دێموکڕاتی ڕۆژهەڵاتی کوردستان کۆنفڕانسی ” پارێزەرانی رۆژهەڵات ” کۆتایی بە کارەکانی خۆی هێنا.
جێگای ئاماژەیە کە دوواین بەش و کۆتایی تایبەت بە شەو ئاهەنگێکی خۆش و ڕازاوە کە لە لایەن کومیتەی یەکێتی لاوانەوە بۆ کوردانی ئەم ناوچەیە پێک هات کە تا درەنگانی شەو بەردەوام بوو.
یەکێتی لاوانی دێموکڕاتی ڕۆژهەڵاتی کوردستان
دەستەی بەڕێوەبەری کومیتەی نۆڕوێژ
٣١ی ئۆکتۆبری ٢٠١٥
