پاشنیوەڕۆی رۆژی پێنج شەمە٢١ی دێسامبری ٢٠١٧ یەکیەتیی لاوانی دێموکراتی رۆژهەڵاتی کوردستان بەبەشداری دەیان کادر و پێشمەرگەی دێموکرات و هەروەها بنەماڵەی سەربەرزی شەهیدان، رێوڕەسمێکی لە گۆڕستانی شەهیدان بە مەبەستی بەرز راگرتنی یادی شەهیدانی شەوی یەلدا بەڕێوە برد. ئەم یادە سەرەتا بە ساتێک بەبێدەنگی وەستان بۆ گیانی پاکی شەهیدان و هەروەها وتنەوەی سروودی ئەی شەهیدان لەلایەن منداڵە چاوگەشەکانی دێموکرات دەستی پێکرد. پاشان تاجە گوڵینەی رێز و وەفاداری لە لایەن بەرێزان پێشەوا عەلی پوور سکرتیری گشتیی یەکیەتیی لاوان و خاتوو فاتمە شەریفی جێگری سکرتێری گشتیی یەکیەتیی لاوان لەبەردەم وێنەی شەهیدانی یەلدا دانرا. لە بڕگەیەکی دیکەی بەرنامەکەدا پەیامی یەکیەتیی لاوان لەلایەن بەڕێز پێشەوا عەزیزپوور ئەندامی کۆمیتەی بەڕێوەبەریی گشتیی یەکیەتیی لاوان پێشکەش کرا، لەو پەیامەدا هاتبوو “تێرۆری شەوی یەلدا تێرۆرێکی ئاسایی نەبوو، تێرۆری جیلی چوارەمی حیزبی دێموکرات بوو کە هەموو ساڵێ ئەو جیلە یادی لەدایکبوونی قاسملوویان دەکردەوە و پەیمانی وەفادری و بەردەوامیان لەگەڵ رێبازی قاسملوو دووپات دەکردەوە.تێرۆری یەلدا تێرۆری باوەڕەکانی نەسلی چواری حیزب بوو بۆ وەستاندنی ئەوجیلە لە رێبازی قاسملوو، بەڵام شەهیدانی یەلدا بە خوێنی خۆیان بەڵێنی بەردەوامی ئەو رێبازەیان ئیمزا کرد . دوژمن نەیزانی کە بە شکاندنی هەنارەکانی یەلدا ، تۆی گوڵە هەنار بە زەویدا بڵاو دەبیتەوە و تانو پۆی رۆژهەڵات و هەناوی لاوانی شۆڕشگێڕ دادەگرێت.ئێمە دڵنیاین کە پەروەندەی تێرۆری شەوی یەلدا لە ویژدانی لاوانی شۆڕشگێڕدا زیندوویەو و رۆژێک لە رۆژان تۆڵەی خوێنی شەهیدان دەکەینەوە.” برگەکانی دیکەی رێورەسم پێکهاتبوون لە “سروودئ “وەرن با بچینە سەر گۆڕی شەهیدان” لەلایەن هاورێ حامید مەریوانی، شێعرێک بۆ شەهیدانی یەلدا لە لایەن هاوڕێی پێشمەرگە هیوا هەوشار و هەروەها سروودی “دایە ماڵ ئاوا بەرەو تێکۆشان” لەلایەن هاوڕێ هێمن کەریمی ستران بێژی ناو ریزەکانی پێشمەرگە.
© 2020 یەکێتی لاوانی دێموکڕاتی ڕۆژهەڵاتی کوردستان - هەموو مافەکانی ماڵپەڕ پارێزراون .