پێشنیوەڕۆی رۆژی چوارشەمە ١ی جۆزەردان شاندێکی سکرتاریای یەکیەتیی لاوانی دێموکراتی رۆژهەڵاتی کوردستان بە سەرپەرەستی پێشەوا عەلی پوور سکرتێری گشتی سەردانی کۆنسولخانەی وڵاتی ژاپۆنیان کرد لە هەولێر و لەلایەن سەرکۆنسول بەڕێز کاتسۆمی موریاسۆ پێشوازیان لێکرا.
لەم دیدارەدا بەڕێز موریاسۆ وێڕای بەخێرهاتن کردنی شاندی لاوان باسی لە گەشەی ژاپۆن دوای نەهامەتییەکان کرد و ئەمەشی وەک خاڵی هاوبەشی هەردوو نەتەوەی کورد و ژاپۆن ناوبرد کە دوای نەهامەتی دەتوانن رەوتی ژیان و پێشکەوتن بپێون. هەروەها بەڕێزیان باسی لە دۆخی رۆژهەڵاتی ناوەڕاست کرد و هیوای خواست دوای هاتنی هێزی زیاتری ئامریکا بۆ کەنداو، ئەو ناوچەیە دۆخی ئارام بەخۆیەوە ببینێ و سەبارەت بە کارەساتی موشەکبارانی قەڵای دێموکراتیش وتی ئێمە وڵاتێکین کە ئاگاداری ئەم کارەساتە بوین و هاوخەمی هەموو گەلانی مەزلومین.
پاشان بەڕێز پێشەوا عەلی پوور وێڕای سپاس لە بەڕێز موریاسۆ و پیرۆزبایی دەستبەکاربونی بەرێز نارۆهیتۆ وەک ئێمپراتۆری نوێی ژاپۆن، بەبیرهێنانەوەی زامەکانی هیرۆشیما و ناکازاکی و هەروەها سەردەشت و هەڵەبجە وەک نەمادەکانی مەزلومیەتی دوو نەتەوە، باسی شەرایتی ئێران و کێشەخولقێنی ئێرانی لەناوچە کرد و دوو روویی ئێران لە گەمە ناوچەیی و جیهانیەکانی شی کردەوە کە ئێران لەلایەک خۆی لە نەزمی جیهانی و بازاڕی جیهانی هاویشتوە و رووی دەوڵەتێکی تەواو لەخۆی نیشان دەدات بەڵام رووی راستەقینەی ئێران بەیتی رێبەرییە کە شەرعیەت لە ئایین وەردەگرێ و بەرهەمەکەی میلیشا شیعەکانی ناوچەن کە رۆژهەڵاتی ناوینیان ناسەقامگیر کردوە.
لەکۆتاییدا شاندی یەکیەتیی لاوان کتێبی “خولیا و مەرگی رەحمانی کوردان”لە نوسینی کاڕۆڵ پڕۆن هۆبێر و هەروەها گۆڤارێک لە بەڵگەنامەکانی موشەکبارانی قەڵای دێموکراتیان پێشکەش بە کۆنسولی ژاپۆن کرد.
