“کەماڵ محیەدینی” نوێنەری یەکیەتیی لاوانی دێموکراتی ڕۆژهەڵاتی کوردستان لە کۆبوونەوەی مەدیتەرانەی یەکیەتیی نێونەتەوەیی لاوانی سۆسیالیست لە وڵاتی پورتوگال، بەشداریی کرد.
ڕۆژانی هەینی و شەممە ٢٤ و ٢٥ی ئۆکتۆبری ٢٠٢٥ (بەرابەر لەگەڵ ٢ و ٣ی خەزەڵوەری ١٤٠٤ی هەتاوی)، کۆبوونەوەی مەدیتەرانەی یەکیەتیی نێونەتەوەیی لاوانی سۆسیالیست لەسەر “ڕووبەڕووبوونەوەی میلیتاریزم و داگیرکاری و پێشێلکارییەکانی مافی مرۆڤ و بەهێزکردنی هاوپەیمانیی نێودەوڵەتی بۆ دادپەروەری و ئازادی”، بە بەشداریی ئەندامان و نوێنەرانی کۆمیتەی مەدیتەرانەی یەکیەتیی نێونەتەوەیی لاوانی سۆسیالیست، لە “لیسبون”ی پێتەختی وڵاتی پورتوگال بەڕێوە چوو.
لە دەستپێکی ڕۆژی یەکەمی کۆبوونەوەکەدا چەند وتەیەک لەلایەن “خۆسێ لویس کارنێرۆ” سکرتێری حیزبی سۆسیالیستی پورتوگال، “سوفیا پرییەرا” سکرتێری گشتیی ڕێکخراوی لاوانی سۆسیالیستی پورتوگال و ئەندام پەرلەمانی پورتوگال و “هێند م-گەیت” سەرۆکی ڕێکخراوی IUSY، پێشکەشی ئامادەبووان کرا.
دواتر هەرکام لە ڕێکخراوەکان، ڕاپۆرتی ساڵانەی خۆیان پێشکەشی بەشداربووان کرد.
لەم پەیوەندییەدا هاوڕێ “کەماڵ محیەدینی” نوێنەری یەکیەتیی لاوانی دێموکراتی ڕۆژهەڵاتی کوردستان ڕاپۆرتێکی لەسەر ڕێژەی بەرچاوی دەسبەسەرکراوەکان و لەسێدارەدانی چالاکان و زیندانییە سییاسییەکان، ڕێژەی بێکاریی لاوان و پەنابردنی لاوان بۆ کۆڵبەری و گیانلەدەستدانیان لەم ڕێگایەوە لە ساڵی ڕابردوودا لە ئێران و ڕۆژهەڵاتی کوردستان پێشکەش کرد.
ناوبراو ئاماژەی بە گوشارەکانی ڕێژیمی ئیسلامیی ئێران لەسەر بزووتنەوەی کورد لە ڕۆژهەڵاتی کوردستان و ئێران دا و جەختی لەسەر ئەوە کردەوە کە لاوانی کورد، بەتایبەت ژنان لە نێوخۆی وڵات، بەردەوام بە شێوە جۆراوجۆرەکان لە سۆشیاڵ میدیا و ڕێکخراوە مەدەنییەکان دەنگیان بەرز کردووەتەوە و چالاکانە لە مەیداندان و ئێمەش وەک یەکیەتیی لاوانی دێموکراتی ڕۆژهەڵاتی کوردستان هەمووکات پشتیوانی لاوانی نێوخۆی وڵاتین.
لە درێژەی کاری کۆبوونەوەکەدا لە ڕۆژی یەکەم، چەند پانێلێک سەبارەت بە ئاگربەستی غەزە و ئاڵنگارییەکان و دەرفەتەکان بۆ سەقامگیرکردنی ئاشتی لە ڕۆژهەڵاتی ناوەڕاست بەڕێوە چوو کە تێیدا چەندین چالاکی سیاسی و ئەندام پەرلەمانی پورتوگال بەشدار بوون.
دواتر نوێنەرانی بەشداربوو سەردانی پەرلەمانی پورتوگالیان کرد و چەند بابەتێک سەبارەت بە ڕۆڵی پورتوگال و هەوڵە نێودەوڵەتییەکان بۆ بەڕێوەبردنی ئاشتی لەلایەن چەند ئەندام پەرلەمانەوە هاتنە بەر باس.
ڕاپۆرتی ڕۆژی دووەم:
