ڕۆژی دووەمی کۆبوونەوەکە بە پانێلێک سەبارەت بە بەڕێوەبردنی یاسای نێودەوڵەتی و یاسای مرۆڤدۆستانە دەستی بە کار کرد و گفتوگۆیەک لەسەر چارەسەرکردنی یاسا، چاودێری و یاسای لێپرسینەوە و مرۆیی کرا و جەخت لەسەر ئەوە کرایەوە کە دەبێ سیستەمی دادپەروەریی جیهانی بەهێزتر بکرێت و هەموو چین و توێژەکانی کۆمەڵگە، نەتەوەکان و کەمینەکان تێیدا یەکسان بن.
پانێلی دواتر سەبارەت بوو بە ڕۆڵ و کاریگەریی یەکیەتیی ئەورووپا و نێوەندگیری لە ململانێیەکان، ئاشتیپارێزی و پشتیوانی لە خەباتی گەلان بۆ دادپەروەری و ئازادی کە پانێلیستەکان بریتی بوون لە “مارگاریدا مارکێس” پەرلەمانتاری پێشووی پەرلەمانی یەکیەتیی ئەورووپا و “gۆنسالۆ ڕیبێرۆ تێلێس” شرۆڤەکاری سیاسی.
شایانی باسە کە “کەماڵ محیەدینی” نوێنەری یەکیەتیی لاوانی دێموکراتی ڕۆژهەڵاتی کوردستان ئەم پرسیارەی ئاڕاستەی پانێلیستەکان کرد: “پەرلەمانی ئەورووپا چەندین جار داوای کردووە کە سپای پاسداران بخرێتە لیستی تیرۆری یەکیەتیی ئەورووپاوە، بەتایبەت دوای ڕۆڵی لە دابینکردنی درۆن بۆ ڕووسیە لە جەنگی ئۆکڕاین. بەڵام شوڕای یەکیەتیی ئەورووپا ئەم هەنگاوەی نەناوە. هۆکاری ئەم دوودڵییە چییە؟ و ئەمە چۆن کاریگەریی لەسەر متمانە بە یەکیەتیی ئەورووپا هەیە لە وەستان بۆ ئاشتی و دادپەروەری؟” کە لێرەدا هەردووک پانێلیستەکان لەم بڕوایەدا بوون کە دەبێ سپای پاسدارانی ڕێژیمی ئیسلامیی ئێران بخرێتە نێو لیستی تیرۆری یەکیەتیی ئەورووپاوە.
ئێوارەی ڕۆژی دووەمی کۆبوونەوەکە، بە سەرپەرستیی هاوڕێ “کەماڵ محیەدینی” نوێنەری یەکیەتیی لاوانی دێموکراتی ڕۆژهەڵاتی کوردستان و “ڕێنا حەسەنییە” نوێنەری ڕێکخراوی لاوانی پرۆگرێسیفی لوبنان، وۆرکشۆپێک لەسەر بابەتی چۆنیەتیی کۆکردنەوەی لاوان لە دژی داگیرکاری لەسەر بنیاتنانی تۆڕەکانی هاودەنگیی نێودەوڵەتی و پێشخستنی چالاکییەکانی سەرکردایەتیی لاوان بۆ ئاشتی و دادپەروەری پێک هێنرا و لە کۆتاییدا ئەندامانی کۆبوونەوەی مەدیتەرانەی یەکیەتیی نێودەوڵەتیی لاوانی سۆسیالیست بەیاننامەیەکی هاوبەشیان لەسەر ئەم باسانە پەسەند کرد.
هەر لە میانەی ئەم دوو ڕۆژەدا، کۆبوونەوەی ڕێبەریی ڕێکخراوی IUSY بە بەشداریی ئەندامانی ڕێبەریی ئەم ڕێکخراوەش بەڕێوە چوو.
شایانی باسە کە نوێنەری یەکیەتیی لاوانی دێموکراتی ڕۆژهەڵاتی کوردستان لە پەراوێزی کاروباری کۆبوونەوەکەدا لەم دوو ڕۆژەدا، دیدار و چاوپێکەوتنی لەگەڵ چەندین ئەندام پەرلەمانی پورتوگال و یەکیەتیی ئەورووپا و چالاکانی سیاسی کرد و جەختیان لەسەر هاوکاریی زیاتر لە داهاتوودا کردەوە.
ڕاپۆرتی ڕۆژی یەکەم:
