بە بۆنەی ٧١ ساڵەی دامەزرانی حیزبی دیموکراتی کوردستان مەراسمێکی بە شکۆ لە شاری ستاڤانگێر بە بەشداری چەندین رێکخراوی سیاسی و مەدەنی کورد و هەروەها بەشداری ئەندامان و لایەنگرانی حیزبی دیموکراتی کوردستان و یەكیتی لاوان بەرێوە چوو، شایانی باسە کە بەشێکی بەرچاو لە بشدار بوان خەڵکانێکی نۆروێژی بوون کە بەشداری ئەم یادە بوون.
مەراسیمەکە کە بە دەست پێشخەری یەکێتی لاوانی دیموکراتی رۆژهەڵاتی کوردستان کۆمیتە ناوچەی رۆگلاند رێکخرابوو بە سروودی نەتەوایەتی ئەی رەقیب و خولەکێک بێدەنگی بۆ گیانی پاکی شەهیدان دەستی پێکرد. پرۆگرامەکانی ئەو شەوە لە لایەن هاورێیان نەمام خوسرەوی و تارا مەحموودی بە دوو زمانی کوردی و نۆروێژی پێش کەش کران.
سەرەتای بەرنامەکان بە پەیامی حیزبی دیموکراتی کوردستان دەستیان پێکرد کە لە لایەن بەرێز محەمەد کەسراییە وە پێشکەش کرا و هەروەها پەیامی یەکێتی لاوانی دیموکراتی رۆژهەڵاتی کوردستان کۆمیتە ناوچەی رۆگلاند لە لایەن بەرێز مەنسوور سەممار سکرتێری پێشووی یەکێتی لاوان پێشکەش بە ئامادەبوان کرا.
لە میانە پەیامەکان دا خاتوو سازگار مەحموودیان پارچە پەخشانێکی ئامادە کردبوو و پێشکەشی بەشداربوانی ئەم یادە کرد و دواتر کاک بێهرووز لوتفی بە دەنگە خۆشەکەی خۆی پارچە گۆرانیەکی پێشکەش بە ئامادە بوان کرد.
لە درێژەی پەیامەکان دا ئەنجوومەنی نیشتمانی کورد لە سووریا پەیامێکی ئاراستەی مەراسیمەکە کرد و دوا بەدوای ئەو خوێندکارانی کورد لە وڵاتی نۆروێژ پەیامەکەی خۆیان پێشکەش کرد. لە دوایین برگەی پەیامەکان دا خاتوو شنە حەکیم زادە پەیامی یەکێتی ژنانی دیموکراتی کوردستانی پێشکەش کرد.
لە برگەیەکی تری بەرنامەکان دا گرووپی هەڵپەرکێی “باران” یەکێتی لاوان کۆمیتە ناوچەی رۆگلاند هەڵپەرکێیەکی زۆر جوانیان پێشکەش کرد کە بوو بە مایەی سرەنجی خەلکی بەشداربوو و تین و گورێکی تایبەتی بە مەراسیمەکە دا.
مەراسیمەکە دواتر بە بەدەنگە خۆشەکەی کاک بێهرووز لوتفی و دەست و پەنجە رەنگینەکانی کاک پێشرەو بە ئامێری کیبۆرد تا درەنگانی شەو درێژەی پێدرا و هەموو بەشدار بوان بە یەکەوە بەهەڵپەرکێی و گۆڤەند شادیان گێرا و ئەم یادەیان بەرز راگرت.