خەڵکی رزگاریخواز و نیشتمانپەروەری کوردستان!
ژنانی ئازا و بەهەڵوێست!
لەكاتێكدا یادی 8-ی مارس دەكەینەوە، كەجیاواز لە ساڵانی رابردوو ژنانی كورد بەقۆناغێكی سەخت و دژواردا تێدەپەرن،قۆناغێك كەجارێكیتر ئەوەی سەڵماندەوە كە ژنانی كورد ھاوكات لەگەڵ شەڕكردن بۆ مافە كۆمەڵایەتیی و یەكسانی رەگەزی، لەبەر شوناسی نەتەوەییان دەسترێژیان دەكرێتەسەرو دەدزرێن و دەكوژرێن.
لەلایەك بەدەیان ژن و كچی رۆژھەڵاتی كوردستان لەبەندیخانەكانی كۆماری ئیسلامی ئێران دان،و ساڵانەش ھەندێك لەوان لەسێدارە دەدرێن. كۆماری ئیسلامی ئێران داعش ئاسا ھەموو ئازادییەكی لەژنانی ئێران و كوردستان بەتایبەت قەدەغە كردووە،و یاساكانی ئێرانیش ھیچ حیسابێك بۆ ژنان ناكات، و لەگەڵ ئەوانەش كچان و ژنانی كورد لەرۆژھەڵات بەرادەی پیاوان و بگرە زۆرتریش زوڵمی سیاسیی و كڵتووری و ھونەریان لێدەكرێت.
لەباشووری كوردستانیش ئەمساڵ ژینۆساید و كارەساتێكی مرۆی بەسەر ژنان و كچانی كوردانی ئیزەدی ھات، كارەساتێك كە رەنگە لەمێژوودا وێنەی نەبینرابێت، لەشەنگال ھێزەكانی تاریكی بەناوی ئاینەوە سەدان ژنی ئێزەدیان رفاندو، بەسەری موجاھیدانی تاریكیدا دابەش كران، ھەندێكیان كوژران و ھەندێكیشیان فرۆشان. لەرۆژئاوای كوردستانیش بەدەیان ھەزار ژنی كورد بەھۆی ھەبوونی داعش و شەری ناوخۆی سوریا ئاوارەی وڵاتانی درواسێ بوون،وبەخراپترین بارودۆخدا تێدەپەرن. بەڵام لەگەڵ ھەمووی ئەوانەش ئەمجارەش ژنانی كورد ھاوتەریب لەگەڵ شەر بۆ گەیشتن بەیەكسانی لەگەڵ پیاوان، لەمەیدانی بەرگری لەخاك و ناسنامەی كوردایەتیش رووسوور بوون، ژنانی كۆبانێ جیھانیان بەخۆیانەوە سەرقاڵ كرد، و قۆناغێكی دیكەیان بە قۆناغەكانی خەباتی رزگاری ژنانی جیھان زیاد كرد، كچانی چەك لەملی كۆبانێ ناسنامەی راستەقینەی ژنانی كورد بوون، كە وەكوو كچان و ژنانی رۆژھەڵاتی كوردستان ھاوشان لەگەڵ پیاوان شەری پاراستنی شوناس و رەزگاری نەتەوەی دەكەن، و دوای ئەوەش داوای نیوەی دەستكەوتەكان دەكەن.
چارەنووسی ژنانی كورد ئاوایە كەدەبێ بەردەوام شەری یەكسانی رەگەزی خۆیان بخەنە دوای شەری پاراستنی خاك و نیشتمان، بەڵام ئەو ژنانەی ھاوشانی پیاوان چەك لەمل دەكەن و نەتەوەكەیان دەپارێزن، و ئەو كچانەی بەھۆی كوردبوونیان دەدزرێن و دەفرۆشێن، و خۆیان نادۆرێنن و واز لەكوردایەتی و ناسنامەیان ناھێنن، ئەوانە لەقۆناغی سەقامگیریدا ھەرگیز بەكەمتر لەمافی خۆیان رازی نابن،و كۆمەڵگا و رەگەزی بەرامبەریشیان زاتی ئەوە ناكەن، پێشنیاری مافی كەمتر بەو شێرە ژنانە بكەن.
ھەر بۆیەش 8-ی مارس لەو ژن و كچە پێشمەرگانە پیرۆز بێت، كە گۆرەپانی سیاسیی و چەكداری بۆ پیاوان چۆڵ ناكەن، بۆ ئەوەی لەئەركەكاندا ھاوبەش بن و بەمافی كەمیش رازی نەبن.
یەکیەتیی لاوانی دێموکڕاتی رۆژهەڵاتی کوردستان
کۆمیتەی بەڕێوەبەری گشتی
8ی مارسی 2015
