سەرلەبەیانی ئەمرۆ چوارشەممە 31/12/2014 یەکیەتیی لاوانی دێموکراتی رۆژهەڵاتی کوردستان لەدرێژەی کاروچالاکییەکانی خۆیدا کۆرسێکی یەک رۆژەی راگەیاندنی بۆ ئەندامانی رێکخراو و ئەندامانی ئۆرگانی راگەیاندنی حیزبی دێموکراتی کوردستان بەڕێوەبرد.
لەو کۆرسە زانستییەدا مامۆستای راگەیاندنی زانکۆی سەلاحەدین مامۆستا ئەرسەلان رەحمان باسی لە توخمەکانی هەواڵ و سەرچاوەکانی دۆزینەوەی هەواڵ بۆ بەشداربووان کرد و هاوکات باسی لە تایبەتمەندی راگەیاندنی ئۆپۆزسیۆنی دژی سیستەمە تۆتالیتێرەکان کرد کەچۆن هاوکات لەگەڵ پاراستنی ئەرکی ئەخلاقی راگەیاندن کەڵکی سیاسیی خۆشیان لە راگەیاندن و شێوازی داڕشتنی هەواڵ و راپۆرت وەربگرن. هەر لەو کۆرسەدا مامۆستا ئەرسەلان رەحمان بەوردی باسی لە ئەرک و بەرپرسیارییەتی راگەیاندنی کوردی کرد و بەڕای ئەو پێش هەموو ئەتەکێتێکی میدیایی پێویستە ستراتیژییەکی نیشتمانی و نەتەوەیی لەپشت هەموو میدیاییەکی کوردیدا هەبێت بۆ ئەوەی رای گشتی نەتەوەیی دروست بکات و میدیای پارچەکانی کوردستان خۆویست یان خۆنەویست لەدژی یەکتر بەکار نەیەن.
لە پانێلی دیکەی کۆرسەکەشدا بەشداربووان بە پرسیارو تێبینی خۆیان گفتۆگۆیەکی کراوەیان لەسەر راگەیاندن و چۆنییەتی کاری میدیای ئۆپۆزسیۆنی دژی ناوەندی تۆتالیتێر کرد.
