خەڵکی خەباتگێڕی کوردستان!
لاوانی ئازا و بەهەڵوێست!
پێشمەرگە و خەباتکارە قارەمانەکانی بنەماڵەی گەورەی دیموکرات!
بەبۆنەی شەوی یەڵدا و ساڵڕۆژی لەدایکبوونی رێبەری مەزنمان “د.عەبدولڕەحمانی قاسملوو” پیرۆزباییتان لێ دەکەین و هیوادارین
هەمیشە سەربەرز و سەرفەراز بن و لە پێناو وەدیهێنانی ئامانجە رەواکانی نەتەوە ژێر دەستەکەماندا شێلگیرانەتر لە جاران درێژە بە خەبات و تێکۆشان بدەن.
شەوی یەڵدا ئەگەر بۆ نەتەوە و وڵاتانی دیکە تەنیا شەوی درێژی ساڵە و بەوبۆنەوە جەژن دەگرن و لە دەوری یەکتری کۆدەبنەوە، ئەوا بۆ ئێمە گرنگییەکی دیکە و مانایەکی دیکەی هەیە. شەوی یەڵدا بۆ ئێمە جیا لەوەی درێژترین شەوی ساڵە، هاوکاتە لەگەڵ ساڵڕۆژی لەدایکبوونی رێبەرمان دوکتور قاسملووی نەمر. لەم روانگەوە شەوی یەڵدا بۆ کورد بەگشتی و بۆ تێکۆشەرانی دێموکرات بەتایبەتی دەرفەتێکە کە تێیدا ناو و یادی دوکتور قاسملوو بەرز رابگرن و پەیمان لەگەڵ ئامانج و بیر و رێبازی ئەم رێبەرە مەزنە نوێ بکەنەوە.
لەکاتێکدا یادی شەوی یەڵدا و 84مین ساڵڕۆژی لە دایکبوونی پێغەمبەری ئاشتی دەکەینەوە کە ناوچەکە گەلێک گۆڕانکاریی بەسەردا هاتووە و لەو نێوەشدا پرسی رەوای نەتەوە بەشخوراوەکەمان بووەتە فاکتۆرێکی کاریگەر و دیار.
لە رۆژهەڵاتی نیشتمان زیندانیانی سیاسی و لاوانی ئازا و بەهەڵوێست لە رێگای مانگرتن و رێکارە مەندەنییەکانەوە داکۆکی لە پرسی رەوای نەتەوەکەیان دەکەن و هەوڵ بۆ وەدیهێنانی ئامانجەکانی دوکتور قاسملوو دەدەن.
لە رۆژاوای و باشووری نیشتمان پێشمەرگە و شەڕڤانان دژی تیرۆریستەکانی داعش دەجەنگن و بە پێشکەش کردنی گیانیان، خاک و سنووری کوردستان دەپارێزن.
لە باکور گۆڕانکارییەکان بە ئاراستەیەکی دڵخۆشکەردا دەچێ و لە ئەنجامی هەوڵ و تێکۆشانی خەباتکارانی ئەو پارچەیەدا پرسی کورد رۆژ لە دوای رۆژ لە چارەسەر نزیک دەبێتەوە. بەپێچەوانەی خەون و ویستی دوژمنانی کورد، ئەم گۆڕانکاریانە وای کردوە کە کورد لە گەمە ناوچەیی و جیهانییەکاندا ببێتە کارتێکی گەورە و بە گوێرەی قورسایی و پێگەی خۆی دەور بگێڕێ.
لەم گۆڕانکارییە مەزنانەدا ناکرێ رۆڵی لاوان وەک توێژێکی رادیکاڵ و بەوزەی کۆمەڵگەی کوردەواری لەبەرچاو نەگیردرێ و پێویستە بەبایەخەوە سەیری بەشداری لاوان لە پرۆسە جۆراوجۆرکاندا بکرێ. بەشداریی بەربڵاوی لاوان لە بەرەکانی شەڕ و رۆڵی لاوان لە خۆپێشاندان و مانگرتنەکان و وشیار کردنەوەی خەڵکدا، سەلمێنەری ئەوەیە کە ئەم توێژە کۆڵەکەیەکی گرنگیی گۆڕانکارییەکانە و دەبێ بایەخیی زیاتر بە بەشداریان لە ناوەندەکانی بڕیار و بەڕێوەبردندا بدرێت.
خاڵێکی دیکە کە پێویستە لەم بۆنەیەدا ئاماژەی پێ بکەین ئەوەیە کە بەداخەوە لەماوەی ساڵانی رابردوودا ناتەبایی و پڕش و بڵای نێوان هێزەکانی رۆژهەڵاتی کوردستان بووە هۆکارێک بۆ ئەوەی پرسی کورد لەو پارچەیە لە چاو پارچەکانی دیکە بکەوێتە پەڕاوێزەوە و کارتی کورد لەو بەشەی نیشتمان تا رادەیەک پاسیڤ بێ. ئەم دۆخە بووە هۆی دروست بوونی ململانێ ناسالم لە نێوان لایەنەکاندا و بەداخە زۆر جاریش دوور لە پرەنسیپە ئەخلاقییەکان مامەڵە لەگەڵ رەمز و سیمبۆلەکانی خەباتی کورد لەو پارچەیە کراوە. بۆیە لەم بۆنەیەدا داواکارین لە روانگەیەکی ئەخلاقگەرایانەوە بڕوانرێتە رەمز و سەرمایە نەتەوەییەکان و بە دوور لە چوارچێوەی گەمەکانی دونیای سیاسەت و حیزبایەتی، رێز لە سیمبولە نەتەوەییەکان و شەهیدەکان بگیرێت.
لە کۆتایی دا لە چوارچێوەی وەدیهێنانی ئامانجەکانی دوکتور قاسملووی رێبەرمان و سەرجەم شەهیدان کوردستان، داوا لە سەرجەم چین و توێژەکانی رۆژهەڵاتی کوردستان بەگشتی و توێژی لاوان بەتایبەتی دەکەین کە هەوڵەکانیان بۆ لە پەراوێز دەرخستنی پرسی کورد لە رۆژهەڵاتی کوردستان چڕتر بکەنەوە و کار بۆ ئەوە بکەن کە کارتی کورد لە رۆژهەڵاتی بەهێز بکەن.
بەرز و بەڕێز بێ شەوی لەدایکبوونی دوکتور قاسملووی رێبەر
سڵاو لە فیداکاریی و ئازایەتی پێشمەرگە و شەڕڤانان
یەکیەتیی لاوانی دێموکراتی رۆژهەڵاتی کوردستان
کۆمیتەی بەڕێوەبەری گشتی
٢١ی دێسامبری ٢٠١٤
