هەروەک ئاگادارن لە تێکهەڵچوونێکی نێوان هێزی پێشمەرگەی کوردستان و هێزەکانی رێژیم لە ناوچەی شنۆ، هاوڕێ هەژار قاسمی پێشمەرگەی دڵسۆزی حیزبی دێموکراتی کوردستان و لەهەمانکاتدا ئەندامی یەکیەتی لاوانی دێموکراتی رۆهەڵاتی کوردستان شەهید بوو .
ئاشكرایە کە لاوان لە شۆڕش و جووڵانەوەکانی کورددا بەردەوام دەوری ئاوانگاردیان هەبووە و هەنووکە لەم قۆناغە نوێیەی خەباتی رزگاریخوازی نەتەوەکەماندا لاوان وەک هەمیشە لە سەنگەرەکانی پێشەوەی بەرگری دان و لاوانی دێموکرات لەم قۆناغەشدا پشکی شێریان بەردەکەوێت.
شەهید هەژار وەکوو نوێترین شەهیدی رێگای رزگاری کورد لە رۆژهەڵاتی کوردستان بە دەرکی ئەم راستییە کە نەتەوەکەمان بە درێژایی مێژوو هەوڵی داوە لە رێگای ئاشتییانە پرسی کورد چارەسەر بکات و بۆ گەیشتن بە مافە نەتەوەییەکانی رێگای دانووستان بگرێتە بەر، بەڵام رێژیمە یەک لەدوای یەکەکان کە باوەڕیان بە دانوستان و چارەسەری ئاشتیانەی پرسی کوردنەبووە، کوردیان ناچار کردووه کە بۆ بەرگری لە ماف و کەرامەتی نەتەوەیی خۆی دەست بداتە چەک. بە پێی بڕیار و کۆنوانسیۆنە نێودەوڵەتییەکانیش خه‌بات کردن له به‌رانبه‌ر حکومه‌ته ره‌گه‌ز په‌ره‌سته‌کان ، دیکتاتۆر و خۆسه‌پێنه‌کان خه‌باتیکی ره‌وایه و ئه‌گه‌ر ببێته خه‌باتی چه‌کداریش ره‌وایه‌تی خۆی له ده‌ست نادا. شەهید هەژار و لاوانی رزگاریخوازی کورد بە باوەڕمەندیمان بە رزگاری نەتەوەکەمان لە بندەستی و لە ژێر رۆشنایی یاسا و رێسا نێودەوڵەتییەکان، بەرگرییان لە ماف و کەرامەتی نەتەوەکەیان کرد و ئێمە وەک یەکیەتی لاوانی دێموکراتی رۆژهەڵاتی کوردستان پشتیوانی خۆمان لەو بەرگرییە پیرۆزەی لاوان و پاریزەرانی رۆهەڵاتی کوردستان دەردەبڕین و ئامادەی هەرجۆرە بەرنگاربوونەوەیەکی چەکدارانەین لە بەرامبەر دوژمنانی کوردستان.
خەڵکی مافخوازی کوردستان!
ئەندامانی یەکیەتی لاوان وه‌ک چۆن بە درێژایی مێژوو شانبەشانی حیزبی دێموکرات و پێشمەرگە لە سەنگەرە جیاجیاکانی خەباتدا بەشداری جووڵانه‌وه‌ی رزگاریخوازی نەتەوەی کورد بوون، لەم قۆناغەشدا ئەندامانی یەکیەتی لاوان کە زۆربەیان پێکهاتوون لە پێشمەرگەکانی حیزبی دێموکرات، ئامادەی هەرجۆرە بەرگرییەکن لە خاک و نەتەوەکەیان لە رۆژهەڵاتی کوردستان و دڵنیاتان دەکەینەوە کە تا وەدیهێنانی ئامانجە پیرۆزەکانی نەتەوەی کورد ناسرەوین. ئێمه دڵنیاین که لاوانی رۆژهه‌ڵاتی کوردستان به ئاوه‌دانتر کردنه‌وه‌ی سه‌نگه‌ری شه‌هید هه‌ژار و شه‌هیدانی کوردستان، تا گه‌یشتن به مافه ره‌واکانی نه‌ته‌وه‌که‌مان کۆڵ ناده‌ن و درێژه ده‌ری رێگای شه‌هیدانی کوردستانن.
خەڵکی نیشتمانپەروەری رۆژهەڵاتی کوردستان
هێزی پاریزەرانی رۆژهەڵاتی کوردستان لە کاتێکدا کە بۆ پشتیوانی لە نەتەوەکەیان لە رۆژهەڵات هاتنە مەیدان، لە پارچەیەکی دیکەی نێشتمانمان خەڵکی خۆراگری کۆبانێ لەرۆژئاوای کوردستان لەژێر گەمارۆی گروپی دەوڵەتی ئیسلامی ناسراو بەداعشدایە کە لەلایەن بلۆکە ناوچەییەکانەوە بە نوێترین چەک و تەقەمەنی تەیارکراوە، بەڵام خۆراگری و نەبەزی خەڵکی کۆبانێ بەردەوامە و رێگەیان نەداوە پێی رەشی تیرۆریستان بەو شارە کوردستانییە بگات. گەمارۆی کۆبانێ و مەترسی داگیرکردنی ئەو بەشە لە خاکی رۆژئاوای کوردستان جارێکیتر لاوانی رۆژهەڵاتی کوردستانی هێنایەوە سەر شەقامەکان و ئەوە چەند رۆژە لە سەرجەم کۆڵان و شەقامەکانی رۆژهەڵات دروشمی ئازادی بۆ کوردستان و مەرگ و نەمان بۆ داگیرکەران دەگوترێتەوە، لەوەها دۆخێکدا بێگومان ئەرکی هێزی پارێزەرانی قورستر دەبێت و هەروەها لاوانی پارێزەری رۆژهەڵاتیش ئەرکی زیاتریان دەکەوێتە سەرشان.
لاوانی نیشتمانپارێزی رۆژهەڵاتی کوردستان
دوێنێ پەیامی هاوخەمیتان بە هەست و بە کردەوە بۆ خوشک و براکانتان لەشەنگال لە باشووری کوردستان وەکوو هەستێکی کوردانە گەیشت، ئەمرۆش لەپێناو پشتیوانیتان بۆ خۆراگری خەڵکی کۆبانێ لەرۆژئاوای کوردستان پەیامێکی دیکەتان بەگوێی کوردستان بەگشتی و نوخبەی سیاسیی رۆژهەڵات و ئێمەی یەکێتی لاوانی دێموکراتی رۆژهەڵاتی کوردستان دا، پەیامێک کە زۆر بەئاشکرا بەدروشمەکانتانەوە دیارە. ئێوەی لاوانی رۆژهەڵات ئەوەتان دەرخست کە هێزێکی یەکجار گەورەی شاراوەن کە لەبچووکترین دەرفەتەکاندا حەماسەی گەورە دەخوڵقێنن و هاوکات دیسانیش شعوری نەتەوەیی و هەستی نیشتمانپەروەریتان نیشانی کوردستان و جیهان دا.
سەرکەوێ خەباتی رزگاریخوازی کوردستان
نەمری بۆ شەهیدانی کوردستان
کۆمیتەی بەڕێوەبەری گشتی یەکیەتی لاوانی دێموکراتی رۆژهەڵاتی کوردستان
١٩/٧/٢٧١٤
