راگەیه‌ندراوی کۆتایی کۆنگرەی حەوتەمی یەکێتی لاوانی دێموکراتی رۆژهەڵاتی کوردستان
لاوانی رۆژهەڵاتی کوردستان
ئەندامانی یەکێتی لاوانی دێموکراتی رۆژهەڵاتی کوردستان
دۆستان و لایەنگرانی یەکێتی لاوانی دێموکراتی رۆژهەڵاتی کوردستان
رێکخراو و دامەزراوەکانی لاوانی رۆژهەڵاتی کوردستان
لەرێکەوتی ٨-ی خەرمانان بەبەشداری دەیان ئەندام حەوتەمین کۆنگرەی یەکێتی لاوانی دێموکراتی رۆژهەڵاتی کوردستان دەستی بەکارەکانی کرد. و بە شانازییەوە پێتان رادەگەیەنین کە لە ٩-ی خەرمانان کۆنگرەکەمان بەسەرکەوتووی کۆتایی بەکارەکانی خۆی هێنا. هاوکات لەو کۆنگرەیەدا و لەکەشێکی تەواو دێموکراتیک و لەسەر بنەمای گفتوگۆیەکی راشکاودا کۆمەلێک بڕیارو راسپاردەی نوێ بۆ قۆناغی داهاتووی خەبات و تێکۆشانی لاوانی رۆژهەڵات دەرکران.
هاوڕێیان
حەوتەمین کۆنگرەی یەکێتی لاوانی دێموکراتی رۆژهەڵاتی کوردستان لە کاتێکدا بەرێوەچوو، کە گۆرانکاریە خێراکانی ناوچەو بەتایبەت ئەو دەوڵەتانەی کوردستانیان بەسەردا دابەشبووە، وایکردووە کە لەهەموو لایەکەوە دەرفەتی زێرین بێتە پێش، و هاوکات قەیرانی گەورەشی لێ چاوەڕوان دەکرێ. قەیرانەکان خۆیان لە ” سەرەرۆی ئێران بۆ پاراستنی هەژمۆنی سیاسی-مەزهەبی” و “زیادکردنی گوشارەکان بۆ چالاکییەکانی لاوان” و “پەرەسەندنی سەلەفییەتی تەکفیری بۆ رۆژهەڵاتی کوردستان” و ” پەراوێزخرانی پرسی رۆژهەڵاتی کوردستان لەبەرامبەر گۆرانکاریی پارچەکانی دیکەی کوردستان”-دا دەبینێتەوە. بەڵام لە ناخی ئەو قەیرانانەدا دەرفەتی گەورەش هەن کە بریتین لە “سەرقاڵبوونی راگەیاندنە جیهانییەکان بەپرسی کورد” ، “بەرزبوونی شعوری نەتەوەی لاوانی رۆژهەڵات”، “رێزگرتنی رۆژهەڵات لە تایبەتمەنی سیاسی و جوگرافی پارچەکانی دیکەی کوردستان” و ” دەرکەوتنی روخساری شارستانی و مەدەنیی رۆژهەڵاتی کوردستان.”
بەڵام وێڕای هەموو ئەو گۆڕانکارییە خێرایانەی ناوچەکە کە زۆربەیان ئەگەری خوڵقانی کارەساتی مرۆیی لێدەکرێت، لاوانی رۆژهەڵاتی کوردستان لە چالاکییە ژینگە پارێزی و ئەدەبی و وەرزشییەکانیاندا خاو نەبوونەتەوە، و چەندین قارەمانیەتیان لەئاستی ئێران و بگرە جیهانیشدا تۆمارکردووە، هاوکاتیش بەشێوەیەکی خۆڕسک هاوخەمی ماددی و مەعنەوی خۆیان لەژێر ئەو سەرکوت و گوشارە زۆرەی رژیمی ئێران بۆ باشوور و رۆژئاوای کوردستان گەیاندووە.
بەڕێزان
هەر لەسەر بنەمای ئەو دەرفەت و قەیرانانەدا یەکێتی لاوانی دێموکراتی رۆژهەڵاتی کوردستان یەکگرتووی هەموو پارچەکانی کوردستانی لەمەڕ پرسە چارەنووسسازەکان بە زەروورەتی مێژوویی دەزانێت، و پێیوایە لاوانی کوردستانی گەورە دەبێ، هەوڵ و گوشارەکانیان چڕبکەنەوە بۆ ئەوەی دەرفەتی یەکگرتووی گوتاری پارچەکانی کوردستان، دابڕانێکی مەترسیداری پارتە سیاسییە کوردییەکانی لەسەر بنەمای بلۆکبەندی ناوچەیی لێنەکەوێتەوە. هەربۆیەش یەکێتی لاوانی دێموکراتی رۆژهەڵاتی کوردستان دەخوازێت لاوانی چوارپارچە، پارتە سیاسییەکان لەو دابڕانە کارەساتبارە ئاگاداربکەنەوە.
هاوڕێیان
خەباتی میللی دێموکراتی کورد لەرۆژهەڵاتی کوردستان چەمک گەلی وەکوو رزگاریخوازی، دێموکراسی، مەدەنییەت و پێکەوەژیانی هەڵگرتووە. ئەو چەمکانەی کەچیتر هی وڵاتە زڵهێزە ناوچەیی و جیهانییەکان نین، بەڵکو خاوەنی راستەقینەی ئەو چەمکانە رێکخراوەکانن کە بەردەنگی خۆیان لە دەوڵەتەوە گۆریوە بە رای گشتی کۆمەڵگای نێودەوڵەتی، هەربۆیەش پەیوەندیگرتنی رێکخراوەکانی لاوان بە رێکخراوە نێودەوڵەتییەکان بە پێویست دەزانێت.
لەلایەکی دیکەشەوە قۆناغی ئێستای خەباتی رزگاریخوازی نەتەوەیی دەخوازێت کە پارتە رۆژهەڵاتییەکان ئەگەریش لەرووی تەشکیلاتی یەک نەبن، بەڵام لەرووی هەڵوێستە هەنووکەییەکاندا یەکدەنگ بن، ئەو بەربەستەش بە یەکگرتووی رێکخراوەکان دەشکێندرێت. لەلایەکی دیکەشەوە مادام دیاردە کۆمەلایەتییەکان و گیروگرفتە کلتوری و سینفییەکانی لاوانی رۆژهەڵات لەماهییەتدا یەکن، ئێمەی لاوانیش دەبێ بەیەکدەنگی و بە بەرنامەی هاوبەش هەنگاویان بۆ هەڵگرین.
بەڕێزان
لەکۆتاییدا سەری رێز بۆ سەرجەم ئەو شەهیدانە دادەنوێنین کە لە قۆناغە جیاجیاکاندا لەریزی یەکێتی لاوانی دێموکراتی رۆهەڵاتی کوردستان خەباتیان کردووە.
سەرکەوتوو بێت خەباتی رزگاریخوازی نەتەوەی کورد لە رۆژهەڵاتی کوردستان
سەرکەوتوو بێت یەکێتی لاوانی دێموکراتی رۆژهەڵاتی کوردستان
کۆنگرەی حەوتەمی یەکێتی لاوانی دێموکراتی رۆژهەڵاتی کوردستان
٩-ی خەرمانانی ١٣٩٣-ی هەتاوی
